Ҫӗнӗ Шупашкарти 57 ҫулти Светлана Хрулева «Амӑшӗ героиня» ята тивӗҫнӗ. Хушӑва РФ Президенчӗ Владимир Путин алӑ пуснӑ.
Светлана Васильевнӑпа Вячеслав Владимирович 13 ачана воспитани параҫҫӗ: 6 хӗр те 7 ывӑл. Чи кӗҫӗнни 2012 ҫулта ҫуралнӑ. Аслисем ҫемье ҫавӑрнӑ ӗнтӗ. Хрулевсен 15 мӑнук пур. Светлана Васильевна «Амӑшӗ-героиня» ята тивӗҫнипе пӗрле ҫемьене 1 миллион тенкӗ парӗҫ.
Сӑмах май, ҫак ята 2022 ҫултанпа параҫҫӗ. 10-мӗш ачи ҫулталӑк тултарсан, ытти ачи чӗрӗ-сывӑ пулсан амӑшӗ ҫак ята тивӗҫме пултарать.
Чӑваш Республикин ӗҫ тата социаллӑ хӳтлӗх министрӗ Алена Елизарова «Чӑваш Республики умӗнчи тава тивӗҫлӗ ӗҫсемшӗн» орден медальне тивӗҫнӗ. Хушӑва республика Элтеперӗ Олег Николаев ӗнер, чӳк уйӑхӗн 26-мӗшӗнче, ала пуснӑ.
Алена Елизарова пирӗн тӑрӑхра тӗрлӗ социаллӑ программӑна пурнӑҫа кӗртессипе ҫине тӑрса ӗҫлет. Ку вӑл нумай ачаллӑ ҫемьесене, ватӑсене, ӗҫсӗр ҫынсене, халӑхӑн тата ытти категорине тӳрремӗнех пырса тивет.
Чӳк уйӑхӗн 12-мӗшӗнче Чӑваш наци музейӗнче республикӑн Культура, национальноҫсен ӗҫӗсен, архив ӗҫӗн министерствин коллегийӗн ларӑвӗ иртнӗ.
Мероприятие коллеги членӗсем, министерствӑн структура подразделенийӗсен ертӳҫисем, районсемпе хуласен администрацийӗсен культура пайӗсен пуҫлӑхӗсем хутшӑннӑ. Ларӑва культура министрӗ Светлана Каликова уҫнӑ.
Вӑл «Чӑваш Республикин культурӑн тава тивӗҫлӗ ӗҫченӗ» ята тивӗҫнисене саламланӑ. Ҫав йыша — Шупашкар муниципаллӑ округӗн Тӗп культура центрӗн хормейстерӗ Наталия Арсентьева; Шупашкарти «Ҫӗнтерӳ» мемориал комплексӗн «Ветеран» халӑх хорӗн хормейстерӗ Светлана Муллина; Комсомольски округӗнчи тӗп клуб тытӑмӗн халӑх театрӗн режиссёрӗ Марина Шумилкина.
Чӑваш Енри нумай ачаллӑ тепӗр ҫемьене РФ Президенчӗ Владимир Путин «Ашшӗ-амӑшӗн мухтавӗ» орден медалӗпе чыслама йышӑннӑ. Ӑна Хӗрлӗ Чутай округӗнчи Макаровсем тивӗҫнӗ.
Владимир Александровичпа Альбина Викторовна тӑватӑ хӗр ӳстереҫҫӗ: Анастасия, Екатерина, Ульяна тата Татьяна. Ҫемье пуҫӗ колхозра водительте ӗҫленӗ, шкул автобусӗпе ачасене илсе ҫӳренӗ, почтальон пулнӑ. Халӗ кил хуҫалӑхне тытса пырать, ватӑ амӑшне пӑхать. Татьяна Викторовна хими, биологи тата географи предмечӗсене вӗрентет.
Чернобыльти АЭСри аварие пӗтернӗ ҫӗре хутшӑннӑ Иван Алексеева «Вилекенсене ҫӑлнӑшӑн» медаль пама йышӑннӑ. Хушӑва РФ Президенчӗ Владимир Путин алӑ пусса ҫирӗплетнӗ.
Анчах, шел те, Етӗрне округӗнче пурӑннӑ Иван Алексеев 2000 ҫулта вилнӗ. Медале унӑн йӑмӑкне панӑ.
Сӑмах май, кӑҫалхи ака уйӑхӗ тӗлне республикӑра 723 чернобылец пурӑннӑ. Тӑватӑ ҫул каяллахипе танлаштарсан, 311 ҫын сахалрах.
Вӑрнар округӗнчи Ҫӗнӗ Мӗлӗш ялӗнче пурӑнакан Николайпа Зоя Степановсене «Юратупа шанчӑклӑхшӑн» орденпа чысланӑ. Вӗсем кӑҫал кервен туя паллӑ тунӑ.
Николай Ивановичпа Зоя Степановна пӗр-пӗрне ачаран пӗлеҫҫӗ, пӗр шкулта вӗреннӗ. Унтан Зоя техникумра ветеринара вӗреннӗ, Николай салтака кайса килнӗ, колхозра ӗҫленӗ. Кайран Зоя та унта ӗҫлеме пынӑ.
Степановсем икӗ ывӑл ҫуратса ӳстернӗ.
Чӑваш халӑх художникне Анатолий Данилова «Чӑваш Республики умӗнчи тава тивӗҫлӗ ӗҫсемшӗн» орден медалӗпе чысланӑ.
«Анатолий Васильевич хамӑр ҫӗршывра, чикӗ леш енче хӑйне ятӑн 57 курав йӗркеленӗ. Ҫак кунсенче унӑн черетлӗ куравӗ Шупашкарти Халӑхсен туслӑхӗн ҫуртӗнче уҫӑлнӑ. Вӑл «Манӑн ӳнер тӗнчи» ятлӑ. Курав чӳк уйӑхӗн 15-мӗшӗччен ӗҫлӗ», — хыпарланӑ Телеграмри «Пуринчен малтан» каналта.
РФ Патшалӑх Думин Председателӗ Вячеслав Володин Патшалӑх депутатне Алла Салаевӑна Тав хучӗпе чысланӑ.
Палӑртмалла: Алла Салаева Патшалӑх Думин депутатӗнче 2021 ҫултанпа ӗҫлет. Ун умӗн вӑл ЧР Патшалӑх Канашӗн Председателӗн ҫумӗ пулнӑ.
Унсӑр пуҫне парламентӑн аялти палатинче Чӑваш Ен интересӗсене Алена Аршинова (ЕР), Анатолий Аксаков (СР) тата Ирина Филатова (КПРФ) хӳтӗлеҫҫӗ.
Шупашкар муниципаллӑ округӗнчи Тутаркасси ялӗнчи шкулта ӗҫлекен Альбина Ишовӑна «Чӑваш Республикин халӑх учителӗ» хисеплӗ ят пама йышӑннине Чӑваш халӑх сайчӗ пӗлтернӗччӗ-ха. Ку ята вӑл педагогикӑра тата воспитани ӗҫӗнче чылай ҫул тӑрӑшса ӗҫленӗшӗн тивӗҫнӗ.
Альбина Валентиновна Тутаркассинчи шкулта ачасне чӑваш чӗлхипе литературине вӗрентет. Вӑл — Чӑваш Республикин тава тивӗҫлӗ учителӗ, аслӑ категориллӗ вӗрентекен.
Альбина Ишован вӗренекенӗсем яланах тӗрлӗ конкурсра ҫӗнтереҫҫӗ. Хастар учитель хӑй вӑхӑтӗнче шкулта класс-музей уҫнӑ. Унта тӑван халӑхӑмӑр йӑли-йӗркипе палалшма пулать, ҫавӑнтах уроксем иртеҫҫӗ.
Чӑваш Ен Элтеперӗ черетлӗ йыша пысӑк шайри наградӑсемпе чыслама йышӑннӑ. Ҫав шутра медальпе ордена тивӗҫнисем те пур.
«Чӑваш Республики умӗнчи тава тивӗҫлӗ ӗҫсемшӗн» ордена «Ядринмолоко» обществӑн президенчӗ (должноҫӗ ҫапларах иккен) Николай Малов агропромышленноҫа аталантарнӑшӑн тата общество пурнӑҫӗнчи хастарлӑхшӑн тивӗҫнӗ.
«Чӑваш Республики умӗнчи тава тивӗҫлӗ ӗҫсемшӗн» орден медалӗпе те предприяти ертӳҫине чыслас тенӗ. Ку медале «Трактор завочӗсем» концернӑн генеральнӑй директорне Андрей Водопьянова промышленноҫа аталантарнӑшӑн пама йышӑннӑ.
-11.7 °C