Италири Вальдоббьядене хулин мэрӗ, 47 ҫулти Лучано Фрегонезе, кашни эрнерех ытлашши килограмсене ҫунтарас тӗллевпе хула ҫыннисемпе пӗрле уҫӑлса ҫӳрет. Кун пирки The Guardian пӗлтерет.

Ҫӗртме уйӑхӗнче Фрегнонезене виҫҫӗмӗш хут хула мэрӗ пулма суйланӑ, вӑл хӑйӗн сывлӑхне лайӑхлатма тӑрӑшӑп тесе шантарнӑ. Хула пуҫлӑхӗ каланӑ тӑрӑх, ҫак вырӑна йышӑннӑ вӑхӑтра вӑл 50 килограмм мӑнтӑрланнӑ, халӗ 140 таять.

Чиновник мӑнтӑрланса кайнине «халӑхпа пӗрле пулма юратнипе» тата вӑрах вӑхӑт хушши ӗҫлеме тивнипе ӑнлантарать. Мэр вырӑнне йышӑннӑ хыҫҫӑн унӑн спортпа аппаланма тата хусканусем тума вӑхӑт юлман имӗш. «Тепӗр йывӑрлӑх — эпӗ тутлӑ ӗҫсе ҫиме юрататӑп, кунта вара лайӑх ҫитереҫҫӗ, ӗҫтереҫҫӗ, ҫавӑнпа та диетӑна пӑхӑнма ҫав тери йывӑр», — йышӑнать мӑнтӑрлана кайнине Фрегонезе.

Мӑнтӑрланнине пула уншӑн утма та, сывлама та йывӑр пулса кайнӑ, ҫурӑмпа чӗркуҫҫи те ыратма пуҫланӑ. Хула стени ҫинчи граффити ӳкерни юлашки тумлам пулса тӑнӑ — тахӑшӗ хула пуҫлӑхне «мӑн хырӑм» тесе йӗкӗлтесе илнӗ, сӑнӳкерчӗкӗ вара халӑх тетелӗ тӑрӑх саланнӑ.

Ҫакӑн хыҫҫӑн вӑл 90 килограмм таран начарланма шантарнӑ — мэр вырӑнне пӗрремӗш хут йышӑннӑ чухне шӑпах ҫавӑн чухлӗ вӑл тайнӑ. Темиҫе эрне каялла Фрегонезе хула ҫыннисемпе пӗрле 5,5 километр тӑршшӗ уҫӑлса ҫӳреме тытӑннӑ. Пӗрремӗш хут тухсан 45 ҫын хутшӑннӑ, тепрехинче вара пӗрле уҫӑлса ҫӳреме 215 ҫын тухнӑ тата 12 йытӑ.

«Ҫынсем пӗрле утма тухни тӗллеве пурнӑҫлама пулӑшать, вӗсенчен 10% яхӑн ҫын май килнипе усӑ курса мана ыйту парать. Ытларахӑшӗ уҫӑлса ҫӳреме тата ыттисемпе хутшӑнма тухаҫҫӗ. Ҫакӑ мана питӗ хавхалантарать — пӗччен эп ҫӳремен пулӑттӑм, мӗншӗн тесен ку ытла та кичем, эпӗ хам вара ытлашши кахал», — тесе йышӑнать чиновник.

#тӗнчере, #Итали, #Вальдоббьядене, #спорт, #тӳре-шара