edu.vgsa.ru сӑнӳкерчӗкӗ

Федераци хыснинчен Чӑваш Ене укҫа килсе ҫитнӗ. Кун пирки республикӑн Финанс министерстви паян пӗлтернӗ.

Мускавран 1,3 миллиард тенкӗ килнӗ. Вӑл тупрана кӑшӑлвирус инфекцине пула илеймен тӑкаксене саплаштарма уйӑрнӑ. Асӑннӑ укҫаран 192,2 миллион тенкине муниципалитетсене уйӑрса парӗҫ.

Чӑваш Ен Финанс министерстви районсемпе хуласем кӑҫалхи пӗрремӗш ҫур ҫулта илнӗ тупӑша тишкернӗ те, хушма укҫана 19 муниципалитета пама йышӑннӑ. Уйрӑмах пысӑк сумма Шупашкар хулипе Етӗрне районне тивӗҫӗ.

Маларах каланӑ тӗллевпе кӑҫалхи кӑрлач-ака уйӑхӗсенче 13 муниципалитета 64,1 миллион тенкӗ уйӑрнӑ.

Ҫапла вара хӑйсен тупӑшӗ чакнине пула муниципалитетсене кӑҫал хыснаран 256,3 миллион тенкӗ хушма укҫа панӑ.

#Финанс министерстви, #пулӑшусем, #укҫа-тенкӗ, #Шупашкар, #Етӗрне районӗ