Наталия Соловьева

«Кӗмӗл сасӑ» фестивале 2000-мӗш ҫултанпа ирттереҫҫӗ. Ҫак кунсенче 17-мӗш 15–35 ҫулсенчи 35 юрӑҫ «Кӗмӗл сасӑ-2016» фестиваль-конкурса хутшӑнса хӑйсен пултарулӑхӗпе куракансене савӑнтарнӑ. Вӗсен шутӗнче: Иркутскпа Ямал-Ненец автономи округӗнчен, Екатеринбургран, Челепирен, Самартан, Ӗренпуртан, Тутарстанпа Пушкӑртстанран, Пензӑран, Мурманскран тата Чӗмпӗр тӑрӑхӗнчи 15 ҫамрӑк фестивале хутшӑнма кӑмӑл тунӑ. Гала концертра юрӑҫсене Чӑваш наци конгресӗн президенчӗ Николай Угаслов, ЧР культура министрӗн ҫумӗ Вячеслав Оринов, ЧНКн пӗрремӗш вице-президенчӗ Валерий Клементьев саламласа пурне те ӑнӑҫусем суннӑ.

Ҫӗнтерӳҫӗсен йышӗнче 5 юрӑҫ пулнӑ. Ыттисем те тӗрлӗ номинацире ҫӗнтернӗшӗн парнесем тивӗҫнӗ. «Кӗмӗл сасӑ» фестиваль ҫӗнтерӳҫин ятне Хӗрлӗ Чутай районӗнчи Штанаш ял тӑрӑхӗнчи Вӑрманкасси ялӗнче ҫуралса ӳснӗ, халӗ И.Я. Яковлев ячӗллӗ Чӑваш патшалӑх педагогика университечӗн музыкӑпа ӳнер факультечӗн 1-мӗш курс студентки Наталия Соловьева тивӗҫнӗ. Гран-при тивӗҫнӗ Наталияна планшет, Крыма кайма путевка тата тухъя парнеленӗ.

Наташа шкулта вӗреннӗ чухнех районта иртнӗ юрӑ конкурсӗсене хастар хутшӑннӑ. 2015 ҫулта иртнӗ «Чутай Нарспийӗ» конкурсра вӑл «Ҫепӗҫ Нарспи» номинацире палӑрнӑ, пӗлтӗрхи «Кӗмӗл сасӑ–2015» фестивале те хутшӑннӑ. Наталия юрӑҫ кӑна мар, ӳкерӳҫӗ те. Унӑн пӗр ӳкерчӗкӗ «Урхамахсем тӑраҫ тапӑртатса...»(2011) кӗнеке хуплашкине илемлетет. Фантастика конкурсӗсене хутшӑнса Наталия икӗ хутчен ҫӗнтерӳҫӗ ята тивӗҫнӗ. «Асамлӑх ҫулӗ» (2010) тата «Ҫӑлтӑрпа ҫуралнӑ ӗмӗт» (2013) кӗнекесенче вулакансем хӗрӗн хайлавӗсемпе паллашма пултараҫҫӗ.

#студентсем, #ЧНК, #ЧППУ, #Кӗмӗл сасӑ, #Вӑрманкасси, #фестивальсем, #Хӗрлӗ Чутай районӗ, #Штанаш ял тӑрӑхӗ, #культура