Тĕтре

Ӳкрĕ тайга çине шурă тĕтре...

Ӳкрĕ тайга çине шурă тĕтре:

Шурă тĕтре ăшăмра,

Ман ӳтре.

Кăтăш тавра.

Сас-чӳ çук,

Шăпăртах.

Шыв çеç — кушак,

Мăрлатать авăрта.

Ак катăркас тĕмисем хушшинче

Шăпчăк каçа шĕкĕлчерĕ темччен.

Шăпчăкăм-юрăç,

Юрла, кĕмĕл сас,

Сан сассуна яланах эп хавас.

Санăн сассу ас илтерчĕ мана

Эп хам çуралнă ялти çырмана.

Çав çырмари шапасен сассисем —

Сӳннĕ сив кĕл айĕнчи кăварсем.

Тĕтре вăл —

яланах тĕтре.

Ишме те çук ун чух,

Вĕçме те.

Ак халь умра эс,

пар ална,

Çапах... Курма та çук сана,

Тытма та...

Тен, хăв тĕтре эс?!