Электронлă вулавăш

Хăш чух, хăш-пĕр аллăрисем те эпĕр

шкул çулĕнчи пек яшсене те тимлĕн

хисеплеме те, — тӳррĕн каласан, —

пĕлсех каймастпăр, — пур-çке çав «хăр-хар»:

ăна-кăна кăштах эп куркаланă.

Ав именсе хăшĕ-пĕри пире

айван çеç сăввине «кăшт» кăтартасшăн, —

юрать, — тем мар: кăштах пулсан, «кăштах

пăхса илетпĕр» (юрĕ-ха, хăш чух

ăшри «мăрт-мартлăха» пит кăтартмастпăр).

Тата — хăш-пĕр яшшийĕн, вĕрискерĕн,

пулать кăшт йăнăшни те, — кăшт тăхтар,

«сăтăрçăна» хӳтернĕн, йĕрлер мар

(кун пеккине те эпĕр куркаланă), —

шанни те кирлĕ, кăшт кĕтни те — пăсмĕ.

Эс акă — аслă: пысăк ĕçӳпе,

тата — «тур панипе» те... Пул эс — аслă

кăшт — халăхри пек: акă çакă яшшăн

ӳсĕмӳпе — ун ашшĕ евĕр эсĕ,

çавна ас ил-ха... — Ав куçран пăхать вăл.

...Сăвва — «асаилӳ» тесе пуçларăм,

эппин, асаилӳпелех — вĕçлем.

Вунтăххăрта эп. Хусанкай ун чух

çитмен хĕрĕх çичче те... Эп каятăп

института, — сывпуллашмашкăн кĕтĕм,

час — пуйăс та... Калаçура сасартăк

йăл куллипе çиçет ак Петр Петрович:

«Чим, «йĕлтĕрçĕ», сан йĕлтĕрçĕ костюмĕ

пырать пек те, çаннийĕ авă шăтнă.

Хыв хăвăртрах. Наччас ăна саплатăп».

(Анне вĕрентейменччĕ сапламашкăн

çакна ялан пĕр хăй çеç тунипе.)

...Кайран автобуса çити ăсатрĕ

«ман Моцарт», — кăшт уксахлакан Поэтăм

(тăтăшрахах чирлетчĕ вăл ун чух):

— Ну, «йĕлтĕрçĕ», ларах эппин, вĕçтер,

çитсессĕнех кĕскен çырса пĕлтер.

(Шалтăртатать вакун... Пăхса ларатăп

чавса çинчи типтерлĕ саллăка:

«Реликвийĕм», — тесе пăшăлтататăп.)

...Шăп çавăн чух-ха, — хăш-пĕр «кайăксем»

«чăрсăртарах» улт-çич айван йĕркемшĕн,

вăрра йĕрленĕ пек, хыçран çӳретчĕç.

(Кăшт ырăпа канашлани-сунни

çителĕклĕ те пулнă тетĕп халь.)

Анчах сăвва вĕçлем ӳпкев таврашсăр:

тав сăмахне — çапах — сивĕтем мар.

Ыттисене калас тени те пултăр

малтан (кирек ниме пăхмасăр) — хамшăн,

«ответлăх» тенине малтан эп хăм

(ăшра «аттелĕх» туртăмĕ тесе)

кăшт каярах пулин те, — вĕренем:

пил пек туйса — ăша пил пек хывам.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн