Асаилӳ

Николай Теветкел | Сăвă | 1 691


1

Çилсем кĕрлетчĕç хырлăхра,

çилсем хирте шавлатчĕç.

Сана эп кĕтнĕ вăхăтра

сар чечексем ялтратчĕç.

Сӳнетчĕç çулăм тĕслисем

чун ăшшипе пăхманшăн.

Сивлек çанталăк кĕслисем

йĕретчĕç çил-тăманшăн.

Кĕр шавĕнче, кĕр сиввинче

ӳсен чечек, шанмасăр,

кайран çиçетчĕ юр çинче

хăй шăпине пăхмасăр...

Ыр сăмахху, хитре куллу —

ман шухăшсен шыравĕ.

Ăçта çӳрет-ши Тĕлпулу?

Аçта ачашлăп, савăп?

Çак Тĕлпулу тăванлăхне

эп сăвăра шыранă,

вара кунçулăн анлăхне

çавраçилле васканă.

Анчах кунçулăмшăн сăну

каллех тĕтреллĕ чăтлăх...

Эп — çавраçил, эп— сан хăну,

санра шыратăп шăплăх.

 

2

Эп пĕччен тăраттăм шăппăн,

каç сĕмне сыхлатчĕ шăплăх,

шăплăхра ӳсетчĕ тунсăх,

тунсăхпа çунатчĕ чунăм, —

эп пĕччен тăраттăм шăппăн

пысăк уйăх çутинче, —

палăк пек тăраттăм чĕмсĕр...

Уйăхран пĕр вĕçĕм, сассăр,

çĕр çине сапаланса,

çутă-çутă çумăр çунăн,

тăкăнатчĕç ярăм-ярăм

шурă кĕмĕл шăрçасем...

Çавăнпа та сивĕ çутă,

сивĕ çутă, витĕр çутă

шурă-шурă пӳлĕмри пек

чĕтресе, çиçсе тăратчĕ...

Çакă «пӳлĕм» варринче

палăк пек тăраттăм шăппăн —

ман хура мĕлкем çиие çеç

ӳкейместчĕ пĕр шăрçа та,

куçсене йăмăхтарса.

Такам ăшшăн йышăнман пек,

эп хама туяттăм юттăн —

варкăшса тăран шап-шурă

пир çине, темле, сасартăк,

тĕксĕм пăнчă лекнĕ евĕр

ютшăнса тăраттăм юттăн,

хам мĕлкем çулнв сăнаттăм...

Эп пĕччен тăраттăм шăппăн,

тем çухатнă пек сăнаттăм

уйăхăн шăрçисене те,

хам мĕлкен хура сăнне те —

çыхăнулăх тупаймасăр...

Уйăхăн шăрçисенчен

мăйçыххи тăватчĕ йывăç.

Хăй çине тиретчĕ курăк:

пурпĕр темшĕн пĕшкĕнместĕм

шăрçасем илес тесе эп —

ман алла вĕсем лекместчĕç:

маншăв марччĕ çав вĕсем!

Маншăн марччĕ — сан пекех!

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: