Электронлă вулавăш

Эп астăватăп, тусăм: уява

Аçу-аннӳ патне тăван ялна

Пĕрре эс илсе кайнăччĕ мана.

Пит ăшшăн кĕтсе илнĕччĕ пире.

Çитейрĕмĕр: чăваш йăлипеле

Мунча кĕретпĕр çĕн милĕкпеле.

Лапка çинчен анатпăр та, лаçра

Витре тулли кăпăкланать сăра,

Епле ăш канмĕ — вăл пыл пек çăра.

Унтан — тӳрех ачалăх кӳллине:

Вылятпăр вĕтĕр-шакăрпа пĕрле

Ахăлтатса пĕр ăстрăм мечĕкле.

Унтан эпир — тулли кĕрекере:

Сĕтел çинче çĕр тĕрлĕ пуль апат,

Аçу-аннӳ сăпай та тарават.

Каярахпа — яш-кĕрĕм вăййинче

Чипер-çке чун çунтармăш хĕрĕсем,

Анчах та пирĕн валли мар вĕсем...

Ташлать, юрлать яш-кĕрĕм, савăнать.

Эпир санпа çӳретпĕр темĕнччен

Куçа илмесĕр икĕ хĕр çинчен...

...Каллех ав, тусăм, çывхарать уяв.

Кайса курар-и пирĕн еннелле,

Тепре тухса выляр-и мечĕкле?..