Валерий Муравьев

Валерий Муравьев (Валериан Венедиктович Муравьев) Чăваш Республикинчи Етĕрне районне кĕрекен Палтай ялĕнче 1946 çулхи авăн уйăхĕн 1-мĕшĕнче çуралнă.

1963 çулта Палтайри вăтам шкултан ăнăçлă вĕренсе тухнă. Çав çулах вăл ĕç биографине тăван шкулĕнчех пуçланă — химипе физика кабинечĕсен лаборанчĕ пулса ĕçлеме тытăннă. Тĕрлĕ çулта нумай ĕçре вăй хунă: библиотекарь, пионервожатăй, физкультура учителĕ, сысна ĕрчетекен комплекс пуçлăхĕ, район хаçачĕн редакцийĕнче корреслондент, пай редакторĕ. 2004 çулхи кăрлачран — Палтайри библиотека заведующийĕ.

Пĕрремĕш сăвви 1965 çулта кун çути курнă. Унтанпа В.Муравьев хаçат-журналта, коллективлă сборниксенче, уйрăм кĕнекен чылай сăвă, поэма, очерк, калав, повесть, роман пичетлесе кăларнă. Вĕсенчен паллăраххисем: «Урташ йĕрĕпе» (сăвăлла очерк, 2002), «Каяр пуль, хĕрĕм» (поэма, 1990), «Палтайпа Айтак» (сăвăлла роман-халап, 2004, 2006), «Ырăпа усал» (поэма, 2003) тата ыт. те. Валерий Муравьев 1990 çултанпа Раççей журналисчĕсен союзĕн членĕ.