Красноармейски район администрацине урӑх ҫын ертсе пыма пуҫланӑ. Ку пукана Павел Юрьевич Семенов йышӑннӑ. Ҫӗртме уйӑхӗн 1-мӗшӗнче депутсем пухура унӑн кандидатурине пӗр саслӑн пулса ырланӑ.
Павел Семенов - 34 ҫулта. Унччен вӑл Канаш районӗнчи Сухайкасси ял тӑрӑхӗн администрацийӗн пуҫлӑхӗ пулнӑ. Ку должноҫе вӑл 27 ҫулта йышӑннӑ. Вӑл ӗҫленӗ ҫулсенче ял тӑрӑхӗ Пӗтӗм Раҫҫейри "Чи лайӑх муниципалитет практики" конкурсра малтисен йышне кӗнӗ.
Палӑртмалла: Красноармейски район администрацийӗн пуҫлӑхӗ унччен Борис Клементьев пулнӑ. Вӑл кӑҫал ака уйӑхӗнче ӗҫрен хӑйӗн ирӗкӗпе кайнӑ.
Паян Шупашкар хула пухӑвӗн депутачӗсен ларӑвӗ иртнӗ. Унта хула администрацине реорганизацилес ыйтӑва пӑхса тухнӑ.
Ҫапла хула администрацийӗ ҫумне Калинин, Мускав, Ленин районӗсен администрацийӗсене, Атӑл леш енчи территори управленине, хула пурӑхӗн комитетне пӗрлештерме йышӑннӑ.
Депутатсем пурте тенӗ пекех, тӑваттӑшӗсӗр пуҫне, килӗшсе сасӑланӑ.
Тӗнче тетелӗнче Петр Краснов депутат "Хыпар" Издательство ҫуртне тапӑннине хӗрӳ сӳтсе яваҫҫӗ. Ку ӑнланманлӑх тахҫанах сиксе тухнӑ-мӗн, "Хыпар" ертӳлӗхӗ ӑна обществӑна кӑларман кӑна.
"Эпир, "хыпарҫӑсем", ку ыйтӑва обществӑна кӑларасшӑн марччӗ. Анчах депутат унччен, 3 ҫул, ҫыру ҫырса ӑнлантарма, тӗрӗслевсем пуҫарма ыйтнӑ пулсан халӗ ҫынсен умӗнче республика прокуратурине "Хыпар" тӗлӗшпе пуҫиле ӗҫсем пуҫарма ыйтни патне ҫитрӗ", - ҫапла ҫырнӑ Издательство ҫурчӗ Телеграмра тытса пыракан "Хыпар - Вести Чувашии" каналта. Ҫине-ҫине тӗрӗслевсем пулни кулленхи ӗҫе йӗркелесе пыма чӑрмантарнине палӑртнӑ унта.
Нумаях пулмасть Патшалӑх Канашӗн сессийӗнче Петр Краснов депутат каллех (вӑл кашни сессирех "Хыпар" пирки япӑх калаҫать-мӗн) трибуна умне тухса хаҫата "ислетнӗ", прокуратурӑна 6 пуҫиле ӗҫ пуҫарма ыйтнӑ. Кунсӑр пуҫне пӗтӗм депутат умӗнче вӑл Издательство ҫурчӗн директорӗ-тӗп редакторӗ Татьяна Вашуркина пирки каланӑ чухне ӑна "эта дамочка" тенӗ. Ҫак видеопа ку хыпара илнӗ ҫӑлкуҫра паллашма пулать.
РФ Патшалӑх Думинче ака уйӑхӗн 17-мӗшӗнче «Человек, определивший время» ятлӑ курав уҫӑлнӑ. Ӑна чӑваш патриархӗ Иван Яковлев ҫуралнӑранпа 175 ҫул ҫитнине халалланӑ.
Чӑваш Енӗн Вӗренӳ тата ҫамрӑксен политикин министерствин сайтӗнче хыпрланӑ тӑрӑх, экспозицире Иван Яковлевӑн ҫемье альбомӗнчи сӑнӳкерчӗксем, алҫырусем, ӗҫсен копийӗсем вырӑн тупнӑ. Иван Яковлевӑн вӗренекенӗсемпе унӑн пархатарлӑ ӗҫне тӑсакансене уйрӑм ярӑм халалланӑ.
Иван Яковлева халланӑ курава уҫма РФ Патшалӑх Думин Председателӗн пӗрремӗш ҫумӗ А.Д. Жуков, Председателӗн ҫумӗ Б.А. Чернышов, парламент фракцийӗсен ертӳҫисем С.М. Миронов тата Г.А. Зюганов тата ыттисем хутшӑннӑ.
«Новые люди» (чӑв. Ҫӗнӗ ҫынсем) фракци РФ Патшаӑх Думине ҫу уйӑхӗн пуҫламӑшӗнче канассипе ҫыхӑннӑ саккун проектне сӗннӗ. Асӑннӑ парти хастарӗсем кӑрлач уйӑхӗнчи вӑрӑм канмалли кунсен шутне чакарса ҫу уйӑхӗн 1-9-мӗшӗсенче ытларах кантарасшӑн.
Асӑннӑ фракци кӑрач уйӑхӗн 1-3-мӗшӗсенче тата 7-мӗшӗсенче ҫеҫ канмалла, ун вырӑнне ҫу уйӑхӗн пуҫламӑшӗнче ытларах канма май пултӑр тесе шухӑшлать.
Саккун проектне ытти депутат ырласан ака уйӑхӗн 29-мӗшӗнчен пуҫӑнса ҫу уйӑхӗн 9-мӗшӗ таранах ӗҫлеттермӗҫ.
Ыран иртекен Патшалӑх Канашӗн сессийӗнче самакун сутакансене ҫирӗпрех явап тыттарас ыйтӑва пӑхса тухӗҫ. Ӑнлантару ҫырӑвӗнче палӑртнӑ тӑрӑх, РФ КоАПӗн 14.17.1-мӗш статйи алкоголь тата спирт пур апат-ҫимӗҫ продукцине кӑна пырса тивет. Ку статьяна пӑссан 30-50 пин тенкӗ штраф тӳлеттереҫҫӗ. Анчах штраф хурас тесен 30 пин тенке яхӑн тӑракан экспертиза тумалла.
Хальхи вӑхӑтра сӑмакун сутнӑшӑн 15-2 пин тенкӗ штраф тӳлеттереҫҫӗ. Депутасем вара спиртлӑ апат-ҫимӗҫшӗн кӑна мар, сӑмакун сутнӑшӑн та РФ КоАПӗн 14.17.1-мӗш статйипе килӗшӳллӗн штраф тӳлеттермелле тӑвасшӑн.
Шупашкарти Ашмарин урамӗнче вырнаҫнӑ офтальмологи пульницин тӗп тухтӑрӗ Дмитрий Арсютов куҫ микрохирургине ертсе пыма пуҫланӑ. Ку хушӑва РФ Сывлӑх сыхлавӗн министерстви кӑларнӑ.
Дмитрий Арсютов Республикӑри клиника офтальмологи пульницине 13 ҫул ертсе пынӑ. 2000-2002 ҫулсенче вӑл Куҫ микрохирургинче тухтӑр-интерн пулнӑ, кайран унта хирург-офтальмологра ӗҫленӗ.
Ашмарин урамӗнчи Республикӑри клиника офтальмологи пульницине вӑл 2010 ҫултанпа ертсе пынӑ. Хальхи вӑхӑтра вӑл – ЧР Патшалӑх Канашӗн депутачӗ.
2020 ҫулхи раштав уйӑхӗнче ЛДПР депутачӗсем раштавӑн 31-мӗшне канмалли кун тесе йышӑнма сӗннӗ. Вӗсем ӑнлантарнӑ тӑрӑх, ун чухне нумайӑшӗ отгул илет. Кун тӗлӗшпе мӗнле йышӑну пуласси паллӑ.
Раҫҫей Министрсен Кабинечӗ ку сӗнӗве ытлашши тесе хакланӑ, ЛДПР депутачӗсен шухӑшӗпе килӗшмен. Вӗсем ӑнлантарнӑ тӑрӑх, кирлӗ тӗк ытти канмалли куна раштавӑн 31-мӗшӗ ҫине куҫарма пулать. Ҫакна тума саккун чармасть.
Паянтан Вӑрмар районӗн администрацине Василий Шигильдеев ертсе пырӗ. Унччен ку должноҫре Дмитрий Иванов ӗҫленӗ.
Василий Викторович 1966 ҫулта ҫуралнӑ, Мускавра ФСБ Академине пӗтернӗ. Хальхи вӑхӑтра «НПП «Каскад-ГРУП» тӗп директорӗнче вӑй хурать. Хӑй Чупай ялӗнче пурӑнать. Унччен ҫак ял тӑрӑхӗн депутачӗ пулнӑ.
Аса илтерер: Дмитрий Иванов администрацие 2020 ҫулхи ҫурлан 21-мӗшӗнченпе ертсе пынӑ.
2023 ҫулхи кӑрлачӑн 1-мӗшӗнчен Чӑваш Енри пӗтӗм район муниципалитет округӗ пулӗ. Ҫапла йышӑннӑ ЧР Министрсен Кабинечӗн кӑҫалхи юлашки ларӑвӗнче.
Хальччен республикӑра 5 хула округӗ тата 21 муниципалитет районӗ пулнӑ. Ҫак статуса чи малтан йышӑннисем – Красноармейски тата Ҫӗмӗрле районӗсем. Кӑрлачӑн 1-мӗшӗнчен ытти 19 район муниципалитет округӗ пулӗ.
Мӗн улшӑнӗ? Ял тӑрӑхӗсенче депутат корпусӗ пулмасть, муниципалитет округӗн шайӗнчисем кӑна юлаҫҫӗ.
Тӳре-шара ӑнлантарнӑ тӑрӑх, кун пек улшӑнӑвӑн лайӑх енӗ кӑна: укҫа-тенкӗ пӗр алӑра пулӗ, ыйтусем хӑвӑртрах татӑлӗҫ. Ҫапла майпа халӑх пурнӑҫӗн пахалӑхӗ те лайӑхланӗ.
+12.5 °C