«Чӑваш Ен» фирма пуйӑсӗнче ларса ҫӳремелли вырӑнсем те пулӗҫ. Вӗсене 1500 тенкӗпе туянма май килӗ.

Ака уйӑхӗн вӗҫӗнче «Чӑваш Ен» фирма пуйӑсӗн йышне ларса ҫӳремелли пӗр вакун кӗртӗҫ. Билет хакӗ — 1491 тенкӗрен пуҫласа. Ҫӗнӗ йышши состав Мускавран ака уйӑхӗн 27-мӗшӗнче килӗ, Шупашкартан ака уйӑхӗн 28-мӗшӗнче кайӗ. Вакунта 60 вырӑн пӑхса хӑварнӑ, унсӑр пуҫне — икӗ туалет тата проводница валли купе. Вӗри шывпа тӳлевсӗр уҫа курма та май пур.

Ларса каймалли вырӑнсене хальхи вӑхӑтра ҫу уйӑхӗн 13-14-мӗшӗчченхи кунсем валли туянма пулать.

071/072-мӗш номерлӗ хушма пуйӑса ҫу уйӑхӗн 8-мӗшӗнчен икӗ хутлӑ купе вакунӗсемпе ылмаштарӗҫ.

Ӗнер Чӑваш Ен Элтеперӗ Олег Николаев Н.И. Турнер ячӗллӗ ача-пӑча травматологийӗпе ортопеди наци медицина тӗпчев центрӗн директорӗпе Сергей Виссарионовпа тӗл пулнӑ.

Асӑннӑ тӗпчев центрӗ ҫурӑм шӑмми пӑсӑлнипе ҫуралакансене пулӑшать. Чӑваш Ен медцентрӑн ҫӗнӗлӗхӗсене пурнӑҫлассипе никӗс регион евӗр ӗҫлӗ.

«Технологи центрӗн специалисчӗсем хатӗрленӗ технологи пекки тӗнчере те ҫук. Вӑл ҫурӑм шӑмми авӑннине сӑнаса пыма май парать. Кирлӗ пулсан ҫийӗнчехх операци тума май парать», – тенӗ Сергей Виссарионов.

Г.И. Турнер ячӗллӗ центр Федерацин травматологи, ортопеди тата эндопротезировани центрӗпе килӗштерсе ӗҫлесшӗн. Унти специалистсем пысӑк пӗлӳллӗ.

Пурнӑҫ кашни утӑмра тенӗ пек хут ҫырнинчен тата ҫавна электрон ҫӑлкуҫсене куҫарнинчен тӑракан пулса кайрӗ. Ҫакӑ пур отрасльте те сисӗнет. Маларах васкавлӑ пулшура ӗҫлекенсене планшетсем валеҫсе тухрӗҫ. Халӗ ӑна терапевтсемпе пӗтӗмӗшле практика врачӗсене те парӗҫ. Ку хатӗр ҫулталӑк вӗҫлениччен 846 ҫын валли туянӗҫ.

Сывлӑх сыхлав министерствинче планшетсем тухтӑрсене чирлисем патне киле кайсан кирлӗ тесе шухӑшлаҫҫӗ. Мобильлӗ приложени пулӑшниме шурӑ халатлисем электрон медицина карттине пӑхайӗҫ,больница хутне тата ҫӑмӑллӑхлӑ рецепта ҫырса парайӗҫ.

Кирлӗ пулсантухтӑрсемпланшет урлӑ телемедицина консультацийӗ илейӗҫ.

Чӑваш Енри пульницӑсенче «ӑслӑ» йышӑну уйрӑмӗсем йӗркелесшӗн. Ҫак ыйтӑва паян ЧР Элтеперӗн тивҫӗсене вӑхӑтлӑх пурнӑҫлакан Олег Николаев «Защита» (чӑв. Хӳтлӗх) катастрофӑсен медицинин пӗтӗм Раҫҫейри медицина центрӗ пуҫлӑхӗпе Сергей Гончаровпа тата И.П. Павлов академик ячӗллӗ Санкт-Петербургри Патшалӑх медицина университечӗн ректорӗпе Сергей Багненкопа тӗл пулсан сӳтсе явнӑ.

Енсем васкавлӑ медицина пулӑшӑвне аталантарассипе ҫыхӑннӑ тӗрлӗ ыйтӑва, ӗҫ тухӑҫлӑхне ӳстерес, инкек тӳснисене тата чирлисене туххӑмрах сипленме майсем туса парас ыйтусене тишкернӗ.

Васкавлӑ пулӑшу парассипе Чӑваш Ен Раҫҫейри регионсен хушшинче виҫҫӗмӗш вырӑн йышӑнать. «Лӑпланса лармалла мар. Малалла та тӑрӑшса ӗҫлемелле», — тенӗ Олег Николаев.

wikimapia.org сӑнӳкерчӗкӗ

Вокзалсенче тӳлевлӗ туалетсем пулнине хӑнӑхса ҫитрӗмӗр пулӗ ӗнтӗ. Чукун ҫул вокзалӗсенче те ҫавнашкалах. Унти туалета тӳлевсӗр кӗрес тесен ҫула кайма туяннӑ билета кӑтартмалла. Ҫывӑх вӑхӑтра ҫак йӗрке манӑҫа тухӗ. Раҫҫейӗн чукун ҫул вокзалӗсен дирекцийӗ чукун ҫул вокзалӗсенчи туалетсене 2020 ҫулхи кӑрлачӑн 1-мӗшӗ хыҫҫӑн тӳлевсӗр ӗҫлеттерме йышӑннӑ.

Санитари пӳлӗмӗсене укҫа тӳлемесӗр кӗрсе тухма пур пассажирӑн та ирӗк пулӗ. Раҫҫейӗн чукун ҫул вокзалӗсен дирекцийӗ санузелсене урӑх хуҫасене тара панӑ пулсан ҫеҫ тӳлеме тивӗ.

Паян Раҫҫейре инҫе ҫула каймалли 344 чукун ҫул вокзалӗ ӗҫлет.

Вӗсенчи тӳлевсӗр туалетсемпе ҫӑмӑллӑхлӑ категорири граждансем тата ҫитес виҫ сехетре пуйӑспа каймаллисем е пӗр сехетрен кая мар пуйӑсран аннисем усӑ курма пултараҫҫӗ.

Чӑваш Енре малашне пластик СНИЛС памӗҫ. Ун вырӑнне электронлӑ е хутлӑ уведомлени пулӗ.

Ку ҫӗнӗлӗх юпа уйӑхӗн 1-мӗшӗнчен вӑя кӗнӗ. Малашне анкета даннӑйӗсем улшӑнаҫҫӗ пулсан, унчченхи «пластика» ҫухатнӑ тӑк регистраци туни пирки уведомлени кӑна парӗҫ.

Уведомленире пластик СНИЛСри даннӑйсемех: харпӑр счетӑн страхлав номерӗ, хушамат, ят, ашшӗн ячӗ, хӑҫан ҫурални, регистраци хӑҫан туни, арҫын е хӗрарӑм пулнине кӑтартни.

Хаклӑ тимӗрсене туянни усӑллӑ. Укҫана хывма пулать сахалтан та виҫӗ мелпе. Кашнин лайӑх енӗ тата тӳнтерлӗхӗ пур.

Укҫана ылтӑна е кӗмӗле хывни усӑллӑ-и? Ҫакна тишкернӗ Aif.ru.

Ылтӑн, кӗмӗл, паллади тата платина катӑкне туянни парать тупӑш. Халӗ уншӑн хушма хакран илекен налук тӳлемелле. Металӑн номинал хакӗн 20 процентне. 2020-мӗш ҫулхи кӑрлачӑн 1-мӗшӗнчен пӗтерӗҫ вӑл налука. Хаклӑ тимӗре харпӑрлӑхра 3 ҫултан сахалрах тытсан тӳлӗн налук. Сутса тупӑш илнин 13 проценчӗ чухлӗ. 3 ҫултан ытла тытсан налук тӳлеттермӗҫ.

Хаклӑ тимӗртен тунӑ укҫана сутнӑ чух та 3 ҫул харпӑрлӑхра пулмалла. Ахальлӗн тӳлӗн налук.

Тепӗр мел пур. Ятне палӑртман счет туянма пулать. Ӑна танлаштараҫҫӗ валюта депозичӗпе. Вкладсемпе танлаштарсан вӗсене страхламаҫҫӗ.

Электронлӑ сӑмахсарсен сайчӗ ҫӗнӗ словарьпе пуянланчӗ — ку хутӗнче В.Г. Егоров хатӗрленӗ Чӑваш чӗлхин этимологи словарӗ хушӑнчӗ. Ҫапла май халь ҫак сайт 13 словарӗн электронлӑ варианчӗпе паллаштарайрать. Вӑл шутра Н.И. Ашмаринӑн «Чӑваш сӑмахӗсен кӗнеки» те пур.

Сӑмахсар 1964 ҫулта Чӑваш кӗнеке издательствинче тухнӑ. М.Р. Федотовӑн этимологи словарӗпе чӑваш чӗлхинчи сӑмахсем мӗнле пулса кайнине тата пирӗн чӗлхене ӑҫтан лекнине ӑнлантарса парать. Хӑй вӑхӑтӗнче вӑл 2000 экземплярпа пичетленсе тухнӑ. 356 страницӑллӑ кӗнекере пурӗ 2 298 ытла сӑмах тишкерӗвӗ шутланать.

Словаре электронлатма пулӑшаканӗ — Алина Иванова. Сайта кӗртекенӗ — Николай (Аҫтахар) Плотников.

Электронлӑ сӑмахсарсен сайчӗ ҫывӑх вӑхӑтра тата та пуянланмалла. Черетре Н.И. Ашмаринӑн 3-мӗш тата 5-мӗш томӗсем тӑраҫҫӗ.

Кӑҫалтан пирӗн ҫӗршывра пуйӑс валли илнӗ билетсене каялла йышӑнмӗҫ. Ун пек йӗркене 2018 ҫулхи ака уйӑхӗн 18-мӗшӗнче йышӑннӑ федераци саккунӗнче пӑхса хӑварнӑ. Ҫав ӗҫлӗ хутра палӑртнӑ тӑрӑх, «Раҫҫей Федерацийӗнчи чукун ҫул транспорчӗн уставӗ» саккунӑн 83-мӗш статйине улшӑну кӗртнӗ.

Тавӑрса памалла мар билетсем ахальлисенчен йӳнӗрех тӑраҫҫӗ. Анчах ӑна купе, ларса пымалли вакунсем, люкс тата СВ вакунсем валли ҫеҫ сутаҫҫӗ.

Шута илме тивӗҫ сӑлтав пулсан билета ҫапах та пассажир тавӑрса парайӗ. Кун пек сӑлтав тӑваттӑ. Пӗрремӗшӗнчен, пассажир ӑнсӑртран чирлесе ӳксен. Иккӗмӗшӗ — пассажирӑн ҫемьенчи ҫынсенчен кам та пулин вилсен. Виҫҫӗмӗшӗ — пассажир амансан-суранлансан. Тӑваттӑмӗшӗ — пуйӑс ҫула тухмасан.

Чӑваш Енре пурӑнакансем, ҫав шутра ял ҫыннисем те, йӑлари хытӑ каясшӑн малашне укҫа тӳлеме пуҫлӗҫ. Пӗр ҫын пуҫне 75 тенке яхӑн кӑларса хума тытӑнӑпӑр. Хулари е район центрӗсенчи хваттерсенче тӗпленнисем унччен те тӳленӗ-ха. Анчах ҫын пуҫне мар. Хваттер лаптӑкне кура.

Чӑваш Енӗн строительство министрӗ пулнӑ Владимир Михайлова ӗнер ӗҫрен хӑтарнине йӑлари хытӑ каяшсене турттарас енӗпе ҫыхӑннӑ ыйтусем республикӑра татӑлса пӗтменнипе сӑлтавлакансем те пур. Чӑваш парламенчӗн депутачӗ, «Тӗрӗслӗхшӗн Раҫҫей» партин пайташӗ Игорь Моляков каяша турттарасси ҫинчен ял ҫыннисемпе килӗшӳ туманнине палӑртнине «Правда ПФО» тӗнче тетелӗнчи хаҫат хыпарланинче тӗрӗсси пурах. Шупашкар районӗнчи Янӑш ял тӑрӑхӗнче, сӑмахран, йӑлари хытӑ каяша турттарма пуҫланӑ. Вӑл тӑрӑхрисем каланӑ тӑрӑх, юпа уйӑхӗнче икӗ хутчен тиесе кайнӑ. Анчах килӗшӗве чылайӑшӗ алӑ пусман. Тӗрӗсрех каласан, алӑ пусма сӗнмен. Хӑшӗсем шухӑшланӑ тӑрӑх, килсерен 75 тенке яхӑн тӳлемелле. Апла пулсан ку ыйтӑва вырӑнсенче уҫӑмлатса пӗтерменни, чӑн та, сисӗнет.