Шупашкарти ватӑсем Республика кунӗпе хавхаланса республика гимнне шарантарнӑ.
Хулари халӑхӑн социаллӑ ыйтӑвӗсене тивӗстрекен комплекслӑ центрти стационарта пурӑнакан ватӑсем валли паян викторина ирттернӗ, республика кун-ҫулӗпе паллаштаракан документлӑ фильм кӑтартнӑ.
Викторинӑна ирттерекен Наталья Фадеева каласа кӑтартнӑ тӑрӑх, ватӑсем викторина ыйтӑвӗсене кӑсӑкланса хуравланӑ. Гимна юрлама ҫӑмӑлах пулман пулин те пурте тӑрӑшса шарантарнӑ.
Шупашкарта пурӑнакан ватӑсем пенсие тухса ҫӗнӗ ӑсталаха та ним мар алла илме пултараҫҫӗ. Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта вӗсене ҫӗвӗҫ пулма та хӑнӑхтараҫҫӗ.
«Манӑн социаллӑ центр» клубра пырса ҫӳрекен 68 ҫулти Татьяна Панфилова хӑйне валли халат ҫӗлесе тӑхӑннӑ. Ку ӑсталӑха ӑна центрти ӗҫ инструкторӗ Ирина Ковеза хӑнӑхтарнӑ.
Татьяна Викторовна каласа кӑтартнӑ тӑрӑх, унччен ҫӗвӗ ӗҫӗпе аппаланса курман. «Хӑрамасан тата юнашар ылтӑн алӑлла ӑста пулсан тем те вӗренме пулать иккен», - хавхаланса каласа кӑтартнӑ ҫитмӗл ҫула ҫывхарса пыракан хӗрарӑм.
Йӗпреҫ районӗнчи Хурамал ялӗнчи пӗвере 78 ҫулти арҫын путса вилнӗ. Унӑн виллине паян ирпе тупнӑ. Малтанласа палӑртнӑ тӑрӑх, инкек шыв хӗрринче асӑрханусӑр пулнипе ҫыхӑннӑ.
Чӑваш Енӗн Инкеклӗ ӗҫсен министерствинче пӗлтернӗ тӑрӑх, ҫак кунсенче кӑна 4 ҫын путса вилнӗ. Ҫу уйӑхӗн 29-мӗшӗнче Ҫӗнӗ Шупашкарти 49 ҫулти арҫын шыва кӗме тӑни инкекпе вӗҫленнӗ. Ҫу уйӑхӗн 30-мӗшӗнче Канаш районӗнчи ялта 17-ри яш пӗвене путса вилнӗ. Ҫӗртме уйӑхӗн 1-мӗшӗнче Сӑр юханшывӗнче 12-ри хӗрача пурнӑҫӗ татӑлнӑ. Ҫӗртме уйӑхӗн 10-мӗшӗнче Ҫӗрпӳ районӗнче плотинӑра шыва кӗме тӑнӑ 72-ри кинемей путнӑ.
«Старость в радость» (чӑв. Ватлӑх савӑнма) ыркӑмӑллӑх фончӗ Чӑваш Енри пӗчӗк тупӑшлӑ пӗччен пурӑнакан ватӑсемпе сусӑрсене хальхинче апат-ҫимӗҫ туянма электрон сертификатсем уйӑрса панӑ. Кашнине — 5-шер пин тенкӗлӗх. Шупашкарта ун пек пулӑшупа 68 ҫын усӑ курӗ.
Сертификатпа тавара «Пятерочка» лавккасенче туянма юрать. Анчах эрех-сӑра, пирус туянмалла мар, куллен кирлӗ апат-ҫимӗҫ илмелле. Фонд сӗннине шута илсе. Лавккана ҫитме пултаракан ватӑсем хӑйсем кайса илеҫҫӗ, каяйманнисене социаллӑ центр ӗҫченӗсем туянса килне леҫсе параҫҫӗ.
«Тӗлӗнмелле савӑнтӑм. Кун чухлӗ апат-ҫимӗҫ хӑҫанччен ҫитӗ», — савӑнса тав тунӑ Шупашкарта пурӑнакан Елена Орлова иккӗмӗш ушкӑнри сусӑр.
Шупашкарти халӑхӑн социаллӑ ыйтӑвӗсене тивӗҫтерекен комплексла центрен ӗҫчӗнӗсем тӗрлӗ хулара иртекен семинарсене час-часах хутшӑнаҫҫӗ. Унта учреждени директорӗ те, специалсичӗсем те кайса пӗлӗве анлӑлатаҫҫӗ.
Хальхинче ватӑ ҫынсене вӑрах вӑхӑт пӑхакан уйрӑмсен заведующийӗсем Надежда Шикарева тата Надежда Мастерова Санкт-Петербругра вӗренеҫҫӗ. Ватӑ ҫынсене тӗрӗс пӑхма вӗсем Санкт-Петербургри медицинӑпа социаллӑ институтра 4 кун вӗренеҫҫӗ. с
Ӗнер, ҫӗртме уйӑхӗн 17-мӗшӗнче, Шупашкар хулинчи ватӑсем пӗрле пуҫтарӑнса Йошкар-Олана кайнӑ. Ватӑсене пӗрле пухаканни — халӑхӑн социаллӑ ыйтӑвӗсене тивӗҫтерекен комплекслӑ центр. Унта «Социаллӑ туризм» проект пурнӑҫа кӗнӗ май ватӑсене хамӑр республика тӑрӑх илсе ҫӳреҫҫӗ ҫеҫ мар, кӳршӗллӗ регионсене те илсе кайса кӑтартаҫҫӗ.
Учрежденире ӗҫлекен Валентина Ильина специалист пӗлтернӗ тӑрӑх, ватӑсене Мари Эл тӗп хули питех те килӗшнӗ. «Экскурссовод пулӑшнипе эпир кӳршӗллӗ республикӑмӑрӑн историйӗпе паллашарӑмӑр, Йошкар Ола тӑрӑх киленсе те савӑнса ҫӳрерӗмӗр», — каласа кӑтартнӑ вӑл центрӑн пресс-службине.
Шупашкарта пурӑнакан Нина Алексеева паян 100 ҫул тултарнӑ. Етерне хулинче ҫуралнӑскер тӑван хулинчи ватам шкултан 1944 ҫулта вӗренсе тухсан вырӑнти педагогика училищине веренме кӗнӗ. Унтан нимӗҫ чӗлхипе математика учителӗнче ӗҫленӗ, каярах вара — Шупашкарти электроаппаратура заводӗнче.
Нина Васильевнӑн чунне савӑнтараканни - икӗ ачи, икӗ мӑнукӗ тата мӑнукӗсен виҫӗ ачи. Паян кинемей Людмила хӗрӗпе пӗрле пурӑнать.
Патшалӑхӑн ҫул-йӗр хӑрушсӑрлӑхӗн инспекторӗсем кинемее килне леҫсе хӑварнӑ.
«Шупашкар-Сурски» ҫул ҫинче Патшалӑхӑн автоинспекцийӗн ҫул-йӗр патрулӗн уйрӑм батальонӗн ӗҫченӗсем ҫул айккипе пыракан ҫынна асӑрханӑ. Ват хӗрарӑм йывар сумкӑпа утса пынӑ. Инспектрсене вӑл ӑнлантарса панӑ тӑрӑх, автобусран тӑрса юлнӑ та килне ҫуран утса ҫитме шухӑшланӑ.
Артём Яковлев тата Сергей Савин инспекторсем ӑна килне ҫитерсе янӑ, каҫхине ҫул айккипе ятарла тумсӑр утма юраманни пирки асӑрхаттарнӑ.
Ӗмӗрӗпе ӗҫлесе пурӑнма хӑнӑхнӑ ҫын ахаль ларасшӑн мар. Вӑйӗ ҫитмесен те унӑн пахчара акса лартас килет. Кун пек чухне Шупашкарти ватӑсене халӑхӑн социаллӑ ыйтӑвӗсене тивӗҫтерекен комплекслӗ центрӗн социаллӑ ӗҫченӗсем пулӑшса пыраҫҫӗ.
«Пахчана пушӑ вырттарас килмест. Юрать мана Елена Трофимова социаллӑ ӗҫчен пулӑшса пырать», — тав тӑвать тава тивӗҫлӗ канури Федосия Парфёнова. Зинаида Прокопьева вара Ольга Филиппова пулӑшса пынишӗн савӑнать.
Ҫӗнӗ Шупашкарта 71 ҫулти хӗрарӑм ҫухалнӑ. Ӑна «Лиза Алерт» шыравпа ҫӑлав отрячӗн хастарӗсем шыраҫҫӗ.
Любовь Васильевна Ларкина (Артемьева) килтен ҫӗртмен 3-мӗшӗнче тухса кайнӑ. Вӑл ӑҫталла ҫул тытни паллӑ мар.
Хӗрарӑм 160 сантиметр ҫӳллӗш, вӑтам пӳ-силлӗ, ҫӳҫӗ хура, куҫӗ хӑмӑр. Килтен кайнӑ чухне мӗн тӑхӑнни паллӑ мар. Вӑл ӑс-тӑн арпашӑннипе аптӑрать.
Ӑна курнисене ҫак номерсемпе шӑнкӑравлама ыйтаҫҫӗ: 8 800 700-54-52 (Раҫҫейре тӳлевсӗр) е 89876687081 (Виктория Искрич).
+4.3 °C