cap.ru сӑнӳкерчӗкӗ

Чӑваш Енӗн Министрсен Кабинечӗн Председателӗн ҫумне — сывлӑх сыхлав министрне Владимир Степанова ӗҫрен кӑларнӑ.

Республикӑн влаҫ органӗсен официаллӑ порталӗнче пӗлтернӗ тӑрӑх, Владимир Степанова ҫу уйӑхӗн 11-мӗшӗнчен ӗҫрен хӑтарма йышӑннӑ.

Вице-премьер ӗҫрен хӑй каяс тенӗ-мӗн. Кун пирки республика Элтеперӗ Олег Николаев алӑ пуснӑ хушура палӑртса хӑварнӑ.

Максим Васиильев тунӑ сӑн

«Ҫыхӑнура» портал пӗлтернӗ тӑрӑх, ҫу уйӑхӗнчи уявсем хыҫҫӑн Шупашкар мэрӗ Владимир Доброхотов отставкӑна каять. Аса илтерер: вӑл ку должноҫе пӗлтӗр Республика кунӗнче йышӑннӑччӗ.

«Чеб.ру» пӗлтернӗ тӑрӑх, ӑна 2024 ҫул вӗҫӗнчех отставкӑна яма палӑртнӑ-мӗн. Анчах ун вырӑнне ҫын пулман имӗш. Халӗ шухӑш улшӑнман, Владимир Дорбохотова «башня» енчисем кӑмӑлсӑрланнипе отставкӑна яраҫҫӗ-мӗн.

Нарӑс уйӑхӗнче ЧР Элтеперӗ Олег Николаев хӑйӗн пресс-секретарьне Борис Краснова ӗҫрен яни пирки пӗлтернӗччӗ. Кайран вӑл И.Я.Яковлев ячӗллӗ ЧППУра студентсене вӗрентни пирки хыпар пулчӗ. Халӗ Борис Краснов Мускавра ӗҫлет, ҫарпа спорт хатӗрленӗвӗн тата ҫамрӑксене патриотлӑх воспитанийӗ паракан «Воин» центрӑн пресс-службине ертсе пырать.

Сӑмах май, «Воин» центра Раҫҫей Президенчӗ пуҫарнипе йӗркеленӗ. Ку программа хальхи вӑхӑтра 21 регионта ӗҫлет, ҫав йышра Чӑваш Ен те пур.

Олег Николаевӑн вара хальлӗхе пресс-секретарь ҫук. Элтепер администрацийӗ ку должноҫе ҫын шырани пирки «Раҫҫейри ӗҫ» портала хыпар панӑ. Пресс-секретаре 127-142 пин тенкӗ шалу шантараҫҫӗ.

Чӑваш Енри шалти ӗҫсен министрне 62 ҫулти Виктор Шметкова отставкӑна янӑ. Ӑна урӑх ӗҫе куҫарнӑ. Малашне вӑл РФ ШӖМӗн Ҫурҫӗр-Кавказ округӗнчи транспорт управленине ертсе пырӗ. Хушӑва Раҫҫей Президенчӗ Владимир Путин ака уйӑхӗн 25-мӗшӗнче алӑ пуснӑ.

Виктор Шметков пирӗн республикӑри ШӖМе 2019 ҫултанпа ертсе пынӑ Унччен вӑл ШӖМӗн Волгоград облаҫӗнчи управлени пуҫлӑхӗн ҫумӗ пулнӑ. Шметков умӗн пирӗн республикӑра Сергей Неяскин шалти ӗҫсен министрӗ пулнӑ.

cap.ru сайтри сӑн

ЧР Элтеперне Олег Николаева Узбекистанра чӑваш юррипе кӗтсе илнӗ. Карши университетӗнчи студентсем аякри хӑнасем валли чӑваш юррине шӑрантарнӑ.

Тӗлпулура ҫыхӑнӑва ҫирӗплетесси пирки калаҫнӑ. Уйрӑмах вӗренӗве тимлӗх уйӑрнӑ. Палӑртмалла: хальхи вӑхӑтра Чӑваш Енре Узбекистанри 150 яхӑн студент ӑс пухать. Малашне ҫамрӑксемпе улшӑнма, квотӑсем хатӗрлеме палӑртнӑ.

Чӑваш Ен делегацийӗ ҫӗвӗ фабрикине, газохими заводне тата «Uzbekistan GTL» завода ҫитсе курнӑ. Икӗ ен пирӗн технологисем вӗсен производствине мӗнле ҫӗнетме пултарнине сӳтсе явнӑ.

Депутатсем Сергей Артамонова Министрсен Кабинечӗн председателӗ пулма суйланӑ. Паян Патшалӑх Канашӗн 34-мӗш сессийӗ иртнӗ. Сергей Артаманов кандидатурине 38 депутат суйланӑ, иккӗн хирӗҫ пулнӑ.

Аса илтерер: Республика правительствине Олег Николаев Элтепер тивӗҫне пурнӑҫланӑ вӑхӑтра, 2020 ҫулхи нарӑсӑн 6-мӗшӗнче, ертсе пыма тытӑннӑ. Унччен ку дожноҫе 8 ҫул Иван Моторин йышӑннӑ.

cap.ru сӑнӳкерчӗкӗ

Ҫӗнӗ Шупашкар пуҫлӑхӗ Максим Семенов хӑйӗн дожноҫӗнче малалла ӗҫлӗ. Ӑна депутатсем отставкӑна ярайман – сасӑ ҫитмен.

Ҫӗнӗ Шупашкар хулин хӑш-пӗр депутачӗ ӑна отставкӑна яма ыйтнӑ-мӗн. Паян пуху иртнӗ, унта журналистсене кӗртмен.

«Грани» хаҫат пӗлтернӗ тӑрӑх, пухура пулнӑ 18 депутатран 14-шӗ Семенова отставкӑна ярассишӗн сапланӑ. (Пӗтӗмпе – 25 депутат). Ку 56 процентпа танлашнӑ.

cap.ru сӑнӳкерчӗкӗ

Ӗнер, ака уйӑхӗн 11-мӗшӗнче, ЧР Элтеперӗ Олег Николаев строительство министрне хушу алӑ пусса ҫирӗплетнӗ. Ку должноҫе Владимир Максимов йышӑннӑ.

Вӑл - 40 ҫулта, 4 ача ашшӗ. 2007 ҫултанпа Вӑрмар районӗн администрацийӗнче ӗҫленӗ, 2011 ҫулта Строительство министерствине куҫнӑ. Кайран министр ҫумӗ пулнӑ. 2018 ҫултанпа – пӗрремӗш ҫум. Кӑҫал кӑрлачранпа министр тивӗҫне пурнӑҫласа пынӑ.

Аса илтерер: унччен министр пулнӑ Михаил Коледана Элтепер шанчӑкран тухнӑ тесе ӗҫрен кӑларнӑ.

Владимир Максимов пирки тӗплӗнрех РУВИКИн чӑвашла уйрӑмӗнче вуласа пӗлме пулать.

cap.ru сайтри сӑн

Ака уйӑхӗн 17-мӗшӗнче Чӑваш Ен Элтеперӗ Олег Николаев журналистсемпе пресс-конференци ирттерет.

Журналистсем ӑна хӑйне те, видеоҫыхӑну урлӑ та ыйту пама пултараҫҫӗ. Пресс-конференци 11 сехетре пуҫланать.

Эфира Чӑваш наци телевиденийӗпе, Элтеперӗн телеграм-каналӗнче, «Контактри» «Чувашская Республика» ушкӑнра, «Республика 21» телеграм-каналта курма пулать. Ҫавӑн пекех Тӑван радиопа, Наци радиовӗпе итлеме май пур.

Олег Николаев ҫинчен тӗплӗнрех РУВИКИ-н чӑваш уйрӑмӗнче вуласа пӗлме пулать.

pravdapfo.ru сӑнӳкерчӗкӗ

Шӑмӑршӑ тӑрӑхӗн пуҫлӑхӗ Сергей Галкин канашлусенчен пӗринче кӑмӑл-туйӑмне ирӗке янӑ. Канашлура тискер кайӑка тытмалли сунар вӑхӑтне уҫас ыйтӑва сӳтсе явнӑ. Пуху чӗрчунсен чир-чӗрӗпе кӗрешмелли станцире иртнӗ.

Тӳре-шара усал сӑмахпа перкелешме тытӑнса кайнӑ, ҫапӑҫма пуҫланӑ.

Пӑтӑрмах пуш уйӑхӗн 22-мӗшӗнче пулса иртнӗ. Усал сӑмах шайӗнчи тавлашу ҫапӑҫӑва куҫнӑ. Халӑх тетелӗнче сарӑлнӑ видео тӑрӑх хакласан, чи малтан алӑ ҫӗклекенни округ пуҫлӑхӗ пулнӑ.

Пӑтӑрмаха пакунлисем хак парӗҫ.