cap.ru сайтри сӑн

Шупашкар валли каллех тӗп архитектор шыраҫҫӗ. Хула администрацийӗн архитектура тата хула строительствин управленийӗ конкурс ирттерессине пӗлтернӗ.

Кандидатсенчен ҫаксене ыйтаҫҫӗ: архитектура енӗпе аслӑ пӗлӳ пулмалла, саккунсене пӗлмелле, компьютерпа, документсемпе ӗҫлемелле, патшалӑх тата вырӑнти органсемпе калаҫу йӗркелемелле.

Документсене авӑн уйӑхӗн 2-мӗшӗччен йышӑнаҫҫӗ. Конкурс авӑнӑн 9-мӗшӗнче пулӗ.

Сӑмах май, унчченхи тӗп архитектор Павел Корнилов Строительство министерствине ӗҫлеме кайнӑ, Чӑваш Енӗн тӗп архитекторӗ пулса тӑнӑ.

Шупашкарти аэропорт сӑнӳкерчӗкӗ

Шупашкарти аэропорта юсама пуҫлани виҫӗ ҫул ӗнтӗ. Ҫав вӑхӑтра аэровокзал ӗҫлеме самантлӑха та чарӑнман — тӗрлӗ хулана каякансене тата пирӗн тӑрӑха килекенсене йышӑннӑ.

Чӑваш Енӗн патшалӑх телерадиокомпанийӗ пӗлтернӗ тӑрӑх, отделка ӗҫӗсем пыраҫҫӗ. Строительсем инженери сечӗсене монтаж туса пӗтернӗ.

Юсаса пӗтернӗ хыҫҫӑн ҫурт калӑпӑшӗ виҫӗ хут ытла пысӑкланӗ.

Юсав ӗҫӗ ҫулталӑкӗпех пырӗ.

t.me/newschebru сӑнӳкерчӗкӗ

Шупашкар хулин 555 ҫулхине халалланӑ уява ҫӗршыври паллӑ юрӑҫа Шамана чӗннине Чӑваш халӑх сайчӗ пӗлтернӗччӗ-ха.

Концерта курма халӑх калама ҫук йышлӑн пуҫтарӑннӑччӗ. Анчах ахаль куракансене юрӑҫран вип-зонӑпа уйӑрнӑ. Унта ача-пӑчапа аслисем тата тӳрӗ-шара пурччӗ.

Куракансене ҫакӑн пек икӗ ушкӑна уйӑрни теприсене тӗлӗнтернӗ, вӗсем хула администрацийӗн пуҫлӑхӗ Владимир Доброхотов патне те халӑх тетелӗнче кӑмӑлсӑрланса ҫырнӑ.

Тӳрӗ-шара ӑнлантарнӑ тӑрӑх, фан-зонӑра Уҫӑ хулан хастарӗсем, волонтёрсем, ӗҫлекен ҫамрӑксен канашӗн, республикӑн районӗсен пайташӗсем, уяв мероприятийӗсене хутшӑннӑ артистсем пулнӑ-мӗн.

Олег Николаевӑн Телеграм-каналӗнчи сӑн

Ҫурла уйӑхӗн 17-мӗшӗнче, паян, Шупашкара 20 ҫӗнӗ троллейбус килсе ҫитнӗ. Вӗсем республика займ мелӗпе илнӗ 92 троллейбусран пӗрремӗшӗсем.

Килсе ҫитнӗ транспорта Ҫӗнӗ Шупашкара панӑ. Ку спутник хулари транспорта ҫӗнетме ҫителӗклине пӗлтернӗ.

Ҫулталӑк вӗҫлениччен республикӑна автономлӑ майпа ҫӳрекен 72 троллейбус килсе ҫитмелле. Вӗсенчен 59-шӗ Шупашкарпа Ҫӗнӗ Шупашкара ҫыхӑнтаракан 60-мӗш тата 61-мӗш маршрутсем ҫинче ӗҫлӗҫ.

mintrud_21 сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗнчи специалистсем йывӑр лару-тӑрӑва лекнӗ хӗрарӑмсене сӑмахпа та пулӑшаҫҫӗ.

«Тепӗр чухне хӗрарӑмсене хӑйсене хисеплеме вӗрентни те пӗлтерӗшлӗ. Пурнӑҫа хӑйсем ҫеҫ улӑштарма пултарнине ӑнлантарса парсан та ҫын пурнӑҫ тилхепине ҫирӗп алла илет», — каласа кӑтартать йывӑрлӑхри хӗрарӑмсене пулӑшакан пай пуҫлӑхӗ Людмила Иванова.

Асӑннӑ пай Хусанкай урамӗнчи 29 «а» ҫуртра вырнаҫнӑ.

cap.ru сӑнӳкерчӗкӗ

Йӑлана кӗнӗ тӑрӑх, пысӑк уявсенче Шупашкарта ретро-троллейбус ҫула тухать. Хула кунӗнче те вӑл маршрут ҫинче пулӗ.

Ретро-троллейбус яланхи ҫулпа ҫӳрӗ: Трактор тӑвакансен проспекчӗпе «Университет» микрорайон таран. Вӑл 9 сехетрен пуҫласа 17 сехет те 57 минутчен ҫӳрӗ. Троллейбуса «Ӑслӑ транспорт» сарӑмра сӑнама пулать, ӑна 001Р тесе палӑртнӑ. Унта билет хакӗ ытти ҫӗрти пекех пулӗ: чӗрӗ укҫапа - 33 тенкӗ, карттӑпа - 29 тенкӗ.

"Контактри" сӑн

Шупашкар юбилейӗ ячӗпе Чӑваш Енри агропром тутлӑ локаци хатӗрлет. Ӑна Чӑваш патшалӑх аграри университечӗ умӗнче вырнаҫтарӗҫ.

Унта фермер продукцийӗсен палатки пулӗ: Ольга Кошелевӑн сырӗсем, Муркаш тӑрӑхӗнчи ҫырласем, Шупашкарти ҫӑкӑр пӗҫерекен 2-мӗш савут тата ытти те.

Палатка «Пултарулӑх бальварӗ» лапамӗнче ӗҫлӗ.

visitvolga.ru сайтри сӑн

Шупашкар хули 555 ҫулхи юбилейне паллӑ тума хатӗрленет. Анчах ҫӗршыври юлашки лару-тӑрӑва пула массӑллӑ мероприятисем пулӗҫ-и?

Юбилея хатӗрленес енӗпе ӗҫлекен ушкӑн (ӑна Алексей Ладыков ертсе пырать) канашланӑ. Ҫапла йышӑннӑ: салют пулмӗ, Раҫҫей эстрада артисчӗн Шаманӑн концерчӗ иртӗ.

«На связи» портал пӗлтернӗ тӑрӑх, Шаманӑн концерчӗ 20 миллиона яхӑн ларӗ.

Паян Шупашкарти депутатсем хисеплӗ ята кама парассине палӑртнӑ. Унчченех пӗлтернӗччӗ ӗнтӗ: Патшалӑх Думин депутачӗ Анатолий Аксаков Шупашкарӑн хисеплӗ ҫынни пулма пултарӗ, мӗншӗн тесен вӑл сасӑлавра чи нумай сасӑ пухнӑ.

Паян депутатсем сӳтсе явнӑ хыҫҫӑн ҫапла пӗтӗмлетӳ тунӑ: Анатолий Аксакова ҫак хисеплӗ ята памаллах.

Палӑртмалла: Анатолий Аксаков 2022 ҫулта Чӑваш Енӗн хисеплӗ ҫынни пулнӑ.

Шупашкарӑн ҫуралнӑ кунӗнче, ҫурла уйӑхӗн 18-мӗшӗнче, йӑлана кӗнӗ мероприяти иртӗ: ҫӑлтӑрпа зарядка тӑвӗҫ. Кӑҫал ӑна паллӑ ММА кӗрешӳҫи Джефф Монсон ирттерӗ.

Зарядка Хӗрлӗ тӳремре 11 сехетре пуҫланӗ. Спортсмен ятарлӑ тренировка ирттерӗ. Унта кирек кам та хутшӑнма пултарать.

Джефф Монсон унччен Америка спортсменӗ пулнӑ, халӗ - Раҫҫейӗн. Вӑл пирӗн ҫӗршыва 2013 ҫулта куҫса килнӗ, 2018 ҫулта Раҫҫей гражданствине илнӗ, 2023 ҫулта АПШ гражданинӗ пулма пӑрахнӑ.