Чӑваш Ен спортсменки Анжелика Сидорова ҫӑмӑл атлетика енӗпе иртнӗ Раҫҫей кубокӗнче ылтӑн медаль ҫӗнсе илнӗ.
Ӑмӑрту утӑ уйӑхӗн 11-12-мӗшӗсенче Жуково хулинчи «Метеор» спорткомплексра иртнӗ. Унта Раҫҫейри чи вӑйла спортсменсем тупӑшнӑ.
ЧР Спорт министерствин сайтӗнче хыпарланӑ тӑрӑх, пирӗн Анжелика Сидорова шӑчӑпа 4,65 метр ҫӳллӗшне сикнӗ. Ҫапла майпа вӑл пьедесталӑн ҫӳлти картлашки ҫине хӑпарнӑ.
Анжеликӑн лӑпланса ларма вӑхӑт ҫук. Вӑл халӗ Европа чемпионатне хутшӑнма хатӗрленет. Ӑмӑрту ҫурла уйӑхӗн 7-12-мӗшӗсенче Германири Берлин хулинче иртӗ.
Шупашкарта иртнӗ Сапантуйра ӑнланманлӑх сиксе тухнӑ. Спорт ӑмӑртӑвӗсенче паттӑр ятне ҫӗнсе илнӗ спортсмена Тутарстан президенчӗ машина парнелесси пирки унччен пӗлтернӗччӗ. Анчах чи маттур яша автомобиль мар, така лекнӗ.
Абсолютлӑ паттӑр ятне Мари Элти Муса Галлямов ҫӗнсе илнӗ. Анчах ытти спортсмен кӑмӑлсӑрланнӑ. Ара, вӑл унччен Сапантуйра автомобиль выляса илнӗ вӗт. Ҫавӑнпа паттӑра така пама йышӑннӑ.
Юлашки самантра уяв йӗркелӳҫисем правилӑсене улӑштарса машинӑна выляттармашкӑн шӑпа янӑ. Тутарстанри спортсменсене вара унта хутшӑнтарман. Ҫапла майпа «Вольскваген» Чӑваш Енри Ринас Сатдарова лекнӗ. Вӑл ӑмӑртура 2-мӗш вырӑн йышӑннӑ.
Халӗ тутарсен обществи ку пулӑма сӳтсе явать. Ҫитес ҫул кунашкалли ан пултӑр теҫҫӗ вӗсем.
Ҫӗртме уйӑхӗн 30-мӗшӗнче Тутар Республикинчи Мензелинск аэродромӗнче Екатеринбург, Пермь, Челепи, Ижевск, Шупашкар тата Мускав парашютисчӗсем «Вингсьют – пысӑк формацисем» дисциплинӑра Урал тата Атӑлҫи рекордне ҫӗнетнӗ.
Парашютистсен йышӗнче пирӗн ентеш те пулнине палӑртма кӑмӑллӑ. Эппин, Евгений Абрамов та рекорда ҫӗнетес ӗҫе хӑйӗн тӳпине хывнӑ.
Парашютистсем улттӑмӗш хутӗнче фармаци пуҫтарнӑ. Унта 10 ҫын хутшӑннӑ. Ҫапла вӗсем регионсен хушшинче спорт ҫитӗнӗвӗ тунӑ. Халӗ спортсменсем Раҫҫей тата Европа рекорчӗсене ҫӗнетес ӗҫе хутшӑнма пултарӗҫ. Ӑмӑрту Коломнӑра ҫак уйӑхра иртӗ.
2018 ҫулта калавсен Кашкар Махмучӗ ячӗллӗ пӗтӗм тӗнчери 5-мӗш ӑмӑртӑвӗ пулать
«Ҫыравҫӑсен ирӗклӗ пӗрлӗхӗ» (ҪИП) юридици сӑпачӗ йӗркелемесӗр ӗҫлекен Чӑваш тӑрӑхӗнчи халӑх пӗрлӗхӗ (штаб-хваттерӗ Чӑваш Республикин тӗп хулинче Шупашкарта вырнаҫнӑ, ертӳҫи Виталий Родионов профессор, филологи ӑслӑхӗсен докторӗ) «Еврази ҫыравҫисен пӗрлӗхӗ» юридици сӑпачӗ йӗркелесе ӗҫлекен пӗтӗм тӗнчери халӑх пӗрлӗхӗпе пӗрле (штаб-хваттерӗ Турци Республикин тӗп хулинче Анкарара вырнаҫнӑ, ертӳҫи Якуп Омероглу доцент, ветеринари ӑслӑхӗсен докторӗ) 2018 ҫулта калавсен Кашкар Махмучӗ ячӗллӗ пӗтӗм тӗнчери 5-мӗш ӑмӑртӑвӗн чӑваш тапхӑрне ирттересси ҫинчен пӗлтерет. Чӑваш тапхӑрӗнче ҫӗнтернӗ калава турккӑлла куҫарса пӗтӗм тӗнче шайӗнчи ӑмӑртун йӗркелӳ ушкӑнне тӑратаҫҫӗ.
1. Ӑмӑртӑва хутшӑнас текен ҫыравҫӑсен калава чӑн авторне кӑтартмасӑр, ӑмӑртӑва хутшӑнмалли ятарлӑ хушма ятпа (е шифрпа) ҫеҫ палӑртса, 2018 ҫулхи ҫурла (август) уйӑхӗн 31-мӗшӗччен ӑмӑртӑвӑн тӳре ушкӑнне ҫитерсе памалла е ҫак адрессенчен пӗрне ярса памалла:
Шупашкар - 428031, Илья Арсентьевич Иванов валли, ыйтса иличчен е электронлӑ ҫырупа: illesuvar@gmail.
Ҫӗртме уйӑхӗн 30-мӗшӗнче Шупашкарти Хӗрлӗ лапамра Пӗтӗм Раҫҫейри Олимп кунӗ иртӗ. Ӑна кӑҫал юпа уйӑхӗнче Аргентинӑри Буэнос-Айрес хулинче иртекен ҫамрӑксен Олимп вӑййисене халаллӗҫ.
14 сехетре республикӑри фитнес-аэробика федерацийӗ массӑллӑ зарядка ирттерӗ, кун хыҫҫӑн спорт ӑмӑртӑвӗсемпе ӑсталӑх класӗсем иртӗҫ. Программӑра – «Олимп мили» чупу, йӗлтӗрроллерпа, велосипедпа, роликлӑ конькипе чупасси. Ятарлӑ лапамсенче пӗр енлӗ кӗрешӳ, пилӗк енлӗ кӗрешӳ, баскетбол енӗпе ӑсталӑх класӗсем иртӗҫ. Сусӑр ҫынсем валли те бочче енӗпе турнир йӗркелӗҫ.
Палӑртмалла: ҫӗртмен 30-мӗшӗнче республикӑра Сывлӑхпа спорт кунӗ иртӗ. Ҫак кун вӑй-хал культурипе спорт учрежденийӗсем ҫынсене тӳлевсӗр йышӑнӗҫ. Спорт шкулӗсенче вара уҫӑ турнирсем, ӑсталӑх класӗсем, ӑмӑртусем иртӗҫ.
Елчӗк районӗнчи маттур хӗрача Европа шайӗнче палӑрнӑ. Анастасия Лапшина ирӗклӗ кӗрешӳ енӗпе иртнӗ Европа ӑмӑртӑвӗнче хӑйӗн виҫе категорийӗнче иккӗмӗш вырӑн йышӑннӑ.
Ӑмӑрту шкул ачисен хушшшинче Венгрири Дьере хулинче иртнӗ. Вӑл ӗнер, ҫӗртме уйӑхӗн 17-мӗшӗнче, вӗҫленнӗ. Настя Раҫҫейӗн пӗрлештернӗ команди йышӗнче пулнӑ. Вӑл 39 килограмм тайманнисен виҫе категорийӗнче вӑй виҫнӗ. Настя финалта Украинӑри Ольга Падошика парӑнтарайман, ҫапла майпа вӑл иккӗмӗш пулнӑ.
Палӑртмалла: Анастасия Лапшина 15 ҫулта. Халӗ вӑл Олимп резервӗсен Шупашкарти училищинче вӗренет.
Чӑваш хӗрӗ Полина Петухова кикбоксинг енӗпе иртнӗ «BESTFIGHTER» тӗнче кубокӗнче ҫӗнтерӳҫӗ ятне тивӗҫнӗ. Ӑмӑрту ҫӗртме уйӑхӗн 14-17-мӗшӗсенче Италире иртнӗ. Кун пирки Чӑваш Енӗн спорт министерстви хыпарлать.
Шупашкарта пурӑнакан Полина Петухова 52 килограмчченхи виҫе категорийӗнче вӑй виҫнӗ. И.Я. Яковлев ячӗллӗ Чӑваш патшалӑх университетӗнче пӗлӳ илекен пике ҫурма финалта Словакин паллӑ спортсменкине Моника Хохликовӑна парӑнтарнӑ. Финал ӑмӑртӑвӗнче вара Раҫҫейӗн тепӗр спортсменкине Кристина Исмаиловӑна ҫӗнтернӗ.
Чӑваш Енӗн спорт министерствинче палӑртнӑ тӑрӑх, тӗнче кубокӗнче 42 ҫӗршыври 2 пин ытла спортсмен ӑмӑртнӑ. Арҫынсемпе хӗрарӑмсем, юниорсемпе юниоркӑсем икӗ виҫе категорийӗнче тупӑшнӑ.
Ӗнер Шупашкарӑн Атӑл акваторийӗнче «SUPSPOTSerf парад» иртнӗ. Спорт мероприятине йӗркелеме Шупашкар хула администрацийӗ пулӑшнӑ.
Надежда Наумова инструктор ертсе пынипе спортсменсем старт йӗрӗнчен пуҫласа Атӑлӑн Шупашкар хулинчи Мускав районӗнчи ҫыран хӗррипе ӑмӑртнӑ. Ҫул ҫинче вӗсен сехет ытла иртнӗ.
Ҫанталӑк сулхӑннинчен те те, ҫумӑртан та, ҫил кастарнинчен те шикленмесӗр UP-хӑма ҫине 15 спортсмен тӑнӑ. Йышра Шупашкарти SUP-серферсем ҫеҫ мар, Сочи тата Мускав хулинчисем те пулнӑ. Парада хутшӑннисенчен чылайӑшӗ SUP-серфингпа ҫине тӑрсах аппаланаҫҫӗ иккен.
«SUP-серфинг эпӗ питӗ юрататӑп. Спортӑн ҫакна тӗсне эпир хӗрпе иксӗмӗр алла илетпӗр. SUP-парад Шупашкарта иртет тенине илтсен эпӗ те SUP-серферсен ретне тӑрас терӗм», – хавасланса каласа кӑтартнӑ парада хутшӑннисенчен пӗри, Владислав Григорьев.
Паян Чӑваш Ен Элтеперӗ Михаил Игнатьев Шупашкарти икӗ стадиона пӑхса ҫаврӑннӑ. Вӑл объектсене 2018 ҫулта футбол енӗпе иртекен пӗтӗм тӗнчери чемпионата хатӗрленмелли тренировка базисен малтанхи списокне кӗртнӗ.
Элтеперпе пӗрле стадионсене республикӑн физкультурӑпа спорт министрӗ Сергей Шелтуков ҫӳренӗ.
Министрпа республика ертӳҫи А.В. Игнатьев ячӗллӗ спорт хатӗрленӗвӗн центрӗн «Олимпийский» (чӑв. Олимп) тата Шупашкар хула администрацийӗн «Спартак» стадионӗсенче пулнӑ.
Паянхи куна стадионсене юсаса пӗтернӗ. Халӗ вӗсем тавралли территорие хӑтлӑх кӳреҫҫӗ.
Аса илтерер, чемпионат пирӗн ҫӗршывра ҫӗртме уйӑхӗн 14-мӗшӗнче пуҫланса утӑ уйӑхӗн 15-мӗшӗнче вӗҫленӗ. Унта тӗнчери 32 команда хутшӑнӗ. Вӗсен ӑмӑртӑвӗсем Раҫҫейри 11 хулара иртӗҫ.
Ҫӗртме уйӑхӗн 5-мӗшӗнче Шупашкарти «Олимпийский» (чӑв. Олимп) стадионта велоспорт-шоссе енӗпе Чӑваш Енӗн чемпионачӗ тата первенстви иртӗ. Ун вӑхӑтӗнче критериум енӗпе тупӑшӗҫ.
Чемпионата тата первенствӑна Шупашкарти, Ҫӗнӗ Шупашкарти, Вӑрмар, Ҫӗрпӳ, Патӑрьел, Канаш, Сӗнтӗрвӑрри районӗсенчен спортсменсенчен пуҫтарӑнӗҫ. Чӑваш Енӗн Физкультурӑпа спорт министерствин пресс-служби пӗлтернӗ тӑрӑх, 70 ытла ҫын пуҫтарӑнӗ.
Ӑмӑртӑва 15-16 ҫулсенчи хӗрсемпе каччӑсем, 17-18 ҫулсенчи юниорсемпе юниоркӑсем, арҫынсемпе хӗрарӑмсем хутшӑнӗҫ.
Спортсменсен 21-30 километр тӑршшӗне тупӑшма тивӗ.
Чемпионата хутшӑнакансене 10 сехет те 30 минутра регистрацилеме пуҫлӗҫ. Старта спортсменсем 11 сехетре тухӗҫ.
+0.3 °C