Культура тытӑмӗнче тӑрӑшакан республикӑри икӗ ҫын тава тивӗҫлӗ ята илнӗ.
«Чӑваш Республикин культурӑн тава тивӗҫлӗ ӗҫченӗ» хисеплӗ ята Улатӑрти ача-пӑчан ӳнер шкулӗнчи преподавательне Наталья Артемьевӑна тата Ҫӗмӗрлери ял вулавӑшӗн заведующине Людмила Кадеевӑна парас тенӗ.
Ҫӗмӗрлере чӳк уйӑхӗн 15-мӗшӗнче йытӑ икӗ хӗрачана тапӑннӑ. Пӗрине вӑл ҫыртнӑ, тумне ҫӗтнӗ. Тепринне кутамккине ҫурса тӑкнӑ. Юрать, хӗрарӑм пулӑшнӑ. Вӑл ачасем кӑшкӑрнине илтсе пулӑшма васканӑ. Вӑлах васкавлӑ медпулӑшу чӗннӗ. Вӑл ҫапкаланчӑк йытӑ пулман. Ӑна хуҫи урама уҫӑлма кӑларнӑ-мӗн.
Ку кӑнтӑрла 12 сехет иртсен Банк тӑкӑрлӑкӗнчи 6-мӗш ҫурт ҫывӑхӗнче пулнӑ. 12-ри хӗрачасем шкултан таврӑннӑ. Пӗрне пульницӑна илсе кайнӑ, йытӑ ӑна пӗҫҫинчен ҫыртнӑ.
Ачасен амӑшӗсем прокуратурӑран пулӑшу ыйтасшӑн.
Ҫӗмӗрлере пурӑнакан Дмитрий Лукьянов патшалӑх пулӑшнипе ритуаллӑ пулӑшу кӳрессипе ӗҫлеме тытӑннӑ.
Арҫын социаллӑ контрактпа усӑ курнӑ. Ку вӑл уншӑн питӗ лайӑх тӗкӗ пулнине усламҫӑ хавхаланса пӗлтернӗ. Вӑл малашне те ҫав енӗпе тимлесшӗн.
Ритуаллӑ пулӑшу кӳрессипе Дмитрий ҫулталӑка яхӑн ӗҫлет.
Программа пирки вӑл ӗҫлӗх центрӗнче ыйтса пӗлнӗ. Унӑн ҫемйи социаллӑ контрактпа усӑ курма пултарнӑ. Хыснаран илнӗ 350 пин тенке кирлӗ ҫӗре ӑсатнӑ. Унсӑр пуҫне вӑл онлайн-мелпе вӗренсе тухнӑ.
Ҫӗмӗрлери Зайцевсен ҫемйи Раҫҫейри «Ҫулталӑкри ҫемье» конкурсра палӑрнӑ. Вӗсем «Нумай ачаллӑ ҫемье» номинацире малти вырӑна йышӑннӑ.
Зайцевсем тӑватӑ ывӑл ӳстереҫҫӗ. Мӑшӑр килӗштерсе пурӑнать.
Палӑртмалла: конкурс кӑҫалхипе тӑххӑрмӗш хут иртнӗ. Унта 388 ҫемье хутшӑннӑ. Вӗсенчен 88-шӗ тӗрлӗ номинацире ҫӗнтернӗ.
Ҫӗмӗрлере хваттерте пушар пулнӑ. Юрать-ха, килте пулнӑ ҫынсем ҫӑлӑнма ӗлкӗрнӗ.
Ача асламӑшӗ (е кукамашӗ) патӗнче хӑнара пулнӑ. Пӗчӗкскер шӑрпӑк тупнӑ та унпа вылянӑ, сӗтел-пукан хыпса илнӗ. Ҫулӑм хӑвӑртах сарӑлнӑ. Кукамӑшӗпе мӑнукӗ урама тухса ӗлкӗрнӗ.
Ҫӳлти хутра пурӑнакансене вара пулӑшу кирлӗ пулнӑ. Арҫынна тата унӑн 19-ти сусӑр ывӑлне ҫӑлавҫӑсем урама кӑларнӑ.
Ҫӗмӗрлере пурӑнакан 25 ҫулти арҫын ют ҫӗршыври машина туянма шутланӑ. Вӑл тӗнче тетелӗнче пӗлтерӳ тупнӑ.
Кӗҫех вӑл «сутуҫӑпа» калаҫма тытӑннӑ. Килӗшӳ ҫырмалла тесе палламан ҫын унран укҫа ыйтнӑ та ыйтнӑ. Ҫапла арҫын вӑл калана счетсем ҫине 1 миллиона яхӑн тенкӗ куҫарнӑ. Анчах машинӑна кӗтсе илеймен.
Ку тӗслӗх тӗлӗшпе пуҫиле ӗҫ пуҫарнӑ.
Улатӑрта 76 ҫулти арҫынна санавиаципе Шупашкара илсе килнӗ. Ку унӑн пурнӑҫне ҫӑлма май панӑ.
Ирхине арҫын кӑкӑрӗ тӗлӗнчен ыратнине туйнӑ. Ӑна Ҫӗмӗрлери медцентра илсе ҫитернӗ. Унӑн каллех миокард инфаркчӗ пулнӑ иккен.
4 ҫкл каялла унӑн ишеми чирӗ пулнӑ, ӑна стент лартнӑ. Медбригада хальхинче те унӑн пурнӑҫне ҫӑлнӑ - тромба ирӗлтернӗ. Кайран пациента Республикӑри клиника пульницине илсе ҫитернӗ.
Авӑн уйӑхӗн 16-мӗшӗнче Ҫӗмӗрлери чукун ҫул ҫинче 1997 ҫулта ҫуралнӑ хӗрарӑма тиев турттаракан пуйӑс ҫапса кайнӑ. Вӑл ӳсӗр пулни паллӑ.
Машинист ӑна таптаса каяс мар тесе пуйӑса чарма хӑтланнӑ. Анчах ӗлкӗреймен. Юрать-ха, хӗрарӑм чӗрех юлнӑ. Ӑна пульницӑна илсе ҫитернӗ.
Ку тӗслӗх тӗлӗшпе халӗ следстви умӗнхи тӗрӗслев ирттереҫҫӗ.
Чӑваш Енре санитари вертолёчӗ вӗҫнине пӗлетпӗр-ха. Нумаях пулмасть вӑл Ҫӗмӗрле районӗнчи 94 ҫулти кинемее ҫӑлса хӑварма май панӑ.
Пӗр ирхине ватӑ ҫыннӑн чӗри патӗнче тирсе ыратма тытӑннӑ. Васкавлӑ пулӑшу машини ватӑ ҫынна Ҫӗмӗрлери медицина центрне илсе кайнӑ. Унтисем Республикӑн кардиоцентрӗн специалисчӗсемпе канашланӑ хыҫҫӑн кинемее вертолётпа Шупашкара ӑсатма йышӑннӑ. Унта ватӑ ҫыннӑн чӗрине операци туса кардиостимулятор лартса янӑ.
Ҫӗмӗрле округӗнчи Ҫӗмӗрле ялӗнче пурӑнакан Роман Клячкин 10 ҫулта кӑна-ха. Ӑна вара халех ҫамрӑк фермер теме пулать. Вӑл хӑйӗн видеоблогне йӗркеленӗ, унта ялти пурнӑҫ пирки каласа кӑтартать.
Арҫын ача килти хур-кӑвакала, чӑх-чӗпе пӑхма пулӑшать. Пуласлӑхра вӑл ялтах юлма ӗмӗтленет, Рома ӗне, сурӑх, сысна, чӑх-чӗп усрасшӑн. Ӑна ялта пурӑнма питӗ килӗшет: унта хулари пек шавлӑ мар тет.
Ромӑна видеоблогра контент тума ҫемйи пулӑшать. Ача пӗҫерме те юратать. Уйрӑмах - икерчӗ.
+1.3 °C