Шупашкарта эрне каялла ҫухалнӑ пикене шыраҫҫӗ. Кун пирки «ЛизаАлерт» шырав отрячӗ пӗлтернӗ.
15 ҫулти хӗрачана Валерия Семенова тесе чӗнеҫҫӗ. Вӑл ӑҫтине унӑн ҫывӑх ҫыннисем ҫу уйӑхӗн 18-мӗшӗнченпе пӗлмеҫҫӗ.
Хӗрача 165 сантиметр ҫӳллӗш, вӑтам пӳ-силлӗ, ҫӳҫӗ хура тӗслӗ, куҫӗ — хӑмӑр.
Вӑл хура тӗслӗ кофта, сӑрӑ джинс, тӗксӗм симӗс пушмак тӑхӑннӑ.
Пике ӑҫтине пӗлекенсене шырав отрячӗн 8 800 700-54-52(ку номерпе шӑнкӑравланӑшӑн укҫа илмеҫҫӗ) е шырав ӗҫне йӗркелесе пыракан Екатеринӑна 8 977 708 47 04 номерпе пӗлтерме ыйтаҫҫӗ.
Чӑваш Енри икӗ тантӑш, хӗрпе каччӑ, ултавҫӑсене ӗненсе ҫын пурлӑхне вӑрлама тухса кайнӑ. Пӑтӑрмаха ҫакланнисем — аслӑ шкулта вӗренекен каччӑ тата колледжра вӗренекен хӗр.
Вӗсем патне вӗренӳ заведенийӗн деканатӗнчен тесе шӑнкӑравланӑ имӗш, смс-ҫырупа килнӗ кода калама ыйтнӑ. Кайран вӗсем патне патшалӑх пулӑшӑвӗсен порталӗн, Тӗп банкӑн, Федерацин хӑрушсӑрлӑх службин ӗҫченӗ текенсем шӑнкӑравланӑ. Вӗсене укҫана тата терроризма спонсор пулса пулӑшнинчен явап тытасран ҫӑлса хӑварма шантарнӑ.
Улатӑр каччи ултавҫӑсене 170 пине яхӑн тенкӗ куҫарса панӑ, ҫав шутра — амӑшӗн картти ҫинчен те. Унтан ӑна «йӗрке хуралҫисем» Украинӑн хӗҫпӑшаллӑ ҫарне пулӑшнӑ ҫынсен хваттерӗнче укҫа шырама хушнӑ.
Вӑрӑ шухӑшлӑ хӗре кил хуҫи хӑй тытса чарнӑ. Вӑл Шупашкар районӗнчи ҫурта кӗме тӑнӑ.
Ҫамрӑксене иккӗшне те суд тенкелӗ ҫине лартнӑ. Анчах тӗрмене хупса хумасӑр явап тыттарма йышӑннӑ.
Полици лейтенанчӗ отпускра канас вырӑнне «Сталинградская весна – 2026» астӑвӑм вахтине хутшӑннӑ. Вӑл ака уйӑхӗн 24-мӗшӗнчен пуҫласа ҫу уйӑхӗн 9-мӗшӗччен Волгоград облаҫӗнчи Городище районӗнчи Дмитриевка хуторӗ патӗнче иртнӗ. Унта 1943 ҫулхи хӗлле юнлӑ ҫапӑҫу пынӑ.
Шупашкарти полицин 5-мӗш уйрӑмӗн пуҫлӑхӗн ҫумӗ пулса тӑрӑшакан Александр Генералов совет салтакӗсене пытарнӑ вырӑнсене шырама хутшӑннӑ. Унпа пӗрле Шупашкарти экономикӑпа технологи колледжӗн студенчӗсем те экспедицие хутшӑннӑ. Асӑннӑ вӗренӳ заведенийӗнче лейтенант пулас йӗрке хуралҫисене те вӗрентет.
Чӑваш Енри 62 шыравҫӑ икӗ эрнере 500-е яхӑн гектар тӗпченӗ, унта ӗмӗрлӗх канлӗх тупнӑ 36 салтака тата нимӗҫ тата совет салтакӗсен 300 ытла артефактне тупса палӑртнӑ.
Полици лейтенанчӗ отпускра канас вырӑнне «Сталинградская весна – 2026» астӑвӑм вахтине хутшӑннӑ. Вӑл ака уйӑхӗн 24-мӗшӗнчен пуҫласа ҫу уйӑхӗн 9-мӗшӗччен Волгоград облаҫӗнчи Городище районӗнчи Дмитриевка хуторӗ патӗнче иртнӗ. Унта 1943 ҫулхи хӗлле юнлӑ ҫапӑҫу пынӑ.
Шупашкарти полицин 5-мӗш уйрӑмӗн пуҫлӑхӗн ҫумӗ пулса тӑрӑшакан Александр Генералов совет салтакӗсене пытарнӑ вырӑнсене шырама хутшӑннӑ. Унпа пӗрле Шупашкарти экономикӑпа технологи колледжӗн студенчӗсем те экспедицие хутшӑннӑ. Асӑннӑ вӗренӳ заведенийӗнче лейтенант пулас йӗрке хуралҫисене те вӗрентет.
Чӑваш Енри 62 шыравҫӑ икӗ эрнере 500-е яхӑн гектар тӗпченӗ, унта ӗмӗрлӗх канлӗх тупнӑ 36 салтака тата нимӗҫ тата совет салтакӗсен 300 ытла артефактне тупса палӑртнӑ.
Хӗрлӗ Чутайӗнчи тӗп пульницӑра Константин Будков ҫамрӑк тухтӑр тӑрӑшать. Вӑл Чӑваш патшалӑх университетӗнчен 2025 ҫулта вӗренсе тухнӑранпа тухтӑр пулса тимлет.
МАХри «Хыпар-Вести Чувашии» каналта пӗлтернӗ тӑрӑх, Костя Шупашкарта ҫуралнӑ, ачалӑхӗ Сургут тӑрӑхӗнче иртнӗ. Вӑл 15 ҫулта чухне Будковсем тӑван тӑрӑха таврӑннӑ.
Ҫамрӑк тухтӑр спорт туризмӗпе кӑсӑкланать. Виҫӗ ҫулта каччӑ чылай ҫӗрте пулса курнӑ, вун-вун километра хыҫа хӑварнӑ.
Тухтӑр пулма вӑл ачаранпах ӗмӗтленнӗ май шапасемпе нӑрӑсене сиплеме юратнӑ. Чӑнласа мар-ха. Вылямалла.
Шкулта хими юратса вӗреннӗскер шкул пӗтерсен И.Н. Ульянов ячӗллӗ ЧПУ-ри медицина факультетне вӗренме кӗнӗ. Унтан вӗренсе тухсан вӑл Хӗрлӗ Чутайӗнчи тӗп пульницӑра ӗҫлеме тытӑннӑ. Ӑна унта пурӑнмалли вырӑнпа та тивӗҫтернӗ.
Андрей Малаховӑн телекӑларӑмне чӑваш фермерне йыхравланӑ.
Ҫӗршыври паллаӑ телеертӳҫӗ Андрей Малахов ертсе пыракан «Привет, Андрей!» кӑларӑмне ентешӗмӗре чӗннӗ. Ҫав ҫын Элӗк муниципаллӑ округӗнчи Кирилл Степанов фермер.
Шоуна «Россия 1» (чӑв. Раҫҫей 1) каналпа кӑтартаҫҫӗ.
Чӑваш каччи телешоун черетлӗ кӑларӑмӑн хӑни пулӗ. Вӑл ӳкерӗннӗ передачӑна ҫу уйӑхӗн 2-мӗшӗнче эфира кӑларӗҫ.
Ялта ӳснӗ Кирилл ачаранпах ял хуҫӑлӑхӗпе кӑсӑкланнӑ. Малтан мускус кӑвакал ӗрчетсе пӑхнӑ, кайран хуҫалӑха пысӑклатса пынӑ. Степановсен картишӗнче паян 100 ытла ӑратлӑ выльӑхпа кайӑк-кӗшӗк, ҫав шутра павлинпа страус та пур. Унсӑр пуҫне пахчаҫимӗҫ тата тӗрлӗ чечек ӳстереҫҫӗ.
«Юрлама эпӗ пӗлместӗп, анчах Андрей валли парне хатӗрлерӗм. Мӗнле парне хатӗрленине сирӗн курмаллах», — тесе ҫырнӑ Кирилл хӑйӗн блогӗнче.
Кӗҫех республикӑра «Земство культура ӗҫченӗ» программӑна хутшӑнма кӑмӑл пур специалистсенчен заявка йышӑнма пуҫлӗҫ.
Аса илтерер: ҫак программӑпа яла ӗҫлеме каякансене 1 миллион тенкӗ парӗҫ.
Заявкӑсене паян, ака уйӑхӗн 15-мӗшӗнче, йышӑнма тытӑннӑ. Вӗсене утӑ уйӑхӗн 15-мӗшӗччен ҫак адреспа йышӑнаҫҫӗ: Шупашкар хули, Энтузиастсен урамӗ, 26-мӗш ҫурт, 133-мӗш пӳлӗм.
Кӑҫал ҫак программӑпа республикӑри 20 специалист усӑ курма пултарӗ. Вӗсен ялти культура ҫурчӗсене, ӳнер, музыка шкулӗсене вырнаҫма пулӗ.
Ултӑрта 17 ҫулти питбайкер машинӑна пырса тӑрӑннӑ. Кун пирки патшалӑх автоинспекцийӗ пӗлтерет.
Ку ӗнер, ака уйӑхӗн 13-мӗшӗнче, каҫхине Мускав урамӗнчи 125-мӗш «Б» ҫурт патӗнче пулнӑ. Малтанлӑха палӑртнӑ тӑрӑх, 18 ҫулти водитель Гончаров урамӗ еннелле кайнӑ чухне сулахаялла пӑрӑннӑ чухне тӳрӗ пыракан питбайка ирттерсе яман. Ҫапла питбайпа пынӑ 17 ҫулти каччӑ аманнӑ.
Суранланнӑ каччӑ – Улатӑрти техникумӑн 2-мӗш курс студенчӗ. Вӑл авари вӑхӑтӗнче мотошлемпа пулнӑ. Каярахпа ашшӗ ӑнлантарнӑ тӑрӑх, мототранспорт уҫҫи килте курӑнмалли вырӑнтах выртнӑ.
Ҫу уйӑхӗн 22-24-мӗшӗсенче «Ялта чи лайӑххисем» агрослет иртӗ. Ӑна кӑҫал Раҫҫейри халӑхсен пӗрлӗхӗн ҫулне тата Чӑваш Енри халӑхсен туслӑхӗн ҫулталӑкне халаллӗҫ.
Агрослета пултаруллӑ тата хастар ҫамрӑксем, ялта ӗҫлесе пурӑнаканскерсем, хутшӑнӗҫ: тухтӑрсем, вӗрентекенсем, культура ӗҫченӗсем, спортсменсем… Ҫавӑн пекех унта Атӑлҫи федераци округӗнчи регионсенчи ҫамрӑксем килӗҫ.
Йӑлана кӗнӗ тӑрӑх, парад, ял ҫамрӑкӗсен спартакиади, уха пӗҫерес енӗпе ӑмӑрту иртӗҫ. Ҫавӑн пекех экспертсемпе, общество ӗҫченӗсемпе, влаҫ органӗсен представителӗсемпе уҫӑ дискуссисем пулӗҫ.
Шупашкарта Африкӑран пирӗн хулари аслӑ шкулсенчен пӗрне вӗренме килнӗ хӗр тавар вӑрланӑ.
Пӑтӑрмах иртнӗ уйӑх вӗҫӗнче Энгельс урамӗнчи пысӑк пӗр лавккара пулса иртнӗ. Сентре ҫинчен косметика, гигиена хатӗрӗсем, соуссем, кофе, пылак апат-ҫимӗс тата ҫӗр ҫырли ҫухалнӑ. Ку тавара укҫа ҫине куҫарсан 17 пинрен иртсе каять иккен.
Йӗрке хуралҫисем видеокамера пӑхнӑ та касса патӗнчен Африкӑран килнӗ ҫын сӑнлӗ хӗр иртсе кайнине асӑрханӑ. Кӗҫех вӗсем Мароккӑран Шупашкара вӗренме килнӗ 18 ҫулти студенткӑна тытса чарнӑ. Чӑваш Ене вӗренме вӑл 2025 ҫул вӗҫӗнче килсе ҫитнӗ иккен, анчах кӑштахран пӑтӑрмаха ҫакланнӑ.
Тӳрӗ ҫултан пӑрӑннӑ студентка тӗлӗшпе тӗпчевҫӗсем РФ Пуҫиле кодексӑн 158-меш статйипе пуҫиле ӗҫ пуҫарнӑ.
+13.2 °C