Шупашкарта пурӑнакан шӑл тухтӑрӗ тава тивӗҫлӗ канӑва тухсан нимеҫӗ пулса тӑнӑ. Паян, утӑ уйӑхӗн 9-мӗшӗнче, 80 ҫул тултарнӑ хастар хӗрарӑм Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра тӗрлӗ занятие ҫӳрет. Волонтёр ӗҫне вӑл унта кӳлӗннӗ те.
Маргарита Мельникова сывлӑха сыхлас ӗҫре ӗмӗрӗпех тӑрӑшнӑ. Шупашкарти медицина училищинчен 1965 ҫулта шӑл врачӗ пулма вӗренсе тухнӑ хыҫҫӑ Етӗрнери район пульницинче 15 ҫул тӑрӑшнӑ. Тепӗр 17 ҫул Шупашкарти Трактор завочӗн медсанчаҫӗнче тӑрӑшнӑ.
Халӗ 80-ри хӗрарӑм социаллӑ центрти «Сывлӑх» клуба ҫӳрет, «Калинушка» хорта юрланӑ май тӳлевсӗр концертсемпе хӑйӗн тусӗсемпе тӗрлӗ ҫӗре тухса ҫӳрет.
Чӑваш Енӗн Чрезвычайлӑ лару-тӑру енӗпе ӗҫлекен патшалӑх комитечӗн ӗҫченӗсем Шупашкарти яваплӑ ытти тӳре-шарапа пӗрле тӗрӗслеве тухнӑ. Папкӑллӑ, ятарлӑ формӑллӑ ҫынсем шыв хӗрринче ҫынсем хӑрушсӑрлӑх правилине пӑхӑннипе пӑхӑнманнине тӗрӗсленӗ.
Маларах асӑннӑ службӑра пӗлтернӗ тӑрӑх, иртнӗ канмалли кунсенче ҫеҫ пирӗн республикӑра шывра 5 пӑтӑрмах пулса иртнӗ. Вӗсенче 5 ҫын вилнӗ.
Инкек сӑлтавӗнчен пӗри — ятарласа хатӗрлемен вырӑнсенче тата ӳсӗр пуҫпа шыва кӗни.
Хальхинчи рейда шыва кӗме юраман вырӑнсенче ирттернӗ те. «Шыва кӗме юрамасть» паллӑ лартса хунӑ вырӑнта шыва кӗрекенсен тӗлӗшпе административлӑ протоколсем шӑрҫаланӑ.
Шупашкарта ҫӑмӑл атлетика енӗпе Раҫҫей кубокӗ иртет. Мускавран килнӗ Артем Чермошанский ӗнер унта вӑйлах суранланнӑ.
Спортсмен 8,03 метр тӑршшӗне сиксе чи лайӑх кӑтартупа палӑрнӑ. Улттӑмӗш хутӗнче вӑл лини ҫине пуснӑ та сикнӗ чухне группировка туман, пӗр ури ҫине сикнӗ. Унтан такӑннӑ, хӑйӑр тӑрӑх чӑкӑл-мкакӑл туса сылтӑм ура чӗркуҫҫине сиктернӗ.
Артема васкавлӑ медпулӑшупа илсе кайнӑ. Унӑн мӑшӑрӗ Елизавета пӗлтернӗ тӑрах, спортсмен урине хуҫман, ӑна операци тунӑ та шӑмма вырӑна лартнӑ.
Шупашкара тепӗр 16 ҫӗнӗ троллейбус килсе ҫитнӗ. Пӗтӗмпе «Горожанин» ятлӑ 20 транспорт кӳрсе килмелле. Тепӗр 4 троллейбуса ҫитес вӑхӑтра илсе килӗҫ.
Малтан транспорт тӗрӗслев витӗр тухӗ, кайран ӑна транспорт управленине парӗҫ. Кун хыҫҫӑн троллейбуссем рейса тухӗҫ. Вӗсем «Шупашкар – Ҫӗнӗ Шупашкар» маршрутпа ҫӳрӗҫ: 52-мӗш, 53-мӗш, 54-мӗш тата 55-мӗш маршрутсем.
Аса илтерер: Республика кунӗнче Шупашкарпа Ҫӗнӗ Шупашкар хушшинче 62-мӗш троллейбус рейса тухнӑ. Маршрут ҫинчи пӗтӗмпе 21 троллейбус ӗҫлет.
Ӗнер Атӑл леш енче икӗ каччӑ путни пирки хыпарланӑччӗ. Аса илтерер: ун чухне ҫил вӑйланнӑ та хумсем пысӑкланнӑ. Каччӑсем шыв айӗнчен тухайман.
Вӗсене ӗнер шырама пуҫланӑ. Паян виллисене тупса ҫыран хӗррине кӑларнӑ. Вӗсем - 2003 тата 2005 ҫулсенче ҫуралнӑ, Шупашкара вӗренме килнӗ студенсем. Ҫамрӑксем шыв хӗрринче ушкӑнпа каннӑ. Шалалла ишсе кӗрсен каялла иккӗше кӑна тухнӑ. Тепӗр иккӗшӗ ҫухалнӑ. Шел те, вӗсем путса вилни ҫирӗпленнӗ.
Шупашкарти Хевеш урамӗнчи 30-мӗш ҫурт стени ҫине чӑваш хӗрарӑмне ӳкерни пирки пӗлтернӗччӗ. Ӗҫ вӗҫленнӗ - мурал хатӗр.
Аса илтерер: ӗҫ авторӗ - ҫамрӑк ӳнерҫӗ Ксения Кокель. Вӑл чӑваш хӗрарӑмне ҫӗртме уйӑхӗн24-мӗшӗнче ӳкерме тытӑннӑ.
Сӑмах май, ҫуртӑн тепӗр стени ҫинче - Андриян Николаев космонавт.
Паян Шупашкарта Трактор тӑвакансен проспектӗнчи ҫуртра ҫулталӑкри ача чӳречерен ӳкнӗ. Вӑл виҫҫӗмӗш хутран персе аннӑ.
Ку 13 сехетре пулнӑ. Ҫав вӑхӑтра арҫын ачапа килте амӑшӗ пулнӑ. Вӑл йӑпӑртлӑха тепӗр пӳлӗме тухнӑ, чӳречене кӑшт уҫӑ хӑварнӑ.
Суранланнӑ ачана пульницӑна илсе кайнӑ, ӑна тухтӑрсем сиплеҫҫӗ.
Аса илтерер: ҫу уйӑхӗнче Ҫӗнӗ Шупашкарта 5 ҫулти ача пиллӗкмӗш хутран ӳксе аманнӑччӗ.
Паян ирхи 9 сехетре Шупшкарти «Садовый» микрорайонта рабочи ҫӳллӗшӗнчен ӳкнӗ. Вӑл 10 метртан персе анса вилмеллех суранланнӑ.
Халӗ ку тӗслӗх тӗлӗшпе тӗрӗслев пырать. Ҫакӑ паллӑ: 47 ҫулти арҫынна монтаж ӗҫне тӑвакан предприниматель тара тытнӑ. Ӑна документсене йӗркеллӗ хатӗрлесе ӗҫе илмен. Унӑн ятарлӑ пиҫҫиххи те пулман, унпа инструктаж та ирттермен. Прокуратура Патшалӑх ӗҫ инспекцийӗпе пӗрле тӗрӗслев ирттерет.
Шупашкар хула администрацийӗн Ленин районӗнчи управине Геннадий Маслов ертсе пыма тытӑннӑ.
Геннадий Маслов 1966 ҫулта Елчӗк районӗнчи Хӑвӑлҫырма ялӗнче ҫуралнӑ. 1988 ҫулта Хусанти ракета ҫарӗсен аслӑ ҫар команда инженери училищичнен вӗренсе тухнӑ. 6 ҫул ҫарта службӑра тӑнӑ хыҫҫӑн Чӑваш Енри Куславкка районӗнче шалти ӗҫсен пайӗнче ӗҫленӗ. Унта вӑл 1994-2001 ҫулсенче тӑрӑшнӑ. Кайран ӑна Етӗрне районӗнче шалти ӗҫсен пайне ертсе пыма шаннӑ, кӑштахран Шупашкарта ҫав тытӑмра тимленӗ. 2011-2021 ҫулсенче Елчӗк чӑвашӗ Норильскра Шалти ӗҫсен пайне ертсе пынӑ.
Чӑваш Енри юсанмалли учрежденисенче саккуна пӑхӑннине тӗрӗслесе тӑракан Шупашкарти прокурор пулма Евгений Алексеева ҫирӗплетнӗ. Приказа Раҫҫей Федерацийӗн генпрокурорӗ алӑ пуснӑ.
Евгений Алексеев 1975 ҫулта Шупашкарта ҫуралнӑ. 1998 ҫулта Чӑваш патшалӑх университетӗнчи юридици факультетӗнчен вӗренсе тухнӑ хыҫҫӑн прокуратура тытӑмне ӗҫе вырнаҫнӑ. Шупашкра хулинчи Калинин районӗнче прокурор пулӑшуҫи, аслӑ пулӑшуҫи, прокурор ҫумӗ пулнӑ. Унтан республикӑн прокуратурине куҫарнӑ. 2021 ҫултанпа вӑл Шупашкарти Ленин районӗн прокурорӗн ҫумӗ пулнӑ.
+18.3 °C