Чӑваш Енри ҫамрӑк ӳнерҫӗ Шупашкарта Хевеш урамӗнчи ҫурт стени ҫине чӑваш хӗрарӑмне ӳкерни пирки унчченех пӗлтернӗччӗ. Халӗ вӑл ҫӗнӗ ӗҫе пуҫӑннӑ. Хальхинче – Модӑсен ҫуртӗнче.
Ксения унта балеринӑна ӳкерме тытӑннӑ.
Паян Шупашкарти Пролетари урамӗнчи 16-мӗш ҫуртӑн 1-мӗш корпусӗнче 15 ҫулти каччӑ пурнӑҫӗ татӑлнӑ. Вӑл ҫӳллӗшӗнчен ӳкнӗ.
Каччӑ медицина учрежденийӗ тӑррине персе аннӑ. Йывӑр сурансене пула вӑл ҫавӑнтах вилнӗ.
Следстви комитечӗ, йӗрке хуралҫисем халӗ ӗҫ-пуҫа уҫӑмлатаҫҫӗ.<s></s>
Паян пирӗн республикӑра «На работу с вышивкой» (чӑв. Ӗҫе тӗрӗпе) акци иртет. Ҫавна май Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем те пӗр шухӑшлӑн пулса ҫак акцие хутшӑнма йышӑннӑ.
Тӗрленӗ чӑваш кӗпине тӑхӑнман пулин те вӗсем ҫипуҫа май килнӗ таран чӑваш эрешӗпе капӑрлатма тӑрӑшнӑ. Специалистсем те, центр директорӗ Светлана Милкина та акцие хутшӑнаҫҫӗ.
Шупашкарта пурӑнакан Николай Буравов чӳк, уйӑхӗн 22-мӗшӗнче 100 ҫул тултарнӑ. Вӑл – чӑн-чӑн паттӑр теме пулать. Николай Степанович Шупашкарти тата Раҫҫейри ытти пысӑк гидроэлектростанцисене тунӑ ҫӗре хутшӑннӑ.
Саяно-Шушенски, Красноярск, Зейск, Бурейск ГЭСӗсене тӑвас ӗҫе хутшӑннӑ. Ҫапах унӑн чи пысӑк ӗҫӗ Шупашкарпа ҫыхӑннӑ. Вӑл тӑрӑшнипе тӗп хуламӑрта кӳлмек пулнӑ.
Николай Степанович паянхи кун та хавхаланса пурӑнать.
Шупашкарти Хусанкай урамӗнче Сергей Злобин хӑй пурӑнакан картише илемлетнӗ. Унта ӗлӗкхи япаласем вырӑн тупнӑ. Ҫапла уҫӑ тӳпе айӗнчи музей йӗркеленнӗ.
Сергей Злобин ӗлӗкхи япаласене тахҫанах, 30 ҫул ытла каялла Шупашкара куҫса килсен, пухма тытӑннӑ. Халӗ ав картишре тӗрлӗ экспонат пур: вӑрҫӑчченхи йӗлтӗр, йывӑҫ чашӑк, чуччу... Сергей Леонидович музея тӑвас тесе вӑхӑтне те, укҫине те шеллемен.
Шупашкарти 52-мӗш маршрутпа ҫӳрекен пӗр автобуса Яков Липкин ятне панӑ. Вӑл Чӑвашавторансӑн тӗп директорӗ пулнӑ, ӑна чӗрӗк ӗмӗр ертсе пынӑ. Автобус маршрут ҫине чӳк, уйӑхӗн 25-мӗшӗнче тухӗ.
Сӑмах май, чӳк, уйӑхӗн пуҫламӑшӗнче Шупашкарпа Ҫӗнӗ Шупашкара ҫыхӑнтаракан икӗ троллейбуса ят панӑ. Вӗсем Геннадий Устинов Виталий Орешников ятлӑ.
Шупашкарти пӗр урам Василий Дмитриев историк ячӗпе хисепленме тытӑнӗ. Ҫапла йышӑну тунӑ Шупашкар хулин администрацийӗн архитектура тата хула строительствин управленийӗ.
Хулари пӗр урама историк ятне пама Гуманитари ӑслӑлӑхӗсен институчӗ 2019 ҫулта сӗннӗ. Чӳкӗн 20-мӗшӗнче Шупашкар хулин пуҫлӑхӗ йышӑнӑва алӑ пуснӑ.
Паян Шупашкарти Алькеш микрорайонти Роза Люксембург урамӗнчи 63-мӗш шкулта пӑтӑрмах пулса иртнӗ. Столовӑйӗнче 12-ри арҫын ача алла ҫӗҫӗ ярса илсе унпа ытти ачана тата педагогсене тапӑнма тӑнӑ.
Инкек пирки пӗлтерекен ҫӑлкуҫсем хыпарланӑ тӑрӑх, никам та шар курман. Ҫӗҫҫе ача килӗнчен илсе пыман иккен. Ӑна вӑл столовӑйӗнче асӑрханӑ. Ҫӗҫҫе хуралҫӑ туртса илнӗ.
Ачан аталанса пырассипе кӑлтӑк пур-мӗн. Вал шкулта учетра тӑнӑ-мӗн.
Чӳкӗн 12-мӗшӗнче Шупашкарти 40 ҫулти Александр Исаков килтен тухнӑ та таврӑнман. Ҫав кун вӑл кӑвак куртка, хура толстовка, кӑвак джинс, хура атӑ, тӗттӗм кӑвак калпак тӑхӑннӑ пулнӑ. Александр 189 сантиметр ҫӳллӗш, вӑтам кӗлеткеллӗ, куҫӗ хӑмӑртарах, ҫӳҫӗ тӗттӗм ҫырӑ тӗслӗ.
Арҫынна полицейскисем тата «Лиза Алерт» хастарӗсем шыраҫҫӗ. Ун пирки мӗн те пулин пӗлетӗр тӗк ҫак номерсемпе шӑнкӑравламалла: 8 (800) 700-54-52 е 112.
Шупашкарти полицейскисем ватӑ хӗрарӑма пулӑшнӑ. Кинемее урамра япӑх пулса кайнӑ. Ҫурт алӑкӗ ҫине таянса тӑраканскере ҫул-йӗрпе патруль службин инспекторӗсем Вадим Мыльниковпа Сергей Егоров асӑрханӑ.
86 ҫулти кинемейӗн тӑрук пуҫӗ ҫаврӑнса кайнӑ-мӗн. Полици ӗҫченӗсем пӑрӑнса иртмен, ӑна пулӑшнӑ: тулли сумккисене киле ҫите йӑтса панӑ. Кинемей инспекторсене чӗререн тав тунӑ.
+20.3 °C