Шупашкарта кашни ҫул валли харпӑр рецептпа асфальт суйлӗҫ. Асфальт мӗнрен пулассине автомобиль трафикне, ҫул мӗнле пахалӑхлӑ пулнине кура палӑртӗҫ.
Палӑртмалла: пӗлтӗр кун пек майпа Кривов урамӗнчи ҫула юсанӑ. Хальхи вӑхӑтра Шупашкарти Яноушек, Тукташ, Игнатьев урамӗсене, Трактор тӑвакансен проспектне юсама пуҫланӑ. Трактор тӑвакансен проспектӗнче бордюрсене илнӗ ӗнтӗ. Кӑҫал ку урамра юлнӑ ҫул пайне – тасатакан сооруженисенчен пуҫласа Сӗнтӗрвӑрри ҫулӗ таран, юсаса пӗтерӗҫ. Унта ТУС компани ӗҫлет. Ҫула ҫӗртме уйӑхӗн 20-мӗшӗ валли туса пӗтермелле.
Ҫакӑн пирки Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паянхи канашлура каланӑ. Мероприятире кӳлмекпе Хӗрлӗ лапама юсаса ҫӗнетес ыйтӑва тишкернӗ. Хӗрлӗ лапама ҫӗртме уйӑхӗн 1-мӗшӗ тӗлне юсаса пӗтересшӗн. Кайран кӳлмеке ҫӗнетме пуҫӑнмалла. Планпа килӗшӳллӗн — 2021 ҫулта ҫеҫ.
«ДОРИСС» предприятин пуҫлӑхӗ Всеволод Рощин ӗҫе унччентерех пуҫӑнма сӗннӗ. Компани кӑҫалах юсама тытӑнма хатӗр иккен.
Олег Николаев предприятие тата хула администрацийӗн пуҫлӑхне Олег Николаева хастар ӗҫшӗн тав тунӑ.
Элтепер тивӗҫӗсене вӑхӑтлӑх пурнӑҫлаканӗ республикӑн Стройминӗпе Экономика аталанӑвӗн тата пурлӑх хутшӑнӑвӗсен министерствисене проекта аталантарма уйӑракан укҫан пӗр пайне 2021 ҫултан 2020 ҫула куҫарас ыйтӑва тишкерме сӗннӗ.
Шупашкарта пурӑнакан Александрова Виктория Валерьевна ака уйӑхӗн 12-мӗшӗнче ирхи 7 сехет те 40 минутра килтен тухса кайнӑ. Унтанпа вӑл киле килмен. Амӑшӗ каланӑ тӑрӑх, унччен хӗрӗ капла тухса кайман, ҫухалса ҫӳремен.
Хӗрӗ кайсан 3 сехет иртсенех хӗрарӑм полицие кайса заявлени ҫырнӑ. Виктория килтен кайнӑ чухне симӗс куртка, хура лосина, хура кроссовка тӑхӑннӑ пулнӑ. Хӑйӗнпе пӗрле рюкзак пулнӑ.
Хӗр 157 сантиметр ҫӳллӗш, вӑтам пӳ-силлӗ, ҫӳҫӗ ҫырӑ, куҫӗ хӑмӑр. Ӑна курнӑ тӑк 8 (800) 700-54-52 е 112 номерпе шӑнкӑравлӑр.
Шупашкарти ача-пӑча центрӗсенчен пӗри кӑшӑлвирусран шикленмен. Вӑл Раҫҫей Президенчӗ канмалли кунсем тесӗ пӗлтернине те, Чӑваш Енре ятарлӑ мерӑсем йышӑннине те пӑхӑнман унта.
Хулари Павлов мичман урамӗнчи «Джуниор» ача-пӑча центрӗ ӗҫленине Роспотребнадзорӑн Чӑваш Енри управленийӗн ӗҫченӗсем тупса палӑртнӑ.
Федерацин суд приставӗсен службин Чӑваш Енри управленийӗнче пӗлтернӗ тӑрӑх, ача-пӑча организациийӗнче дежурство ушкӑнӗ йӗркеленӗ. Тӗрӗслевҫӗсем пынӑ вӑхӑтра унта тӑватӑ ача пулнӑ.
Ача-пӑча центрне Шупашкарти Мускав район сучӗ 31 кунлӑха ӗҫлеме чарнӑ. Ҫавӑн хыҫҫӑн учреждение пырса суд приставӗсем пырса ҫитнӗ. Вӗсем «Джуниор» центра ӗҫлеттерме чарса лартнӑ, унӑн алӑкӗсене хупса хунӑ.
Шупашкарта 42 ҫулти арҫынна тытса чарнӑ. Вӑл ҫынна вӗлернӗ тесе шухӑшлаҫҫӗ.
РФ Следстви комитечӗ пӗлтернӗ тӑрӑх, ака уйӑхӗн 8-мӗшӗнче ҫак ӳсӗр арҫын хӗрсен ушкӑнне ҫулӑхнӑ. Лешсем унпа калаҫасшӑн пулман. Ку вӗсене кӗленчепе пеме пуҫланӑ, икӗ ҫӗҫӗпе хӑратнӑ.
Хӗрсем хӑраса кайнӑ, пулӑшу ыйтса кӑшкӑрнӑ. Арҫын вара пӗрин хыҫҫӑн чупнӑ. Ҫакна 35-ри арҫын курнӑ та хӗре хӳтӗлеме тӑнӑ, ӳсӗрскере лӑпланма ыйтнӑ.
Икӗ арҫын тытӑҫса ӳкнӗ. Ӳсӗрскер ҫамрӑккине ҫӗҫӗпе 6 хут чикнӗ. Лешӗ сурансене пула ҫавӑнтах вилнӗ. Ӳсӗр арҫынна иртен-ҫӳрен тытса чарнӑ, ӑна полицие тыттарса янӑ.
Халӗ пуҫиле ӗҫе малалла уҫӑмлатаҫҫӗ.
Чӑваш патшалӑх ял хуҫалӑх академине университет статусне пама пултарасси пирки эпир унччен систернӗччӗ-ха. Аса илтерер: пуш уйӑхӗн 20-мӗшӗнче Чӑваш Ен Министрсен Кабинечӗн Ертӳҫин ҫумӗ — ял хуҫалӑх министрӗ Сергей Артамонов аслӑ шкулӑн ректорӗпе Андрей Макушевпа тӗл пулнӑччӗ. Сергей Артамонов ун чухне Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев пуш уйӑхӗн 18-мӗшӗнче Раҫҫей ял хуҫалӑх министрӗпе Дмитрий Патрушевпа курнӑҫнине, ял хуҫалӑх академине университет статусне парас ыйтӑва хускатнине пӗлтернӗччӗ.
Ӗнер Сергей Артамонов ял хуҫалӑх академийӗн ректорӗпе Андрей Макушевпа черетлӗ хутчен курнӑҫнӑ.
Андрей Макушев ака уйӑхӗн 10-мӗшӗнче ҫӗршывӑн ял хуҫалӑх министрӗн ҫумӗ Максим Увайдов аслӑ шкула университет статусне парасси ҫинчен хушу алӑ пуснине пӗлтернӗ. Ҫапла вара академи Чӑваш патшалӑх аграри университечӗ пулса тӑнӑ.
2020 ҫулта Чӑваш Енре 3 метан автогаз заправки станцийӗ тума палӑртаҫҫӗ.
Станцисенчен пӗрне «Атӑл» М-7 ҫул ҫинче Куславкка районӗнче тӑвасшӑн, теприне – «Вятка» автоҫул ҫинче Шупашкар районӗнче, 3-мӗшне – Шупашкарта. Чӑваш Ен Транспорт тата ҫул-йӗр хуҫалӑхӗн министерствинче пӗлтернӗ тӑрӑх, 2021 ҫулта тата тепӗр икӗ заправка станцийӗ уҫасшӑн.
Газлӑ мотор топливин пасарне аталантарас тӗллевлӗ патшалӑх программине пурнӑҫласа ҫутҫанталӑк газӗллӗ заправка инфраструктурине сарма кӑҫал республика хыснинчен 120 миллион тенкӗ, ҫав шутра федераци хыснинчен 112,8 миллион тенкӗ уйӑрмалла; 2021 ҫулта – 63,8 миллион тенкӗ, ҫав шутра федераци хыснинчен – 60 миллион тенкӗ.
Ҫак кунсенче Чӑваш Ен тӗп хулинче каклишкепе ҫӳрекен арҫынна тапӑннӑ. 58 ҫулти арҫын ака уйӑхӗн 7-мӗшӗнче 16 сехет тӗлӗнче Хусанкай урамӗнчи хӑй пурӑнакан ҫурт подъездне кӗнӗ. Ун патне иккӗн пырса туртмалли ыйтнӑ, Унтан документсене туртса илнӗ. Шар кураканнине пӗри тытса тӑнӑ, тепри ҫулланнӑ ҫын кӗсйисенчен паспорт, пенси удостоверенине, ҫавӑн пекех банк карттине тата 3 пин тенкӗ кӑларса илнӗ.
Шар курни килте пӑтӑрмах пирки 35 ҫулти ывӑлне пӗлтернӗ. Лешӗ ҫывӑхри уҫланкӑра кӳрентерекенсенчен пӗрне асӑрхать. Вӑл паспортпа пенси удостоверенине ҫунтарма хӑтланнӑ. Ҫамрӑк арҫын документсене туртса илнӗ.
«Шар курни 2 кунран право сыхлавҫисенчен пулӑшу ыйтасах тенӗ», – хыпарлаҫҫӗ Чӑваш Ен Шалти ӗҫсен министерствинче.
Сусӑра Шупашкарта пурӑнакан, унччен вӑрӑ тунӑшӑн тата ҫарантнӑшӑн судпа унччен айӑпланнӑ 36 ҫулти ҫын, ҫавӑн пекех вӑрлӑнӑшӑн тата алимент тӳлеменшӗн саккунпа унччен пӑтӑрмаха лекнӗ Канаш районӗнче пурӑнакан 35 ҫулти ҫын кӳрентернӗ. Палӑртнӑ тӑрӑх, вӗсем подъездри хваттерсенчен пӗринче эрех ӗҫнӗ. Сусӑра курсан вӗсем ҫаратса кӗсьене пуянлатма йышӑннӑ.
Шупашкарта нимеҫӗсем троллейбуспа тӳлевсӗрех ҫӳрӗҫ. Кунашкал ҫӑмӑллӑх вӗсен пандеми пӗтиччен пулӗ.
Шупашкарта нимеҫӗсене 20 ытла центрӗ ӗҫлет. 50-а яхӑн нимеҫӗ пандеми вӑхӑтӗнче ваттисене пулӑшать. Вӗсем 60 ҫултан аслӑрах ҫынсем патне апат-ҫимӗҫ илсе килеҫҫӗ. Аса илтерер: 60-тан аслӑраххисем халӗ килте лараҫҫӗ, вӗсен урама тухма юрамасть.
Нимеҫӗсен центрӗсенче тӑрӑшакансем пандеми пӗтиччен троллейбуспа тӳлевсӗрех ҫӳрӗҫ. Кондукторсем вӗсене бейджик пулӑшнипе пӗлӗҫ. Унта вӗсен ятне-шывне, штаб номерне ҫырнӑ.
Патӑрьел районӗнче пурӑнакан хӗрарӑм аслӑк ҫинчен ӳкнӗ. Медицина катастрофисен тата васкавлӑ медицина пулӑшӑвӗн республикӑри центрӗнче пӗлтернӗ тӑрӑх, инкек ака уйӑхӗн 7-мӗшӗнче пулнӑ. Хӗрарӑм кил-тӗрӗшри ӗҫпе аппаланнӑ май аслӑк ҫине улӑхнӑ. Унтан вӑл персе аннӑ.
Ҫав кун васкавлӑ пулӑшу ыйтса шӑнкӑравланисенчен 11 проценчӗ суранланнипе сӑлтавланнӑ. Республикӑн тӗрлӗ районӗнче пурӑнакан виҫӗ ҫынна йытӑ ҫыртнӑ. Ҫӗнӗ Шупашкарта виҫӗ ҫулти ача тетте ҫӑтнӑ.
Шупашкарта пӗр арҫын аяк пӗрчине тӑватӑ кун каяллах хуҫнӑ. Вӑл гараж шӑтӑкне ӳкнӗ. Малтанах аптӑраман-ха. Кайран, тӑваттӑмӗш кунхине, хытах нушаланма тытӑннӑ. Вара васкавлӑ пулӑшу машинине чӗнсе илнӗ. Сӗнтӗрвӑрри районӗнче ватӑ арҫын ҫурӑм ҫине иртнӗ эрнерех ӳкнӗ. Ҫурӑм шӑммин сыпӑкне хуҫнӑскер ака уйӑхӗн 7-мӗшӗнче тухтӑрсене чӗннӗ.
+11.3 °C