Ку эрнекун, ака уйӑхӗн 27-мӗшӗнче, Шупашкарта йӑлана кӗнӗ «Тутлӑ эрнекун» фермерсен фестивалӗ иртӗ. Вӑл «Элара» умӗнче 10 сехет ҫурӑра пуҫланӗ те 15 сехере вӗҫленӗ.
Унта республикӑри тӗрлӗ округри ял хуҫалӑх производителӗсем хутшӑнӗҫ. Вӗсем тӗрлӗ продукци сутӗҫ: аш-какай, сӗт юр-варӗ, сыр, пахча ҫимӗҫ, пулӑ. Калчасем те пулӗҫ.
«Тутлӑ эрнекуна» ЧР Ял хуҫалӑх министерствипе пӗрле Россельхозбанк ирттерет. Ӑна организацисен заявкисемпе йӗркелеҫҫӗ.
Шупашкар хулинче пурӑнакан ватӑсем ӗнер, ака уйӑхӗн 19-мӗшӗнче, «Танцуют все» (чӑв. Пурте ташлаҫҫӗ) ташӑ фестивальне пуҫтарӑннӑ. Ӑна Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗ йӗркеленӗ.
Ташӑ фестивальне учрежденине пуҫласа ирттернӗ. Унра социаллӑ центра ҫӳрекен ватӑсен ташӑ ушкӑнӗсем хушкӑнӗ. Ҫавӑн пек пултарулӑх ушкӑнӗсем унта темиҫе те. Хӑшӗсене социаллӑ ӗҫ енӗпе тӑрӑшакан специалистсем ертсе пыраҫҫӗ; теприсене – центра ҫӳрекен хастар ватӑсем хӑйсем.
Паян республикӑри пултаруллӑ ачасен конкурсӗ иртнӗ. Ача-пӑчан ӳнер пултарулӑхне «Черчен чечексем» республикӑри фестиваль-конкурсне Шупашкарти «Южный» культура ҫуртӗнче пуҫтарӑннӑ.
Пултарулӑх ӑмӑртӑвне «Трактор тӑвакансен культура керменӗ» республикӑри халӑх пултарулӑхӗн центрӗ йӗркеленӗ. Фестиваль-конкурса республикӑри ача-пӑча коллективӗсем хутшӑннӑ.
Ҫу уйӑхӗн 8-мӗшӗнче Шупашкарти Хӗрлӗ тӳремре ҫӗршыврри тӗрлӗ халӑхӑн этнофестивалӗн гала-концерчӗ иртӗ. «Ясна музыка» фестиваль 15 сехетре пуҫланӗ.
Концертра тӗрлӗ халӑхӑн авалхи юррисене ҫӗнӗ аранжировкӑпа илемлетнӗ тӗрлӗ жанрлӑ юрӑсем янӑрӗҫ. Ҫав вӑхӑтрах йӑлана кӗнӗ музыка инструменчӗн сассипе киленме май килӗ.
Финалистсем — «Ясна музыка» этномузыка фестивалӗн ҫӗнтерӳҫисем:
1. Рабор – Кострома облаҫӗ,
2. Виктория Маралёва – Санкт-Петербург,
3. «ВАРЬЯ» фолк-ушкӑн – Пермь тӑрӑхӗ,
4. Дара Яра – Мускав,
5. Runa Project – Тула облаҫӗ,
6. Nati Tedeeva – Ҫурҫӗр Осети-Алани,
7. Гарпани Солинга – Саха-Якути,
8. «МАТРЁХА» фолк-ушкӑн – Челепир облаҫӗ,
9. Ladi Sveti – Удмурт Республики,
10. «ZAKARIA» фолк-ушкӑн – Тутарстан,
11. YALFY — Пушкӑртостан,
12. «Янтал» – Чӑваш Республики,
13. Валерия Филиппова – Коми Республики,
14. «ЛЕТО-ЛУНА» – Самар облаҫӗ.
Унсӑр пуҫне GURUDE этномузыкант, юрӑҫ тата композитор пулӗ.
Ака уйӑхӗн 6-мӗшӗнче Муркаш муниципаллӑ округӗнчи Калайкасси шкулӗнче «Чӑваш ачи чӑвашах» республика шайӗнчи 8-мӗш фестиваль иртнӗ.
Чӑваш наци ӑслӑлӑхпа ӳнер академийӗн пайташӗ Елизавета Долгова халӑх тетелӗнчи хӑйӗн страницинче пӗлтернӗ тӑрӑх, «Вӗрентетпӗр чӑвашла», «Савӑнатӑп эп чӑваш пулнишӗн», «Сар каччӑпа сӑра хӗр», «Тӑвалла пулсан та малалла» ятлӑ лапамсенче тата шкул музейӗсенче чун каниччен чӑвашла калаҫма, чӑвашла юрлама, чӑвашла ташлама май пулнӑ.
«Фестиваль чӑваш чӗлхи предметне вӗрентмен вӗрентекенсене чӑвашла уроксем кӑтартма май панӑ. Кӗҫӗн классенче вӗренекен ачасем чӑваш халӑхӗн йӑлине илемлӗн сӑнарланӑ. Вӑтам классенче вӗренекен ачасем чӑваш халӑх историне, культурине, чӗлхине, йӑли-йӗркине пӗлнине ӑс-тӑн вӑййинче кӑтартнӑ.
Шкул ертӳҫисем хӑйсен чӑвашлӑх туйӑмне аталантаракан проектсене хӳтӗленӗ», — хыпарланӑ Елизавета Долгова.
Пуш уйӑхӗн 31-мӗшӗнче Шупашкарти Трактор тӑвакансен культура керменӗнче ҫемье пултарулӑхӗн «Пӗр хум ҫинче» хулари IV фестиваль-конкурсӗ иртнӗ.
Унта 12 ҫемье хутшӑннӑ. Ҫав йышра: Беляевсем, Казаковсем, Павловсем, Черновсем, Ивановсем, Ямалиевсем, Муллинсем, Лысяковсем, Герасимовсем, Логиновсем, Пчеловсем, Щербаковсем.
Фестивальте Черновсем ҫӗнтернӗ. Сцена ҫине ҫулталӑкри ачине те илсе тухнӑ вӗсем.
Ҫемьесене «Химик» культура ҫурчӗн пай заведующийӗ, «Челентано» пултарулӑх пӗрлешӗвӗн проекчӗсен ертӳҫи Андрей Лазарев, Чӑваш патшалӑх филармонийӗн солистки Алина Кудрявцева, «Симӗс кролик» уяв студийӗн ертӳҫи Мария Миронова, «Кӑвак кайӑк» эстрада ташшин ансамблӗн балетмейстерӗ Татьяна Мокеева хакланӑ.
Пирӗн республикӑра ҫитес уйӑхра иртекен балет фестивалӗ ҫитиччен нумай вӑхӑт юлмасть. Аса илтерер: вӑл ака уйӑхӗн 5-14-мӗшӗсенче Чӑваш патшалӑх оперӑпа балет театрӗнче иртӗ. Пӗтӗм тӗнчери XXVIII балет фестивалӗ вӑхӑтӗнче Шупашкарта ҫулсеренех пысӑк шайри ӑстасем пуҫтарӑнаҫҫӗ. Ҫӗршыври чаплӑ театрсем вӑл вӑхӑтра пирӗн тӑрӑха гастрольсемпе килӗҫ.
Кӑҫал, сӑмахран, «Пушкиниана» премьерӑпа паллаштарӗ. Ӑна Александр Пушкинӑн «Маленькие трагедии» ярӑмне тӗпе хурса хатӗрленӗ. Ӗҫе вилӗмсӗр вырӑс классикӗ ҫуралнӑранпа 225 ҫҫитнине халалланӑ.
Фестиваль Коми Республикинчи оперӑпа балет театрӗн «Крик» балечӗпе уҫӑлӗ.
Профессионал стрит-арт художниксемпе ӳкерме юратакансем«ФормART» фестивале хутшӑнма пултараҫҫӗ. Ӑна 18 пуҫласа 35 ҫулчченхи ҫамрӑксем валли йӗркелеҫҫӗ.
Фестивалӗн кашни тематикипе пӗр ҫынран 3 заявкӑран ытла йышӑнмӗҫ. Вӗсенесумлӑ экспертсем, сӑнарлӑ тата урамри искусство, архитектура тата хула строительстви енӗпе ӗҫлекен специалистсем хаклӗҫ.
Фестиваль темиҫе номинаципе иртӗ, Ҫавна май кашниех хӑйне ҫывӑххине суйласа илме пултарӗ.
Ҫӗнтерӳҫӗсене хӑйсен ӗҫӗсене Федерацин Атӑлҫи округӗнчи 14 регионта пурнӑҫа кӗртме май туса парӗҫ.
Пӗлтӗр республикӑра ҫырла фестивалӗ пӗрремӗш хут иртнӗ. Ӑна кӑҫал та йӗркелӗҫ. Хальхинче фестивале икӗ лапамра ирттерӗҫ.
Пӗлтӗр ҫырла фестивалӗ Хыркассинче «Ивушка» питомникре пулнӑ. Кӑҫал та унтах иртӗ. Кунсӑр пуҫне Шупашкарти Машиностроительсен проспектӗнче «ЦветыТорг» базинче (1-мӗш ҫуртӑн 6-мӗш корпусӗ) тепӗр лапам пулӗ.
Фестиваль икӗ кун иртӗ. Пӗрремӗш кунхине, утӑн 20-мӗшӗнче, Шупашкарта ҫырла кӑна мар, ытти тӗмӗ хунавӗсене те сутӗҫ. Чӑваш фермерӗсем те хӑйсен продукцийӗсемпе паллаштарӗҫ. Утӑн 21-мӗшӗнче профессионалсем питомнике кайӗҫ.
«Чӑваш ачи чӑвашах» 8-мӗш фестиваль ака уйӑхӗн 6-мӗшӗнче, шӑматкун, Муркаш муниципаллӑ округӗнчи Калайкасси шкулӗнче иртӗ. Уяв 9:00 сехетре вӑйӑ картипе пуҫланӗ.
Фестивале пуҫараканӗсем тата йӗркелекенӗсем – Чӑваш Республикин вӗренӳ институчӗ, Чӑваш наци ӑслӑлӑхпа ӳнер академийӗ, Чӑваш наци конгресӗ тата Муркаш муниципалитет округӗн Калайкасси вӑтам шкулӗ.
Фестивале тӑватӑ номинаципе хутшӑнма пулать: «Вӗрентетпӗр чӑвашла» (чӑваш чӗлхи предметне вӗрентмен учительсем хутшӑнӗҫ, чӑвашла уроксем кӑтартӗҫ); «Савӑнатӑп эп чӑваш пулнишӗн» (кӗҫӗн классенче вӗренекен ачасем чӑваш халӑхӗн пӗр-пӗр йӑлине кӑтартса парӗҫ); «Сар каччӑпа сарӑ хӗр» (7-9 классенче вӗренекен ачасем чӑваш халӑх историне, культурине, чӗлхине, йӑли-йӗркине пӗлнине ӑс-тӑн вӑййинче кӑтартӗҫ); «Тӑвалла пулсан та малалла» (чӑвашлӑх туйӑмне аталантаракан проекта вӗренӳ организацийӗн директорӗ (заведующийӗ) е унӑн ҫумӗ хӳтӗлӗ).
+20.3 °C