Чӑваш Енре оборона комплексӗн ӗҫченӗсем валли аренда ҫурт-йӗрӗ тума пуҫлӗҫ. Кун пирки республика Элтеперӗ «Комсомольская правда» хаҫата панӑ интервьюра палӑртса хӑварнӑ.
Олег Николаев ӗнентернӗ тӑрӑх, Чӑваш Ен ҫурт-йӗр хӑпартассипе малта пыракан регионсен шутӗнче. Республика ӳлӗмрен те малтисен шутӗнче пуласшӑн.
«Президент аренда ҫурт-йӗрне тӑвассипе ҫине тӑрса ӗҫлеме хушать. Хальлӗхе — оборонӑпа промышленность комплексӗн ӗҫченӗсем валли. Эпир вӑл программӑна кӗме палӑртатпӑр. Асӑннӑ комплекса кӗрекен предприятисенче тӑрӑшакансене ҫурт-йӗр мӗн чухлӗ кирлине тишкертӗмӗр. Ку программа пурнӑҫа кӗме тытӑнсан ҫурт-йӗр хӑпартассин кӑтартӑвне чакармасӑр тӑрӑшма май килӗ», – тенӗ республика ертӳҫи.
Шупашкар районӗнчи тӑватӑ ялта кӑҫал фельдшерпа акушер пункчӗсем тӑвассине эпир унчечн пӗлтернӗччӗ-ха. Етӗрне тӑрӑхӗнчи Вӑрманкас Асламасра та фельдшерпа акушер пункчӗ хӑпартма тытӑннӑ.
Чӑваш наци радиовӗ пӗлтернӗ тӑрӑх, строительсем никӗс хывнӑ. Вӑрманкас Асламас ялне хальхи вӑхӑтра «автобус ҫинчи медпункт килсе ҫӳрет, тухтӑрсене ял-йыша тӗрӗслеме май парать».
Ҫӗнӗ фельдшерпа акушер пунктне ҫӑва тухсан хута ярӗҫ.
Маларах асӑннӑ ҫӑлкуҫ пӗлтернӗ тӑрӑх, ҫӗнӗ медпункт Ҫӗрпӳ тӑрӑхӗнчи Рынкӑ салинче пулӗ.
Шупашкар хулинче пӗр рабочи ӗҫре йывӑр суранланнӑ.
Пӑтӑрмах кӑҫалхи кӑрлачӑн 11-мӗшӗнче 10 сехет те 30 минутра пулса иртнӗ. Хулари Зоя Яковлева урамӗнче нумай хваттерлӗ ҫурт тунӑ ҫӗрте ӗҫлекен электрогазосварщик 4-мӗш хутран 2-мӗш хута персе аннӑ. Арҫын вентиляци шахтине кӗрсе ӳкнӗ.
Инкек хыҫҫӑн РФ Следстви комитечӗн Чӑваш Енри управленийӗн тӗпчевҫисем пуҫиле ӗҫ пуҫарнӑ. Вӗсем шухӑшланӑ тӑрӑх, строительство организацийӗнче ӗҫ хӑрушсӑрлӑхӗшӗн яваплӑ специалистсем ҫителӗклӗ тӑрӑшман.
Чӑваш Енри икӗ хулара тата пӗр посёлокра шкулсем тума тытӑнӗҫ. Вӗсем Шупашкарта, Ҫӗнӗ Шупашкарта тата Кӳкеҫре пулӗҫ.
Республикӑн строительство, архитектура тата ҫурт-йӗрпе коммуналлӑ хуҫалӑх министрӗ Павел Данилов пӗлтернӗ тӑрӑх, заявкӑсене кӑҫалхи ҫу уйӑхӗнче Раҫҫей Вӗренӳ министерстви ырланӑ. Вӗренӳ учрежденийӗсене тума хыснаран 2,7 миллиард тенкӗ уйӑрса панӑ. Виҫӗ объекта 2024 ҫулхи раштав уйӑхӗн 31-мӗшӗччен туса пӗтермелле.
Шупашкарти «Хӗвеллӗ» микрорайонти химипе физика профильлӗ, 1400 ача вӗренмеллӗх шкула 3-мӗш строительство тресчӗ хӑпартӗ; Ҫӗнӗ Шупашкарти гуманитари профильлӗ, 1100 вырӑнлӑх шкула — «Старатель» строительство компанийӗ; Кӳкеҫри пӗтӗмӗшле пӗлӳ паракан 825 вырӑнлӑх шкула — Чӑваш Енӗн ипотека корпорацийӗ.
Шупашкарти «Университет» микрорайонта 1500 ача вӗренмелӗх шкул хута ярӗҫ. Ӑна 2024 ҫулхи утӑ уйӑхӗн 31-мӗшӗччен туса пӗтермелле.
Вӗренӳ учрежденине «Тус» строительство компанийӗ хӑпартӗ. Шкула тума хыснаран 1 миллиард та 408 миллион тенкӗ уйӑрӗҫ.
Асӑннӑ суммӑран 569,9 миллионне килес ҫул уйӑрӗҫ, 2024 ҫулта – 838,1 миллион тенкӗ.
Шкул Лукин урамӗнчи 5-мӗш ҫурт тӗлӗнче пулӗ.
Шупашкарти «Акварель» микрорайонта рабочисем тӑваттӑмӗш хутран ӳкнине Чӑваш халӑх сайчӗ пӗлтернӗччӗ-ха. Аса илтерер: инкек 2021 ҫулхи чӳк уйӑхӗн 23-мӗшӗнче пулнӑ. Арматура ҫыхнӑ чухне настил йӑтӑнса аннӑ. Арматурщиксем пӗрремӗш хутри юр ҫуса лартнӑ бетон ҫине персе аннӑ. Вӗсене пульницӑна илсе кайнӑ. Арҫынсем суранланса пӗтнӗ, вӗсен шӑмми хуҫӑлнӑ.
Субподрядчик ӗҫ хӑрушсӑрлӑхӗн йӗркине пӑхӑнман тесен прокуратура ӑна 35 пин тенкӗлӗх штрафланӑ. Халӗ усламҫа суд тунӑ. Вӑл йывӑрах мар преступлени тунине, унччен судпа айӑпланманнине шута илсе пуҫиле ӗҫе чарса лартнӑ. Ӑна 40 пин тенкӗ суд штрафӗ хурса панӑ.
Шупашкар хулин Кӑнтӑр-хӗвеланӑҫ районӗнче пурӑнакансем хӑйсен тӑрӑхӗнче вӑрман вырӑнӗнче ҫурт-йӗр комплексӗ хӑпартса лартассине хирӗҫ иккен. Ҫав вӑхӑтрах республика Элтеперӗ Олег Николаев асӑннӑ комплекс валли 1 миллиарда яхӑн тенкӗ инфраструктура кредичӗ пама йышӑну кӑларнӑ.
«Дубрава-парк» ҫурт-йӗр комплексне вӑрман вырӑнӗнче хӑпартмалла-мӗн. Унта нумай хваттерлӗ 19 ҫурт пулмалла-мӗн. Вӗсенчен 15-шне 10 хутран пуҫласа 21 хутлӑ тӑвасшӑн иккен.
10 миллион ытла тенкӗ тӑракан проект хальлӗхе хатӗр мар-мӗн-ха. Эскиз вара пур. Унта палӑртнӑ тӑрӑх, ҫурт-йӗр комплексӗ Миттов бульварӗ, Фруктовӑй, Тополинӑй урамсем тата Сугутка юханшывӗ хушшинче пулӗ.
Чӑваш Ен урлӑ иртекен «М-12» ҫула 2023 ҫулта хута яма палӑртаҫҫӗ. Нумаях пулмасть ҫак ыйтупа РФ Правительствин Председателӗн заместителӗ Марат Хуснуллин канашлу ирттернӗ.
Аса илтерер: машинӑсене хӑвӑрт ҫӳремелли ҫав ҫул пирӗн регионта 100 километар яхӑн пулӗ. Ӑна Ҫӗмӗрле, Вӑрнар, Йӗпреҫ, Комсомольски, Канаш тата Тӑвай районӗсем урлӑ сарӗҫ.
«М-12» ҫулӑн Мускаври МКАД патӗнчен пуҫӑнса Орехово-Зуево хули таранхи пайне кӑҫал хута ярӗҫ, Чӑваш Енри лаптӑка килес ҫул туса пӗтересшӗн.
«М-12» ҫула 2023 ҫулта хута ярасшӑн. Унпа Мускавран Хусана 6-7 сехетре ҫитме май килӗ.
Чӑваш Енре Республикӑн клиника больницин ҫӗнӗ комплексӗн проектне 2023 ҫул вӗҫӗнче туса пӗтермелле. Ӑна хатӗрлессине Раҫҫейӗн сывлӑх сыхлав министрӗ Михаил Мурашко ырланӑ.
Ырланӑ проектпа смета документацине 2023 ҫулхи раштав уйӑхӗнче хатӗрлесе ҫитерӗҫ. Раҫҫейӗн Сывлӑх сыхлав министерстви ҫӗршывӑн Стройминне асӑннӑ проекта 2023-2025 ҫулсенчи федерацин адреслӑ инвестици программине кӗртме сӗннӗ.
Ҫӗнӗ комплексра 1300 койка пулӗ. Проект валли бюджетра 174 миллион тенкӗ пӑхса хӑварнӑ.
Ҫӗнӗ комплекс Шупашкарти Солнечнӑй микрорайонта пулӗ.
Ӗнер, пуш уйӑхӗн 27-мӗшӗнче, Шупашкар хулинчи стройкӑсенчен пӗринче кран хыпса илнӗ. Вут-ҫулӑм тухнӑ вӑхӑтра кран кабининче машинист пулман.
Пушарпа кӗрешекенсем инкек вырӑнне пырса ҫитнӗ. Ҫулӑма вӗсем шыв сапса сӳнтернӗ.
Пушар тухнӑ вырӑн – хулари Радужный микрорайонти 6-мӗш ҫурт тӗлӗнчи лапам.
-3.7 °C