Шупашкарта Раҫҫей Паттӑрӗ Дамир Юсупов ячӗпе сак вырнаҫтарнӑ. «Мягая посадка» ятлӑ вӑл. Паттӑр пирӗн тӑрӑха виҫӗ кунлӑха килнӗ.
Астӑватӑр пулӗ: 2019 ҫулхи ҫурлан 15-мӗшӗнче Дамир Юсупов пилот Жуковский ҫывӑхӗнчи куккурус уйӗнче самолета ӑнӑҫлӑ антарса лартнӑ. Мускавран Симферополе вӗҫме тухнӑ самолет тӳпере чарлансем ҫине пырса кӗнӗ, ун хыҫҫӑн двигательсем ӗҫлеме пӑрахнӑ. Борт ҫинчи 233 ҫын чӗрех юлнӑ.
Палӑртмалла: 2000-мӗш ҫулсен пуҫламӑшӗнче Дамир Юсупов Шупашкарта И.Н.Ульянов ячӗллӗ ЧПУн юридици факультетӗнче вӗреннӗ.
Шупашкарти А.Г. Николаев ячӗллӗ аэропорта юсассипе ҫыхӑннӑ проекта патшалӑх экспертизи витӗр кӑларнине эпир ӗнер пӗлтернӗччӗ. Паян вара юсав ӗҫне хӑҫан тытӑнассине пӗлтӗмӗр. Калӑпӑшлӑ ҫав ӗҫ ҫурла уйӑхӗнче пуҫланӗ. Ку хыпара республикӑн Транспорт тата ҫул-йӗр хуҫалӑхӗн министерстви Фейсбукра пӗлтернӗ.
«Вӑрӑм хатӗрленӳ тапхӑрӗ ӑнӑҫлӑ иртсе кайрӗ. Шупашкар аэропортне юсамалли проект (ку ӗҫ уйрӑмах хӑрушӑ тата техника енчен кӑткӑс шутланать) Раҫҫейӗн тӗп экспертизи витӗр тухнӑ. Хальхи вӑхӑтра Шупашкарти аэропорт Федерацин сывлӑш транспорчӗн агентствине юсав ӗҫне тытӑнма ирӗк илме хутпа тухма хатӗрленет», — пӗлтерет министерство.
Аэровокзала юсаса ҫӗнетнӗ хысҫӑн унӑн лаптӑкӗ 5,5 пин тӑваткал метрпа танлашӗ. 10 хута яхӑн усӑ курман иккӗмӗш хутпа усӑ курма тытӑнӗҫ. Самолет патне иккӗмӗш хутран тухмалла тӑвӗҫ, аялта пассажирсене тӗрӗслемелли, регистрацилемелли тата багаж парса илмелли вырӑн пулӗ.
Самолётсем кӑҫал та Шупашкартан Симферополе вӗҫӗҫ.
Крыма кӑҫал пӗлтӗрхинчен иртерех — ҫу уйӑхӗн 30-мӗшӗнченех — ҫӳреме тытӑнӗҫ. Тепӗр тесен, кӑшӑлвируса пула Шупашкарти аэропорт пӗлтӗр ҫӗртме уйӑхӗн 1-мӗшӗнчен ҫеҫ ӗҫлеме пуҫланӑччӗ.
Симферополе кӑҫал та, пӗлтӗрхи пекех, икӗ авиакомпани илсе ҫӳрӗ. «Nordwindairlines» авиакомпани самолёчӗсем юнкунсерен тата вырсарникунсерен юпа уйӑхӗн 27-мӗшӗ таран хутлӗҫ. Шупашкартан самолёт 12 сехет те 10 минутра хускалӗ, Крымӑн тӗп хулине 15 сехет те 5 минутра ҫитӗ. Симферопольтен самолёт 8 сехет те 50 минутра ҫула тухӗ, 11 сехет те 20 минута Чӑваш Ене ҫитӗ.
«Smartavia» (Нордавиа) компани эрнекунсерен вӗҫӗ. Унӑн вӗҫев программи — ҫӗртме уйӑхӗн 4-мӗшӗнчен пуҫласа юпа уйӑхӗн 8-мӗшӗччен. Шупашкартан самолет 9 сехет те 15 минутра вӗҫсе кайӗ, палӑртнӑ вырӑна 12 сехете ҫитӗ, Симферопольтен 6 сехетре хускалӗ 8 сехет те 30 минута Шупашкарта анса ларӗ.
Шупашкартан Мускава авиапассажирсене турттаракан «Победа» авиакомпани ҫӗршывӑн тӗп хулине кунсерен виҫӗ рейс тума тытӑннӑ. Кӑнтӑрлахи ҫӗнӗ рейса суйланисене самолёт Мускаври Шереметьево аэропортне илсе ҫитерӗ.
Ҫапла вара «Победа» авиакомпани Шупашкара Мускаври икӗ аэропортран килӗ: Внуковӑран тата Шереметьевӑран.
Ӗнер, ҫу уйӑхн 11-мӗшӗнче, Шереметьевӑран пӗрремӗш рейса тунӑ та.
Унтан пирӗн пата 176 пассажир вӗҫсе килнӗ, Мускава 181 ҫын вӗҫсе кайнӑ.
Ӗнертенпе, ҫу уйӑхӗн 3-мӗшӗнченпе, Шупашкартан ҫӗнӗ авиарейс уҫӑлнӑ. Росавиаци патшалӑх субсидилекен авиамаршрутсен списокне пичетленине эпир кӑрлач уйӑхӗнчех пӗлтернӗччӗ. Аса илтерер: 266 маршрут шутӗнче Шупашкартан ытти хулана каякан 4 авиарейс та пурччӗ. Вӑл хуласем ҫаксем: Краснодар, Екатеринбург, Минеральные Воды тата Ҫӗнӗ Уренгой.
Екатеринбурга «РУСЛАЙН» авиакомпани тунтикунсерен тата кӗҫнерникунсерен илсе ҫӳрӗ. Тунтикун самолет 19 сехет те 25 минутра ҫула тухӗ, Екатеринбургран — 17 сехет те 10 минутра; кӗҫнерникун самолёт Шупашкартан 15 сехетре вӗҫсе кайӗ, Екатеринбургран — 12 сехет те 45 минутра.
Пассажирсене 50 вырӑнлӑх «CRJ100/200» самолётпа турттарӗҫ. 829 километра 1 сехет те 30 минут вӗҫӗ.
Чӑваш Енре юлашки вӑхӑтра санитари авиацийӗ аталаннине Чӑваш халӑх сайтне вулакансем пӗлеҫҫӗ ӗнтӗ. Кая юлмасӑр пулӑшмалли чирлӗ ҫынсене республикӑн аякри районӗсенчен Шупашкарти пульницӑсене илсе килеҫҫӗ. Пӗр пациента Мускава та вертолетпа илсе кайнӑччӗ.
Чирлӗ ҫынна ҫитес ҫӗре вӑхӑтра илсе каяссишӗн яваплисем — пилотсем. Ҫавӑн пеккисенчен пӗри — Ирина Долинина. Вӑл – иккӗмӗш пилот.
Санитари вертолёчӗн иккӗмӗш пилотӗнче ӗҫлекен
Ирина Мускав тӑрӑхӗнче ҫуралнӑ. Омскри вӗҫев училищинче вӗреннӗ. Хальлӗхе Ирина 200 сехет ытла вӗҫме ӗлкӗрнӗ. Кӗҫех вӑл сывлӑш суднин командирӗ пулӗ. Ирина космонавтсен отрядне лекме ӗмӗтленет.
Шупашкарти аэропорт ҫуллахи сезон ҫине иртнӗ уйӑх вӗҫӗнче куҫрӗ. Ҫавна май расписанире хӑш-пӗр улшӑну пулса иртнӗ.
«Победа» авиакомпанин Питӗр хулине вӗҫекен самолечӗсем урӑх вӑхӑтра ҫӳреме тытӑннӑ.
«ИрАэро» авиакомпани ака уйӑхӗн 1-мӗшӗнчен Минеральные Воды, Краснодар тата Ҫӗнӗ Уренгой хулисене самолетсем вӗҫтерет
Ҫу уйӑхӗнчен «Победа» лоукостер Мускава каякан кулленхи авиарейссен шутне виҫҫе ҫити ӳстерӗ. Ҫав уйӑхран «РусЛайн» авиакомпани Екатеринбурга вӗҫме тытӑнӗ.
Кӑнтӑр енчи хуласенчен Сочине асӑнма пулать. Унта «Победа» самолёчӗсем ҫу уйӑхӗн 28-мӗшӗнчен тытӑнса эрнере тӑватӑ хутчен вӗҫме пуҫлӗҫ. Ҫу уйӑхӗн 30-мӗшӗнчен Симферополе «Nordwindairlines» авиакомпани юнкунсерен тата вырсарникунсерен ҫӳреме тытӑнӗ. Ҫӗртме уйӑхӗн 4-мӗшӗнчен «SmartAvia» авиакомпанин эрнекунхи рейсӗсем хушӑнӗҫ.
Ҫӗртме уйахӗн 3-мӗшӗнчен Анапӑна «РусЛайн» авиакомпани кӗҫнерникунсерен вӗҫме тытӑнӗ.
Ӗнер «ИрАэро» авиакомпани Шупашкара пӗрремӗш рейспа килсе ҫитнӗ. Ҫӗнӗ Уренгой хулинчен 64 пассажир килнӗ. Вӗсенчен ҫурри ытла Минеральные Воды хулине ҫул тытнӑ. Самолетра пушӑ вырӑнсем 20 процентран ытла пулман. Апла тӑк ҫӗнӗ авиарейса пассажирсем кӑмӑлласа йышӑннӑ.
Ҫӗнӗ маршрутпа «Сухой Суперждип 100» самолет турттарать. Унта пассажирсем валли 103 вырӑн пӑхса хӑварнӑ.
Самолет Ҫӗнӗ Уренгойран юнкун хускалать, Шупашкара ҫитнӗ хыҫҫӑн ҫав кунах Минеральные Воды хулине тухса каять. Унтан Шупашкара таврӑнсан 18 сехет те 20 минутра Краснодара илсе каять. Краснодар крайӗнчен Шупашкара кӗҫнерникун 8 сехет те 40 минутра вӗҫсе килет. Ҫав кунах Ҫӗнӗ Уренгоя тухса каять. Минеральные Воды хулине 2 сехет вӗҫет, Ҫӗнӗ Уренгоя – 2 сехет те 50 минут, Краснодара – 2 сехет.
Ҫул укҫине йӳнетме республика бюджетӗнчен укҫа уйӑраҫҫӗ.
«Победа» авиакомпани ҫу уйӑхӗнче расписание виҫҫӗмӗш рейс кӗртӗ. Самолетсем кунсерен вӗҫӗҫ.
Шупашкарти аэропортра пӗлтернӗ тӑрӑх, хушма рейс ҫу уйӑхӗн 11-мӗшӗнчен уҫӑлӗ. Хушма рейспа каякансене самолет «Шереметьево» аэропорта илсе ҫитерӗ, унтанах илсе килӗ. Асӑннӑ аэропортран самолет 15 сехет те 35 минутра хускалӗ, Шупашкартан – 17 сехет те 25 минутра.
Мускаври икӗ аэропортран рейссем уҫнӑ май «Победа» акци ирттерет. Кун пирки Шупашкарти аэропорт Инсаграмра хыпарланӑ, авиакомпани вара хӑйӗн клиенчӗсене ҫырупа систернӗ. Акци вӑхӑтӗнче вӑл билетсене 499 тенкӗпе сутма йышӑннӑ.
Кавказ Чӑваш Енпе ҫывӑхланӗ. Ҫав вӑхӑт ҫитессе нумай кӗтме тивмӗ.
Шупашкарти аэропортра пӗлтернӗ тӑрӑх, пуш уйӑхӗн 3-мӗшӗнчен «ИрАэро» авиакомпани ҫӗнӗ маршрут уҫӗ. Самолетсене вӑл «Шупашкар – Минеральные Воды» маршрутпа ҫӳретӗ. Рейссем эрнере пӗр хутчен пулӗҫ: пуш уйӑхӗнче – юнкунсерен, ака тата ҫул уйӑхӗсенче – ытларикунсерен.
Кавказри Минеральные Воды – Раҫҫейӗн кӑнтӑр енчи чи паллӑ ҫичӗ хулинчен пӗри. Унта спа-центрсем тата ҫутҫанталӑкӑн илемлӗ вырӑнӗсем пур. Кавказри паллӑ хуласем: Пятигорск, Кисловодск, Ессентуки – Минеральные Воды хули ҫывӑхӗнче вырнаҫнӑ. Вӗсенчи санаторисенче сывлӑха ҫирӗплетме пулать. Сӑртлӑ-туллӑ вырӑнсене альпинистсемпе туристсем, сӑртран ярӑнма юратакан йӗлтӗрҫӗсемпе сноубордистсем те килӗштереҫҫӗ, мӗншӗн тесен унта – Европӑри чи ҫӳллӗ ту, Эльбрус.
-0.7 °C