Ӗнер, ҫурла уйӑхӗн 21-мӗшӗнче, Улатӑр хулинче пӗри машинӑпа иккӗри ача ҫине пырса кӗнӗ.
Пӑтӑрмах Ҫаран урамӗнчи 72-мӗш ҫурт тӗлӗнче 10 сехет те 45 минутра пулса иртнӗ. «Дэо Матиз» автомобиль водителӗ каялла чакса пынӑ чухне ҫул ҫине ӑнсӑртран чупса тухнӑ иккӗри хӗрача ҫине пырса кӗнӗ.
50-ри водитель йӗрке хуралҫисене ӑнлантарнӑ тӑрӑх, ачана вӑл асӑрхаман. Хӑй урах пулнӑ.
Инкек вӑхӑтӗнче ачапа пӗрле аслисем пулман. Ӑна пульницӑна ӑсатнӑ.
Хусантан Шупашкар курма килнӗ хӗрсем такси хускатса кайнӑ.
Хӑйсем ӳсӗр пулнӑ. Таксиста хула кӑтартса ҫӳреме ыйтнӑ. Машина заправкӑна кӗрсен водитель ҫӑраҫҫие автомобильтех хӑварнӑ.
Хӑнасем ҫавӑнпа усӑ курса машинӑна хускатса кайнӑ. Анчах нумаях та каяйман — карта ҫине пырса кӗнӗ. Хӑйсен водитель прави те пулман иккен.
Ҫын машинине хускатса кайнӑшӑн хӗрсем тӗлӗшпе пуҫиле ӗҫ пуҫарнӑ. Таксиста вӗсем 2 миллион тенкӗлӗх тӑкак кӳнӗ-мӗн.
Республикӑри «Автоледи» конкурс вӗҫленнӗ, ҫӗнтерӳҫӗсене палӑртнӑ.
Пӗрремӗш вырӑна Екатерина Матвеева йышӑннӑ, иккӗмӗш вырӑна – Марина Васильева, виҫҫӗмӗшӗне — Анастасия Чинаева тата Екатерина Ятрушева. Екатерина Матвеевӑпа Татьяна Петровӑна чи лайӑх пултарулӑх номерӗшӗн уйрӑммӑн палӑртнӑ.
Палӑртса хӑварар: кӑҫал конкурса 30 хӗр-хӗрарӑм хутшӑннӑ, анчах финала 12-шӗ ҫеҫ тухма пултарнӑ.
Чӑваш Енре чи маттур такисита палӑртнӑ. Ку ята Григорий Никоноров тивӗҫнӗ.
Такисистсен ӑмӑртӑвне 16 водитель хутшӑннӑ. Тӗрлӗ ӗҫе пурнӑҫласа чи нумай балл пухаканни Григорий Никоноров пулнӑ.
ҫӗнтерӳшӗн ӑна 15 пин тенке парса хавхалантарнӑ.
Килес ҫул вӑл Чӑваш Ен чысне Раҫҫей шайӗнче хӳтӗлӗ.
Чӑваш Енре «Автоледи» республика конкурсӗ иртӗ. Ӑна «Ҫул-йӗр ҫинчи хӑрушсӑрлӑх» проектпа килӗшӳллӗн йӗркелеҫҫӗ.
Конкурса 18 ҫул тултарнӑ, водитель правине илнӗ хӗрсемпе хӗрарӑмсем хутшӑнма пултараҫҫӗ. Вӑл икӗ пайпа иртӗ: теори тата практика. Ҫавӑн пекех пултарулӑх заданийӗсем пулӗҫ.
Заявкӑсене ҫак электрон адреспа йышӑнаҫҫӗ:
familycheb@mail.ru.
Паян, ҫӗртме уйӑхӗн 27-мӗшӗнче, ирхи 7 сехет те 30 минутра Шупашкарти Мускав проспектӗнче инкек пулса иртнӗ.
Ҫӗнӗ Шупашкарти 37 ҫулти хӗрарӑм-водитель сулахаялла пӑрӑннӑ чухне тепӗр транспорта ҫул паман. Ҫапла вара хӗрарӑмӑн «Фольксваген Поло» автомобилӗ «Хонда» мотоциклпа ҫапӑннӑ.
Вӑрнар тӑрӑхӗнчи 25 ҫулти водителӗн «А» категориллӗ водитель прави пулман. Анчах ҫакӑ ун ҫине пырса кӗмеллине пӗлтермест-ха.
Шар курнӑ мотоциклиста тухтар пулӑшӑвӗ кирлӗ пулса тухнӑ.
Ӗнер, ҫу уйӑхӗн 26-мӗшӗнче, Ҫӗмӗрле тӑрӑхӗнче «ВАЗ-2107» автомашина малтан «Лада Калинӑпа» ҫапӑннӑ, унтан — хирӗҫ килекен «Грантӑпа». Нихӑҫан та водитель прави пулман, анчах ӳсӗрле руль умне пӗрре ҫеҫ мар ларнӑ 28 ҫулти арҫын йывӑр суранланнӑ.
«Гранта» автомбилӗн 36 ҫулти водителӗпе «Калина» машинӑри 40 ҫулти пассажира та тухтӑр пулӑшӑве кирлӗ пулса тухнӑ.
Шупашкар хулинче сӗмсӗр водитель шар курнӑ. Хӑй мар-ха. Машини сиенленнӗ.
Инкек Шупашкарти Машина тӑвакансен урамӗнче пулса иртнӗ. Пӑтӑрмах видеорегистратор ҫине ӳкнӗ.
Ҫул ҫинчи инкекре Chevrolet Niva тата Toyota Camry автомобильсем шар курнӑ. «Тойота» ҫулӑн сылтӑм енӗпе пынӑ чухне кӗтмен ҫӗртен сулахай енне пӑрӑнса кӗнӗ. Ҫав самантра «Нива» ун ҫине пырса кӗнӗ.
Шупашкар хулинче пурӑнакансем хӑш-пӗр автомобилист хӑйӗн машинине Ҫӗнтерӗве 40 ҫул скверӗнче лартма юратнине асӑрханӑ. Хастарсем кун пирки ҫул-йӗр инспекторӗсене систернӗ.
Пакунлисем тӗрӗслеме вырӑна пырса ҫитнӗ. Темиҫе машинӑна Тӑван ҫӗршывӑн аслӑ вӑрҫинче пуҫ хунисене асӑнса лартнӑ мемориалпа юнашар тротуар ҫине лартса тухнине йӗрке хуралҫисем хӑйсен куҫӗпе хӑйсем курнӑ.
4 водитель тӗлӗшпе административлӑ протокол шӑрҫаланӑ май вӗсене пиншер тенкӗ штраф тӳлеттерӗҫ.
Шупашкарта пурӑнакан пӗр водитель ҫул-йӗр хӑрушсӑрлӑхӗн инспекторӗсене улталас тенӗ те анчах май килмен.
«Хендай Н-1» микроавтобус водительне пакунлисем пуш уйӑхӗн 15-мӗшӗнче ирхине асӑрханӑ. Йӗрке хуралҫисене курсан арҫын машинӑри хыҫалти ларкӑч ҫине куҫса ларнӑ, хӑй пассажир иккенне ӗнентерме пӑхнӑ.
Медицина тӗрӗслевӗ витӗр тухма вӑл килӗшмен. Тепӗр виҫӗ кунтан ун тӗлӗшпе пуҫиле ӗҫ пуҫарнӑ, ӑна руль умне ӳсӗрле тепӗр хутчен ларнӑшӑн явап тыттарӗҫ. Сӑмах май каласан, 2022 ҫулта унӑн правине туртса илнӗ пулнӑ иккен.
-8.7 °C