ВТБ банк менеджерӗ Михаил Осипов тивӗҫлӗ канури арҫынна ултавҫӑсене 7 миллион тенкӗ куҫарса парасран ҫӑлнӑ.
Ӗҫ-пуҫ ҫапла пулнӑ. Ватӑ арҫын банка пырса пухнӑ укҫине йӑлтах, процентсем ҫухалнине пӑхмасӑр, илесшӗн пулнӑ. Хӑй питӗ пӑлханнӑ. Менеджер сисчӗвленнӗ, пӗр иккӗленмесӗр полици чӗннӗ.
Кайран ҫакӑ паллӑ пулнӑ: ватӑ арҫын ҫӗрӗпе «ятарлӑ службӑсен» ӗҫченӗсемпе калаҫнӑ-мӗн. Лешсем унӑн укҫи хӑрушлӑхра пулнине, ӑна часрах «хӑрушсӑр счет» ҫине куҫармаллине ӗнентернӗ.
Михаил Осипова шалти ӗҫсен министрӗн тивӗҫӗсене пурнӑҫлакан Иван Языковӑн Тав хучӗпе чысланӑ.
Шупашкарта пурӑнакан тивӗҫлӗ канури хӗрарӑм Атӑл леш енне хура ҫырла пуҫтарма кайсан кашкӑра курнӑ.
Мария Капитонова ҫырла татнӑ чухне шӑв-шав илтнӗ – пӑши чупса иртсе кайнӑ. Хӗрарӑм пуҫне пӑрнӑ та 2 метр аякра кашкӑр тӑнине курнӑ. Вӗсем пӗр-пӗрин ҫине темиҫе минут пӑхса тӑнӑ. Унтан тискер чӗрчун ҫаврӑнса кайнӑ.
Хӗрарӑм шикленнӗ паллах. Анчах кашкӑр кайсан 150 метр аяккарах кайнӑ та малалла ҫырла пуҫтарнӑ.
Тепӗр эрнерен вӑл ӳпки шыҫнипе пульницӑна лекнӗ. Ахӑртнех, стреса пула чирленӗ. Анчах вӑрмана кайма пӑрахман вӑл.
Елчӗк округӗнчи Тӑрӑм ялӗнче пурӑнакан Антонина Емельянова 100 ҫул тултарнӑ.
Тӑван ҫӗршывӑн Аслӑ вӑрҫи вӑхӑтӗнче вӑл фронта тумтирпе тивӗҫтернӗ фабрикӑра ӗҫленӗ. Вӑрҫӑ пӗтсен колхозра дояркӑра тӑрӑшнӑ, кайран осеменатор пулнӑ. Кирек ӑҫта ӗҫлесен те вӑл тирпейлӗхӗпе, яваплӑхӗпе палӑрнӑ.
Шупашкарти таксист кинемее ултавҫӑсене укҫа парасран ҫӑлса хӑварнӑ. Укҫи сахал мар – 600 пин тенкӗ ытла.
89 ҫулти кинемей патне «телефон ҫыхӑнӑвӗнче ӗҫлекен ҫын» шӑнкӑравланӑ та «килӗшӗве тӑсмалла» тата «укҫана сыхласа хӑвармалла» тесе ӗнентерсе 600 пин ытла тенкине счет ҫинчен илме ӳкӗте кӗртнӗ. Кинемей укҫана сумкӑна хурса тепӗр региона парса яма тесе такси чӗннӗ.
Анчах таксист тӳрех сисчӗвленнӗ: кинемей шанчӑксӑртарах калаҫнӑ, вӗчӗрхеннӗ. Водитель укҫана кӳршӗ региона илсе каяс вырӑнне полицие ҫитнӗ. Кинемее укҫана тавӑрса панӑ, унпа тата тӑванӗсемпе калаҫу ирттернӗ. Таксиста вара Тав хучӗ панӑ.
Шупашкарта 85 ҫулти кинемей ҫухалнӑ. Ӑна Муркаш округӗнче тупнӑ. ЧР ШӖМӗ ку тӗслӗх пирки каласа кӑтартнӑ.
Паян ШӖМӗн Муркаш районӗнчи уйрӑмӗн пуҫлӑхӗн тивӗҫӗсене пурнӑҫлакан Владимир Милютин киле таврӑннӑ чухне Лантӑш ялӗ ҫывӑхӗнче ҫул хӗррипе кинемей утнине асӑрханӑ. Вӑл чарӑнса унпа калаҫнӑ. Кӑшт хутшӑнсан полицейски кинемей хӑй ӑҫта пулнине япӑх ӑнланнине ӑнкарнӑ. Кинемей хӑйӗн пирки те нимӗн те калайман.
Вырӑна ҫитнӗ Патшалӑх автоинспекцийӗн инспекторӗсем кинемее ҫывӑхри полици уйрӑмне илсе кайнӑ. Унта нимеҫӗсемпе пӗрле ватӑскер кам пулнине палӑртнӑ та тӑванӗсемпе ҫыхӑннӑ.
Чӑваш Енри пенсионер ултавҫӑсене 8,5 миллион тенкӗ куҫарса панӑ. Ку Ҫӗнӗ Шупашкарти арҫынпа пулнӑ.
65 ҫулти пенсионер патне вӑл ӗҫленӗ предприятин «хальхи ертӳҫи» тесе паллаштарнӑ ҫын шӑнкӑравланӑ. Украинӑна укҫа куҫарман-и тесе тӗрӗсленине пӗлтернӗ. Хайхискер пенсионера хӑратса пӗтернӗ, унӑн тӑванӗсем пирки йӑлтах пӗлнине каланӑ.
Кунпа вӗҫленмен-ха. Кайран арҫын патне «майор» текне ҫын шӑнкӑравланӑ. Вӑл пӗтӗм укҫине «ФСБ курьерне» парса яма хушнӑ.
Ултавҫӑсем арӑмӗн укҫине те куҫарса пама ыйтсан тин пенсионер хӑйне шӑнман пӑр ҫине лартса хӑварнине ӑнланнӑ та полицие кайнӑ.
Чрваш Енре пурӑнакан Мария Рытова 102 ҫул тултарнӑ.
Вӑл Канаш районӗнчи Шаккӑл ялӗнчӗ ҫуралса ӳснӗ. Ҫамрӑклӑхӗ вӑрҫӑ вӑхӑтӗнче иртнӗ: Мария Петровна окоп чавнӑ, вӑрман каснӑ, Хусан чукун ҫулне тунӑ ҫӗрте йывӑр чулсем турттарнӑ.
1945 ҫулхи ҫу уйӑхӗнче ӑна фронтран таврӑннӑ Иван Рытов асӑрханӑ, кӗҫех ҫамрӑксес ҫемье ҫавӑрнӑ. Мария Петровнӑпа Иван Кузьмич 6 ача ӳстернӗ.
Халӗ кинемейӗн – 11 мӑнук. Тата кӗҫӗн мӑнукӗсемпе вӗсен ачисем пур.
Муркаш округӗнчи Мӑн Сӗнтӗр ялӗ ҫывӑхӗнче пулнӑ аварире 2 ҫын вилнӗ.
Ку хӑрушӑ авари ӗнер 10:50 сехетре пулнӑ. ВАЗ-2104 ҫул хӗрринчен тухса ҫаврӑнма тӑнӑ та КамАЗпа ҫапӑннӑ.
Ҫӑмӑл машина, водителӗ, 1950 ҫулта ҫуралнӑ арҫын, тата унӑн 1954 ҫулта ҫуралнӑ йӑмӑкӗ вырӑнтах вилнӗ.
Элӗк округӗнче 76 ҫулти хӗрарӑм ҫухалнӑ. Ӑна «Лиза Алерт» шыравпа ҫӑлав отрячӗн хастарӗсем шыраҫҫӗ.
Димитриева (Дмитриева) Маргарита Петровна Шуркасси ялӗнче пурӑнать. Утӑ уйӑхӗн 21-мӗшӗнче вӑл килтен кайнӑ та таврӑнман. Тӑванӗсем вӑл ӑҫталла ҫул тытнине пӗлмеҫҫӗ. Вӑл ӑс-тӑн арпашӑннипе аптӑрама пултарать.
Ӑна куракансене ҫак номерсемпе шӑнкӑравлама ыйтаҫҫӗ: 8 800 700-54-52 (Раҫҫейре тӳлевсӗр) е 89876687081 (шырав инфоргӗ Виктория (Искрич).
Ҫӗмӗрлери комплекслӑ центр «Мобильлӗ вулавӑш» проекта пурнӑҫлама тытӑннӑ. Ӑна аслӑ ӳсӗмри вулакансене пулӑшас тӗллевпе йӗркелеҫҫӗ.
Проектпа килӗшӳллӗн, кӗнекесене ватӑ ҫынсене килех пырса каяҫҫӗ. Килтен тухса ҫӳрейменнисем патне те кӗнекесем йӑтса пыраҫҫӗ. Паллах, вӗсем куншӑн савӑнаҫҫӗ.
Татьяна Егоровна та ав хӗпӗртет. Вӑл кӗнеке тата тӗн литературине вулама юратать. Халӗ ӑна кӗнекесене килех пырса параҫҫӗ.
+22.3 °C