Паян Шупашкарта троллейбус ҫунма пуҫланӑ. Ҫакна курнӑ ҫын ӳкернӗ видео «Ютуба» лекнӗ.
Ку пӑтӑрмах паян Шупашкарти «Ҫутҫанталӑк» лавкка» общество транспорчӗн чарӑнӑвӗ патӗнче пулнӑ. Видеона пӑхсан ҫакӑ паллӑ: салонра ҫулӑм ялкӑшать, ӑна пушарнӑйсем киличчен ятарлӑ хатӗрпе сӳнтерме май килнӗ.
Сӑмах май, Шупашкарта автобуссем ҫуннӑ тӗслӗх те темиҫе хутчен пулнӑ. Кӑҫал кӑна 33-мӗш маршрутпа ҫӳрекен 2 автобусра ҫулӑм тухнӑ.
ЧР Транспорт министерстви хула ҫыннисене лайӑх хыпар пӗлтернӗ: Шупашкартан Ҫӗнӗ Шупашкара ҫӳрекен 331-мӗш маршрут ҫине вӑтам класлӑ автобуссем тухнӑ. Хальлӗхе унашкал 10 транспорт ҫӳрет. Ҫитес эрнере тепӗр 5 ҫӗнӗ автобус ҫула тухмалла Раштав уйӑхӗн 28-мӗшӗччен пӗтӗм автобуса ҫӗннисемпе улӑштармалла.
Ҫын нумай чухне автобус кашни 10 минутра ҫӳрӗ. Ытти вӑхӑтра - кашни 20 минутра.
Шупашкарта икӗ автобус маршрутне улӑштарма йышӑннӑ.
Телеграмри каналсенчен пӗринче хыпарланӑ тӑрӑх, ҫӗнӗлӗх 12-мӗш тата 41-мӗш маршрутсене пырса тивнӗ.
Хулари 12-мӗш автобус «Садовӑй» микрорайонтан «Благовещенски» микрорайона ҫӳреме тытӑннӑ. Автобуссен интервалӗ — 18 минут.
41-мӗш маршрутпа малашне пӗчӗк маршруткӑсем вырӑнне вӑтам тата пысӑк автобуссем ҫӳрӗҫ. Автобуссен 10 минутра пӗрре хутлӗҫ.
Шупашкар районӗнчи Вӑрманкаса (Хыркасси патӗнчине) маршрутка каллех ҫӳреме пуҫланӑ.
Асӑннӑ ялта пурӑнакансем яла общество транспорчӗ ҫӳреме пӑрахни пирки тӗнче тетелӗнче пӗр кунхине пӑшӑрханса пӗлтернӗ. 123-мӗш маршрутпа ҫынсене унччен микроавтобус турттарнӑ иккен, анчах авӑн уйӑхӗн 1-мӗшӗнче вӑл ҫула тухман.
Ҫак лару-тӑру пирки Чӑваш Енӗн Транспорт тата ҫул-йӗр хуҫалӑхӗн министерствине пӗлтернӗ. Халӗ каллех маршруткӑсем хутлама тытӑннӑ.
Шупашкарта хӑш-пӗр троллейбус маршручӗсене улӑштарасшӑн, 66-мӗш автобус маршрутне (вӑл маршрутпа общество транспорчӗ ҫӳремест) пӑрахӑҫласшӑн.
Йышӑну проектне Халӑх тӗрӗслевӗн порталӗнче вырнаҫтарнӑ.
Хулара 6, 8, 9 тата 11-мӗш троллейбуссен ҫулне улӑштарасшӑн, ҫавӑн пекех 5-мӗш троллейбуса маршрут ҫине кӑларасшӑн. Ку ӗҫе кӑҫалхи тӑваттӑмӗш кварталта пурнӑҫлама палӑртнӑ.
11-мӗш маршрутпа ҫӳрекен троллейбус каллех Чукун ҫул вокзалӗ патне ҫити ҫӳреме тытӑнӗ, 5-мӗш троллейбус Мир проспекчӗпе – Эгер бульварӗпе – Трактор тӑвакансен проспекчӗпе Маштехникум патне ҫити кайӗ.
Паян Лапсар тӑкӑрлӑкӗнче 52-мӗш маршрутпа ҫӳрекен автобус шӑтӑк-путӑка кӗрсе ларнӑ. Унта вӗсен бази вырнаҫнӑ.
Пӗлетӗр ӗнтӗ: унта шӑтӑк нумай, асфальт питӗ начар. Ҫумӑр ҫунипе лупашка мӗн тарӑнӑшне пӗлме те ҫук.
Ҫула хӑҫан юсӗҫ? Ку ӗҫе ҫитес ҫула куҫарнӑ. Ӑна суд йышӑнӑвӗпе килӗшӳллӗн юсамалла. Приставсем нимӗн те туманшӑн тӳре-шарана икӗ хутчен штрафланӑ.
Реконструкци 2-3 тапхӑрпа иртмелле. Кашниех 2-3 ҫула тӑсӑлӗ. Хальлӗхе ку ӗҫсене 1,5 миллиард тенкӗпе пурнӑҫлама палӑртнӑ.
Шупашкарта каллех 33-мӗш автобус ҫуннӑ. Хальхинче ку Трактор тӑвакансен проспектӗнче пулнӑ.
Автобус ирхи 8 сехет те 25 минутра ҫунма тытӑннӑ. Салонра ун чухне пассажирсем пулман, водитель автопарка кайма тухнӑ. Ҫулӑм двигателе сиенлетнӗ. Автобус мӗншӗн ҫунма тытӑннине уҫӑмлатаҫҫӗ.
Аса илтерер: нумаях пулмасть, ҫурла уйӑхӗнче, Шупашкарта 33-мӗш автобус ҫунса кайнӑччӗ. Инкек Мир проспектӗнче пулнӑччӗ. Салонри пассажирсем урама тухса ӗлкӗрнӗ.
«Нижний Новгород Онлайн» портал Чулхулари пӗр водительпе калаҫнӑ. Автобус рулӗ умӗнче 30 ҫул патнелле ларакан ҫын Чулхула облаҫӗн тӗп хулинче пассажирсене турттарас ӗҫри чи пысӑк ҫитменлӗхсем ҫинчен каласа панӑ.
Автобус водителӗсене ытларах енӗпе ӗҫ укҫин виҫи тивӗҫтермест иккен. Норма тӑрӑх уйӑхне 176 сехет ӗҫлемелле, анчах 50 пин пулин те ӗҫлесе илес тесе водительсем руль умӗнче 250–300 сехет те ирттереҫҫӗ.
Чулхулари тепӗр ҫитменлӗх: рейсра автобуссен йышӗ кирлинчен сахалрах пулни. Интервью илнӗ водитель каланӑ тӑрӑх, унӑн маршрутӗнче 10 автобус ӗҫлемелле, анчах чи лайӑх вӑхӑтра та ҫиччӗшӗ ҫеҫ ҫула тухаҫҫӗ. Хӑш-пӗр чухне тӑваттӑн ӗҫлени те пулкалать имӗш. Ҫакӑ саппас пайсем ҫуккипе ҫыхӑннӑ. Автобус гарантире пулсан саппас пайне савут ярса парать, ытти чухне вара вӗсене туянма пассажирсене турттаракан предприятийӗн укҫа ҫук. Паркра 130–135 автобус, анчах рейссене ҫӗртен сахалрах тухаҫҫӗ.
Водительсене уйрӑмах ватӑ ҫынсем питӗ килӗшмеҫҫӗ иккен — вӗсене тӳлевсӗр турттарма тивет. Парка таврӑннӑ хыҫҫӑн миҫе проезднойлӑ ҫынна е пенсионера турттарнине пӗрре те шута илмеҫҫӗ имӗш.
Ӗнер, авӑн уйӑхӗн 7-мӗшӗнче, Шупашкарта пӗр автобус инкеке лекнӗ. Пӑтӑрмахра 6 пассажир, ҫав шутра ҫул ҫитмен 2 ача, аманнӑ.
Инкек каҫхи 8 сехет ҫурӑ иртсен пулса иртнӗ. Энтузиастсен урамӗпе Никольский проспекчӗ хӗресленнӗ вырӑнта «Ford Tranzit» микроавтобус (руле 34 ҫулти арҫын тытса пынӑ) светофорӑн чару ҫутине пӑхмасӑр ҫулпа вӗҫтернӗ. Пассажирсене 44-мӗш маршрутпа турттаракан транспорт «BMW» ҫӑмӑл машинӑпа ҫапӑннӑ.
Инкекре 6 пассажир аманнӑ, вӗсене пульницӑна ӑсатнӑ.
Тӗнче тетлӗнчи халӑх ушкӑнӗсенчен пӗринчи «Кугеси | Общественный совет» (чӑв. Кӳкеҫ|Общество канашӗ) пабликра Шупашкар районӗнчи вӗренӳ заведенийӗсенчи лару-тӑру пирки паян икӗ пост вырнаҫтарнӑ. Пӗри пирки эпир маларах хыпарларӑмӑр-ха. Унта сӑмах Апашри шкул пирки пыратчӗ. Тепринче Кӳкеҫри 1-мӗш вӑтам шкул пирки каланӑ.
Пост авторне ӗненсен, шкул столовӑйӗ ыран ӗҫлемӗ, ҫавӑнпа уроксем 30 минута ҫеҫ тӑсӑлӗҫ тесе хыпарланӑ-мӗн.
Столовӑй ӗҫлеменнин сӑлтавӗ вара поварсем ҫуккипе ҫыхӑннӑ-мӗн. Шкул автобусӗсем те йӗркелллӗ ӗҫлемеҫҫӗ-мӗн. Виҫӗ автобусран пӗри ҫеҫ ҫӳрет.
+15.3 °C