Шупашкарти 4-мӗш гимнази валли тинех директор тупӑннӑ. Ку вырӑна унччен физкультура учителӗнче ӗҫленӗ Максим Валерьевич Антонов йышӑннӑ.
Палӑртмалла: гимназире 2022 ҫулхи авӑн уйӑхӗнченпе директор ҫук. Унччен директор унта Андрей Михайлов пулнӑ. Максим Валерьевич 1996-2002 ҫулсенче Йӗпреҫ округӗнчи Пысӑк Упакассинчи шкулта физкультура учителӗнче ӗҫленӗ. Кайран Йӗпреҫри 2-мӗш шкулта тӑрӑшнӑ, 2006-2018 ҫулсенче ӑна ертсе пынӑ.
Шупашкарти Машиностроительсен тӑкӑрлӑкӗнче, «ЦветыТорг» лавккан курттӑммӑн илмелли базӑра, ҫурт стенине графиттипе илемлетнӗ. Унччен ҫав икӗ хутлӑ ҫурт тӗксӗммӗн курӑнса ларнӑ. Вӑл - Текстильмаш корпусӗсенчен пӗри.
Ҫак илем авторӗ - Ксения Кокель ҫамрӑк ӳнерҫӗ. Вӑл Хевеш урамӗнчи 30-мӗш ҫурт ҫине чӑваш хӗрарӑмне ӳкернӗ.
Сӑмах май, утӑ уйӑхӗн 20-мӗшӗнче ҫак вырӑнта Ҫырла фестивалӗ иртнӗ.
Шупашкар хули 555 ҫул тултарнине халалласа ирттерекен уяв кунӗнче республикӑмӑр тӗп хулине «Стрижи» (чӑв. Вӗршӗн) авиаци ушкӑнӗ килӗ. Маттур лётчиксен ӑсталӑхӗпе хула ҫыннисем ҫурла уйӑхӗн 17-мӗшӗнчех киленме пултарӗҫ, мӗншӗн тесен ҫав кун пилотаж ушкӑнӗ тренировка ирттерӗ.
Авиашоу ҫурла уйӑхӗн 18-мӗшӗнче 12 сехетре Шупашкарти кӳлмекре иртӗ. «МиГ-29» самолётсем сехетре 900 километр ытла хӑвӑртлӑхпа вӗҫсе иртӗҫ. Пӗр самолётпа теприн хушши хӑш чух пӗр метртан та пӗчӗкрех пулӗ! Шоу ҫур сехете тӑсӑлӗ.
Асӑннӑ ушкӑн унччен Шупашкарта виҫӗ хутчен пулнӑ. Вӗҫев ушкӑнӗ Шупашкара ҫурла уйӑхӗн 14-мӗшӗнчех килӗ. Вӗсем шкул ачисемпе тӗлпулусем ирттерӗҫ.
Шупашкарти 34 ҫулти арҫын патне палламан ҫын шӑнкӑравланӑ та смспа килнӗ кода калама хушнӑ. Ку сим-карттӑна ӗҫлеттермешкӗн тӑсма кирлӗ-мӗн. Чӑннипе вара вӑл Патшалӑх пулӑшӑвӗсен порталне кӗмелли код пулнӑ. Кун пирки шӑнкӑравланӑ тепӗр ҫын, «ФСБ ӗҫченӗ», каланӑ. Вӑл ултавҫӑсем кредитсем ан илччӗр тесе арҫынна хӑйне кредитсем илсе «хӑрушсӑр счет» ҫине куҫарма ыйтнӑ.
Ку кӑна мар-ха, арҫын пӗрле пурӑнакан хӗрарӑма та ҫаплах тума хушнӑ. Ҫапла вӗсем «хӑрушсӑр счет» ҫине 6 миллиона яхӑн тенкӗ куҫарнӑ.
Паян, утӑ уйӑхн 29-мӗшӗнче, Мускавран Шупашкара килекен пуйӑс кая юлса ҫитӗ. Кун пирки Горьки чукун ҫулӗ асӑрхаттарнӑ.
Мурома состав расписанипе ҫитнӗ, «Арзамас-2» станцие — 56 минут юлса. Канаша вӑл 89 минут кая юлса ҫитнӗ. Ҫавна май Шупашкара та фирма пуйӑсӗ каярах килнӗ.
072Г-мӗш номерлӗ «Мускав – Шупашкар» графикпа килет. Шупашкара вӑл 13 сехет те 10 минутра ҫитӗ.
Утӑ уйӑхӗн 27-мӗшӗнче Каҫал тӑрӑхӗнче инкек пулса иртнӗ. «Ҫӗрпӳ-Чӗмпӗр» ҫулӑн 78-мӗш километрӗнче 8 сехет те 30 минутра «Мицубиси Лансер» автомобиль груз турттаракан «Рено» машинӑпа ҫапӑннӑ. «Рено» рулӗ умӗнче Дагестан ҫынни пулнӑ.
Ҫапӑннӑ хыҫҫӑн машинӑсем ҫул айккине кӗрсе кайнӑ, хыпса илнӗ. Ҫӑмӑл машинӑри 59 ҫулти водитель, Шупашкар арҫынни, инкек вырӑнӗнчех вилнӗ.
Малтанласа палӑртнӑ тӑрӑх, инкек сӑлтавӗ ҫӑмӑл машина хирӗҫ килекен ҫул ҫине тухса кайнипе ҫыхӑнма пултарнӑ. Водителе ҫав вӑхӑтра япӑх пулса кайма пултарнӑ.
ГАЗель водителӗ ӳсӗр пулнине ҫынсем асӑрханӑ. Кун пирки Патшалӑх автоинспекцине шӑнкӑравласа пӗлтернӗ.
Водителе Шупашкарти Иван Яковлев проспектӗнчи гаражсем патӗнче тытса чарнӑ. Вӑл ГАЗельпе сӗт юр-варне турттарнӑ.
Хайхискер инспекторсене турӑх кӑна ӗҫнине ӗнентерме хӑтланнӑ. Анчах алкотестер суйма паман - водитель эрех сыпнине кӑтартнӑ: сахал та мар, самаях ӗҫни палӑрнӑ.
Водитель тӗлӗшпе административлӑ материал ҫырнӑ.
«Лиза Алерт» шырав отрячӗн республикӑри хастарӗсем Шупашкарта пурӑнакан ҫамрӑк арҫынна шыраҫҫӗ.
34 ҫулти Евгений Алексеевич Гребенкин ӑҫтине пӗлмеҫҫӗ. Вӑл утӑ уйӑхӗн 18-мӗшӗнче ҫухалнӑ.
Ҫамрӑк арҫын пирки пӗлекенсене 8 800 700-54-52 телефон номерӗпе шӑнкӑравласа систерме ыйтаҫҫӗ.
Шупашкарти 51 ҫулти воспитатель ултавҫӑсене 2,3 миллион тенкӗ куҫарса панӑ.
Ун патне палламан ҫын шӑнкӑравланӑ, йӗрке хуралҫи-мӗн. Хайхискер ӑна пӗтӗм укҫине «хӑрушсӑр счет» ҫине куҫарма ӳкӗте кӗртнӗ. Хӗрарӑм ӗненнӗ, укҫи-тенкине йӑлтах темӗнле счет ҫине куҫарнӑ. Хӑйне улталанине вара кайран тин ӑнланнӑ.
Ку тӗслӗх тӗлӗшпе пуҫиле ӗҫ пуҫарнӑ.
Ӗнер, утӑ уйӑхӗн 25-мӗшӗнче, Шупашкарти Хальхи вӑхӑтри ӳнер центрӗнче «Савнӑ Шупашкар» курав уҫӑлнӑ.
Унта ятлӑ-сумлӑ сӑрӑ ӑстисен ӗҫӗсемпе пӗрлех ҫамрӑк художниксен те сумлӑ вырӑн йышӑнаҫҫӗ. Курава тӑван республикӑмӑрӑн тӗп хули 555 ҫул тултарнине халалланӑ.
Курава уҫма Чӑваш Енри художниксен союзӗн председателӗ Наталия Соловьева тата ыттисем хутшӑннӑ.
+22.3 °C