Паян Шупашкарта «Овас» суту-илӳ ҫуртӗнче пушар пулнӑ. Унта пӗрремӗш хутра вырнаҫнӑ сӗтел-пукан салонӗ ҫунма тытӑннӑ.
Пушар ирхи 9 сехетре тухнӑ. Ултӑ ҫын урама хӑйсем тӗллӗн тухайман, вӗсене ҫӑлавҫӑсем пулӑшнӑ.
Ҫулӑм 200 тӑваткал метр лаптӑк ҫинче алхаснӑ. Пушара 14 техника, 50 ҫӑлавҫӑ сӳнтернӗ. Телее, никам та шар курман.
Паян Шупашкарта ӑшӑ сечӗсем ҫинче икӗ авари пулнӑ. Кун пирки хула пуҫлӑхӗ Станислав Трофимов халӑх тетелӗнчи страницинче пӗлтернӗ.
Аварисем Пролетари урамӗнче тата Мир проспектӗнче пулнӑ. Пролетари урамӗнче специалистсем тӳрех ӗҫе пуҫӑннӑ. Мир проспектӗнче вара авари хӑш вырӑнта пулнине ҫийӗнчех тупса палӑртайман.
Чӑваш Енри калем ӑстисем кӑҫал та литература ёлкине пуҫтарӑнӗҫ. Вӑл Шупашкарти Хусанкай урамӗнче вырнаҫнӑ Халӑхсен туслӑхӗн ҫуртӗнче кӑрлач уйӑхӗн 10-мӗшӗнче 11 сехетре пуҫланӗ.
Кун пек ёлкӑна пирӗн республикӑра кӑҫалхипе ҫиччӗмӗш хут ирттереҫҫӗ. Унта поэтсем, писательсем, музыкантсем пуҫтарӑнӗҫ. Вӗсем иртсе кайнӑ ҫула пӗтӗмлетӗҫ, кӑҫалхи плансене палӑртӗҫ, сӑвӑсем вулӗҫ, юрӑсем юрлӗҫ.
Шупашкарти Дарья Васильева тата Лев Воскресенский Раҫҫейри ҫарпа истори обществин председеателӗпе Владимир Мединскийпе тӗл пулнӑ.
Мускавра пулнӑ ҫав ачасем Шупашкарти 65-мӗш вӑтам шкулти шахмат шкулне ҫӳреҫҫӗ иккен. Вӗсем ҫӗршыври чи лайӑх ҫамрӑк шахматистсен йышне кӗнӗ май Ҫар формин музейӗнче пулса курнӑ. Унсӑр пуҫне вӗсем Шахмат музейӗпе паллашнӑ.
Шупашкар «Раҫҫей хули. Наци суйлавӗ» конкурсӑн виҫӗ хут ҫӗнтерӳҫи пулса тӑнӑ! Вӑл сасӑлавра 2013 тата 2019 ҫулсенче те ҫӗнтернӗ.
Хапльхинче сасӑлав ӗнер, раштавӑн 31-мӗшӗнче, 12:00 сехетре вӗҫленнӗ. Шупашкар хули 181 пин ытла сасӑ пухса 1-мӗш вырӑн йышӑннӑ. Иккӗмӗш вырӑнта – Нальчик хули, виҫҫӗмӗш вырӑна вара Курск хули йышӑннӑ. Тӑваттӑмеш йӗркере — Иваново хули.
Чӑваш Енри муниципалитетсенче те Ҫӗнӗ ҫулта фейерверк яма чарасшӑн. Ҫакӑн пек сӗннӗ республика Элтеперӗ Олег Николаев.
«Шупашкар, Ҫӗнӗ Шупашкар, Улатӑр тата Етӗрне тӑрӑхӗсенче раштав уйӑхӗн 25-мӗшӗнчен пуҫласа кӑрлач уйӑхӗн 11-мӗшӗччен пушара хирӗҫ кӗрешмелли ятарлӑ режим йышӑннӑ. Ытти муниципалитета та вӗсенчен тӗслӗх илме сӗнетӗп», — тенӗ Элтепер.
Асӑннӑ хуласемпе районсенче ҫав вӑхӑтра пиротехникӑпа та усӑ курма чарнӑ.
Ҫӗнӗ Шупашкарта та Хӗл Мучин резиденцийӗ ӗҫлеме пуҫланӑ. Вӑл ачасене ӗнертенпе йышӑнать.
Резиденци Тӗкӗрҫ рашчинче вырнаҫнӑ. Вӑл раштав уйӑхӗн 31-мӗшӗччен 11 сехетрен пуҫласа 18 сехетчен ӗҫлет. Кӑрлачӑн 1-мӗшӗнче ачасене 14:00-18:00 сехетсенче йышӑнать. Кӑрлач уйӑхӗн 2-11-мӗшӗсенче вара 11 сехетре уҫӑлать те 18 сехетчен ӗҫлет.
Аса илтерер: Шупашкарта та Хӗл Мучи резиденцийӗ ӗҫлет. Вӑл кӳлмекре вырнаҫнӑ.
Ӗнер, раштав уйӑхӗн 29-мӗшӗнче, Сочирен Шупашкара вӗҫсе килекен самолет кая юлса килнӗ.
Кӑнтӑрлахи рейспа вӗҫсе килме хатӗрленнисем 6 сехет каярах юлса килнӗ. Самолет Сочирен вӑхӑтра ҫитейменрен Шупашкартан Сочие каякан рейс та палӑртнӑ вӑхӑтра ҫула тухайман.
Самолет ҫула юлса тухасси юлашки вӑхӑтра час-часах пулать. Пилотсӑр вӗҫекен аппаратсем кансӗрленӗрен та тепӗр чухне самолетсене тытса чараҫҫӗ.
Шупашкарта шкул ачи ултавҫӑсен аллине лексе амӑшӗн ылтӑн алки-эрешне парса янӑ. Пӗтӗмпе – 500 пине яхӑн тенкӗлӗх.
Раштавӑн 25-мӗшӗнче ун патне арҫын шӑнкӑравланӑ, вӑл маркетплейс ӗҫченӗ-мӗн. Хайхискер ача патне посылка килнине пӗлтернӗ, паспорт даннӑйӗсене тата СМС-ҫырупа килнӗ кода ыйтнӑ. Арҫын ача йӑлтах каланӑ.
Кун хыҫҫӑн ун патне палламан ҫынсем шӑнкӑравлама тытӑннӑ. Вӗсем ачана явап тыттарассипе хӑратнӑ, видеоҫыхӑну урлӑ хваттере кӑтартма ыйтнӑ. Алка-эрешсене курсан вӗсене «тӗрӗслемешкӗн» памалла тесе ӗнентернӗ.
Ача эрешсене курьера парса янӑ. Телефонра палламан ҫынсемпе ҫырӑнни хуралсан тин вӑл хӑйне улталанине ӑнланнӑ.
Шупашкарта 88-ти кинемей чутах ултавҫӑсене 170 пин тенкӗ парса яман. Вӑл ӑна чечек савӑчӗ ӑшне хунӑ та Хусана такси урлӑ ӑсатма тӑнӑ.
Кинемей такси чӗннӗ, водителе Хусана хутаҫсем тата чечек савӑчӗ леҫмеллине пӗлтернӗ. Шамиль Катдусов таксист ватӑ хӗрарӑм ҫухалса кайнине, хӑйне урӑхла тытнине сиснӗ. Вӑл ӑна улталама пултарнине ӑнкарса илнӗ. Вӑл сакккаса Хусана мар, полици участокне илсе ҫитернӗ. Полицейскисем чечек савӑтӗнче тӑпра ӑшӗнче 170 пин тенкӗ ытла тупнӑ.
Йӗрке хуралҫисем кинемейпе тепӗр талӑкран кӑна калаҫайнӑ, мӗншӗн тесен вӑл ултавҫӑсем хушнипе алӑка уҫман.
Акӑ мӗн пулса иртнӗ: ун патне палламан ҫын шӑнкӑравласа диспансеризаци тухмалли пирки каласа паспорт даннӑйӗсене ыйтса илнӗ. Кайран вара ҫак даннӑйсемпе «патшалӑха хирӗҫ усӑ кураҫҫӗ» тесе хӑратма пуҫланӑ.
Шамиль Катдусов таксиста ШӖМӗн Шупашкарти пуҫлӑхӗ Александр Темнов ватӑ хӗрарӑм пулӑшнӑшӑн тав тунӑ.
+2.3 °C