Шупашкарта юр ирӗлтермелли хатӗр кӗҫех ӗҫлесе каймалла. Ӑна пирӗн хулана кӑрлач уйӑхӗн 13-мӗшӗнче илсе килнӗ. Ӑна ӑҫта лартасси пирки шухӑшланӑ. Хатӗре Трактор тӑвакансен проспектӗнче вырнаҫтарнӑ.
Хатӗр пӗр сехетре 60 кубла метр юр ирӗлтерме пултарать. Хула админисрацийӗ пӗлтернӗ тӑрӑх, ҫапла майпа юра утилизаци тума май пулӗ.
Мӗнле ӗҫлет-ха вӑл? Юра унта хураҫҫӗ, вӑл ҫӳп-ҫапа уйӑрать. Ӑпӑр-тапӑр свалкӑна лекет. Таса юра бункерта ирӗлтереҫҫӗ. Шыв тасатмалли коллектора лекет, унтан – канализацие.
Шупашкарти пӗр урама Костромана халалласшӑн. Костромара вара Шупашкар урамӗ пулӗ. Ҫак шухӑша икӗ хула ырланӑ.
Кострома хула пуҫлӑхӗн сӗнӗвне Шупашкар хула пухӑвӗн депутачӗсем пӑхса тухнӑ. Вӑл Костромара пӗр урама Шупашкар ятне парас ыйтупа тухнӑ.
Костромара чылай урама, проспекта Раҫҫейри хула ячӗсене панӑ. Уйрӑмах – Атӑл хӗрринче вырнаҫнисен.
Сӑмах май, пирӗн те унашкаллисем пур: Чулхула, Ярославль, Ленинград, урамӗсем, Мускав проспекчӗ пур.
Следстви комитечӗ пӗлтернӗ тӑрӑх, Шупашкарта пӗр хваттерте 41 ҫулти арҫыннӑн виллине тупнӑ. Ӑна вӗлерме пултарнӑ ҫынна тытса чарнӑ.
Вӑл – Шупашкарта пурӑнакан 50 ҫулти арҫын. Следстви версийӗ тӑрӑх, кӑрлач уйӑхӗн 19-мӗшӗнче 23 сехет ҫурӑра пулнӑ ку. Ҫак 50 ҫулти арҫын, ӳсӗрскер, 41 ҫулти пӗлӗшӗн хваттерӗнче пулнӑ.
Вӗсем хирӗҫсе кайнӑ. Аслӑраххи кӗҫӗнреххине кӑкӑрӗ тӗлӗнчен икӗ хутчен ҫӗҫӗпе чикнӗ. Пӗлӗшӗ ҫавӑнтах вилнӗ.
Пуҫиле ӗҫе малалла тишкереҫҫӗ.
«ИрАэро» авиакомпани Шупашкартан пассажирсене ҫӗршывӑн тӗрлӗ хулине турттарма тытӑннӑ. Ҫапла вара асӑннӑ авиакомпани самолёчӗсемпе пирӗн республикӑран Краснодар, Минеральные Воды, Ҫӗнӗ Уренгой тата Дон ҫинчи Ростов хулисене ҫитме пулать.
Ҫула «Sukhoi Superjet 100» суперджетсем тухаҫҫӗ. Ҫӗнӗ Уренгойран самолёт эрнекун вӗҫсе килет. Вӑл унтан 12 сехетре хускалать, кунта 16 сехет те 50 минутра ҫитет. Краснодара пирӗн республикӑн тӗп хулинчен эрнекунсерен 17 сехет те 50 минутра тухса каять, 19 сехет те 50 минута ҫитерет.
Краснодартан Шупашкара шӑматкунсерен килме пулать. Унтан суперджет 7 сехет те 25 минутра ҫула тухса Шупашкара 9 сехет те 35 минутра ҫитерет. Ҫав кунах самолёт Дон ҫинчи Ростов хулине 11 сехетре вӗҫсе каять, унта 13 сехете ҫитет те каялла килме 14 сехетре тухать. Дон ҫинчи Ростоври пассажирсем Шупашкара 16 сехете ҫитеҫҫӗ. 17 сехетре самолёт кунтан Минеральные Воды хулине вӗҫсе каять, унта 2 сехетрен ҫитерет.
Минеральные Воды хулинчен Шупашкара самолётпа вырсарникунсерен килме пулать. Унтан самолёт 7 сехет те 40 минутра хускалса 9 сехет те 40 минута ҫитерет. Ҫав кунах самолётпа Ҫӗнӗ Уренгоя тухса кайма пулать.
Паян, кӑрлач уйӑхн 21-мӗшӗнче, Шупашкарти Сӗнтӗрвӑрри шосси ҫинче харӑсах темиҫе машина пӗр-пӗринпе пырса ҫапӑннӑ.
«Безопасный город» (чӑв. Хӑрушсӑр хула) аппаратпа программа комплексӗн ӗҫченӗсем пӗлтернӗ тӑрӑх,
Малтанласа шухӑшланӑ тӑрӑх, «Е377ТВ 21» номерлӗ «Гранта» ҫула май пыракан «Патриот» хӑваласа ҫитнӗ те унран иртес тесе хирӗҫ ҫул ҫине тухнӑ, унтан «Тойотӑпа» ҫапӑннӑ. «Тойота» «Соляриспа» тата «Нивӑпа» ҫапӑннӑ.
Инкекре никам та аманман. Инкекшӗн айӑплин хуҫи машинӑна страхламан пулнӑ-мӗн.
Красноармейски районӗнче пурӑнакан арҫын хӑйӗн ҫуралнӑ кунне Шупашкарта паллӑ тӑвас тенӗ. Тусӗпе пӗрле вӗсем хваттер тара илнӗ. Унта икӗ хӗрарӑма йыхравланӑ. Хайхисене вӗсен пӗлӗшӗсем сӗннӗ иккен.
Икӗ арҫынпа икӗ хӗрарӑм ҫуралнӑ куна аванах тунӑ. Ӗҫнӗ, ҫинӗ, савӑннӑ. Кайран арҫынсем тӳнсе кайнӑ.
Ирпе ыйхӑран вӑрансан арҫын хӑйӗн банк картти ҫинчи 7 пин тенкӗ укҫана темиҫе ӑстрӑмпа паллӑ мар ҫынна куҫарса панине асӑрханӑ. Арҫын йӗрке хуралҫисенчен пулӑшу ыйтнӑ. Вӑл вӗсене никама та хӑй аллипе укҫа куҫарса паманнине пӗлтернӗ.
Пакунлисем укҫа кам патне ҫитнине хӑвӑрт тупса палӑртнӑ. Ӑна арҫынсем патӗнче хӑнара пулнӑ хӗрарӑмсенчен пӗри, 33 ҫултискер, лешсем хуп турттарнӑ самантпа усӑ курса куҫарса панӑ иккен. Ҫын укҫине вӑрланӑшӑн халӗ ун тӗлӗшпе пуҫиле ӗҫ пуҫарнӑ.
Чӑваш Енре премьер-министра тата министрсене хваттер тара илсе пурӑннин тӑкакне хыснаран саплаштарӗҫ. Ҫавӑн пек йышӑну проектне Чӑваш Ен Элтеперӗн Администрацийӗ хатӗрленӗ.
Ҫӗнӗ йӗрке Министрсен Кабинечӗн Председательне, премьер-министрӑн ҫумӗсене, министрсене, Чӑваш Ен Элтеперӗн Администрацийӗн ертӳҫине, Раҫҫей Президенчӗ ҫумӗнчи Чӑваш Енӗн полпредне пырса тивӗ. Вӗсене тӑкака патшалӑх должноҫӗнче ӗҫленӗ вӑхӑтра саплаштармалла.
Хваттер тара илсе пурӑнас, ҫавӑншӑн хыснаран укҫа илес текен тӳре-шаран социаллӑ килӗшӳ мелӗпе е харпӑрлӑхри ҫурт-йӗр пуррипе ҫуккине шута илӗҫ. Асӑннӑ пурлӑх Шупашкарта, Ҫӗнӗ Шупашкарта, Шупашкар, ӗнтӗрвӑрри, Муркаш тата Ҫӗрпӳ районӗсенче пулсан тара илнин тӑкакне спалаштармӗҫ.
Шупашкар хулинче вӑйпитти арҫын 8 ҫулти ачан телефонне илсе тарнӑ. Анчах вӑл видеокамера объективне лекнӗ.
Пӑтӑрмах кӑрлач уйӑхӗн 12-мӗшӗнче пулса иртнӗ. «Чебоксарец» лавкка тӗлӗнчи ҫул урлӑ каҫмалли вырӑнти шкул ачи смартфонпа утнӑ. Вӑл видео пӑхса пынӑ. Ҫавна асӑрханӑ вӑйпитти этем ачаран телефон ыйтнӑ. Вӑл ӑна васкавлӑн шӑнкӑравласа илмелли пур тесе каланӑ. Кайран арҫын телефона туртса илнӗ те вырӑнтан тапса сикнӗ.
Йӗрке хуралҫисем видеокамера ҫине лекнӗ арҫын телефона туртса илнӗ тесе шухӑшлаҫҫӗ. Сӑнӳкерчӗкри этеме палласа илекенсене йӗрке хуралҫисене 8-999-756-45-85, 8-999-756-05-34 е 102 телефон номерӗсемпе пӗлтерме ыйтаҫҫӗ.
Шупашкар хулинче васкавлӑ пулӑшу машини ҫил-тӑман ҫунӑ хыҫҫӑн вӑхӑтра тасатман ҫул ҫинче путса ларнӑ. Чӑваш Енӗн патшалӑх телерадокомпанийӗнче кӑрлач уйӑхӗн 19-мӗшӗнче пӗлтернӗ тӑрӑх, тухтӑрсен машини «Байконур» микрорайонта лакса ларнӑ. Ӑна ҫынсем тӗксе кӑларнӑ.
Тележурналистсем шухӑшланӑ тӑрӑх, коммуналлӑ служба ӗҫченӗсем ҫуркуннене ҫитессе е юр ирӗлтерекен машина ӗҫлесе каясса кӗтеҫҫӗ курӑнать. Ҫав вӑхӑтрах хула ҫыннисен ӗҫе е вӗренӳ заведенине вӑхӑтра куллен ҫитмелле-ҫке, анчах ҫакӑ хӑш чухне чӑрмавлӑ пулса тухать. Маларах асӑннӑ васкавлӑ пулӑшу машинине тӗксе кӑларма хӑтланса, сӑмахран, ҫур сехет иртсе кайнӑ. Ӑна вара чирлӗ ҫын кӗтнӗ...
Шупашкар хулинче пӗр машина Чӑваш патшалӑх филармонине хирӗҫ вырнаҫнӑ ҫуртӑн путвалӗн ҫине пырса кӗнӗ. Те васканӑ ӗнтӗ, те айккинелле пӑхма хӑтланса пӑрӑнса кайнӑ, те тормоз йӗркеллӗ ӗҫлемен...
Президент бульварӗнчи 11-мӗш ҫуртӑн аялти хучӗн кирпӗч стени ҫине «Toyota Land Cruiser» маркӑллӑ автомобиль паян, кӑрлач уйӑхӗн 20-мӗшӗнче, пырса ҫапӑннӑ. Машинӑн патшалӑх номерӗ — О522ОО 21. ОСАГОн уҫӑ даннӑйӗсене ӗненсен, автомобиле 86 ҫулхи кинемей ячӗпе ҫыртарнӑ. Полисра ҫавӑн пекех 60 ҫулти арҫын ячӗ пур.
+8.1 °C