Паян Ҫӗнӗ Шупашкарта Промышленноҫ урамӗнче вырнаҫнӑ склад ҫуннӑ. Унта сӑрӑсем туса кӑлараҫҫӗ.
Ҫулӑм 100 тӑваткал метр лаптӑк ҫинче алхаснӑ. Тӳпенелле хӑпаракан ҫӑра хура тӗтӗм таҫтанах, Шупашкартан та, курӑннӑ. Ҫулӑма пушарнӑйсем хӑвӑрт сӳнтерме пултарнӑ.
Пушар склад ҫуртне сиенлетнӗ. Сӑрӑсем те ҫуннӑ.
Юпа уйӑхӗн 16-мӗшӗнче 17 сехет те 10 минутра Муркаш районӗнчи Иштерек ялӗнче трактор ҫунма пуҫланӑ. Унта МТЗ-80 трактора ҫулӑм ярса илнӗ.
Транспорт кабинин шалти отделки сиенленнӗ. Халӗ пушар мӗн чухлӗ тӑкак кӳнине шутлаҫҫӗ, ҫулӑм мӗнрен тухнине тишкереҫҫӗ.
Шупашкарти таксист пӗр кунхине ултавҫӑ капкӑнне ҫакланнӑ.
Юпа уйӑхӗн 13-мӗшӗнче вӑл палламан икӗ ҫамрӑка хула тӑрӑх турттарса ҫӳренӗ. Вӗсем малтан пӗр ҫӗре, унтан тепӗр ҫӗре кӗрсе тухма ыйтнӑ. Ҫамрӑксенчен пӗри ҫула май тенӗ пек хӑйӗн чуна ыраттаракан историне каласа кӑтартма тытӑннӑ: унӑн ачи чирлӗ имӗш, ӑна васкавлӑн сиплеме эмел туянас тесе укҫа пухать.
Таксист ҫамрӑк ашшӗне хӗрхеннипе ҫав ҫыннӑн банк картти ҫине 5 пин укҫа куҫарса панӑ. Тата тепӗр ҫӗре ҫитсен ҫамрӑксем таксиста ҫул укҫи тӳлеме тата кивҫен илнӗ укҫана тавӑрса пама шантарса машинӑран тухнӑ. Анчах водитель вӗсене кӗтсе илеймен. Унтан вӑл йӗрке хуралҫисенчен пулӑшу ыйтнӑ.
Улталаканни судпа унччен темиҫе хутчен те айӑпланнӑ (наркотикпа ҫыхӑннӑ пӑтӑрмахшӑн, вӑрланӑшӑн тата улталанӑшӑн) 20 ҫулти каччӑ пулнӑ. Унӑн ача-пӑча тавраш пулман. Пакунлисем ҫав каччӑ ҫавӑн пек мелпе тата ытти ҫынна та улталаман-ши тесе шанмаҫҫӗ.
Юпа уйӑхӗн 14-мӗшӗнче Хӗрлӗ Чутай районӗнчи Йӳҫпан ялӗнче ирхине грузовик каялла чакнӑ чухне 65 ҫулти хӗрарӑм ҫине пырса кӗнӗ. Аманнӑскере пульницӑна илсе кайнӑ. Анчах, шел те, вӑл реанимацире вилнӗ.
Машина ГАЗ-53 пулнӑ. Халӗ ҪҪХПИ инспекторӗсем ӗҫ-пуҫа уҫӑмлатаҫҫӗ.
Канаш районӗнче пӗр ҫамрӑк ҫулпа пынӑ чухне машина айне пулнӑ.
Инкек юпа уйӑхӗн 13-мӗшӗнче ҫурҫӗр иртсен Карӑклӑ ялӗ тӗленче пулса иртнӗ. Шупашкар хулинче пурӑнакан каччӑ (вӑл тӑрӑха ҫамрӑк хӑнана кайнӑ курӑнать) ҫулпа утса пынӑ. Ун ҫине «Лада Гранта» машина пырса кӗнӗ.
Суранланнӑ каччӑна больницӑна ӑсатнӑ.
Юпа уйӑхӗн 11-мӗшӗнче ирхи 3 сехет ҫурӑра Тӑвай районӗнчи Тӑрмӑш ялӗнче 46 ҫулти арҫын пӗрле пурӑнакан 45-ри хӗрарӑмпа вӑрҫӑнса кайнӑ.
Вӑйлӑ тарӑхнӑ арҫын хӗрарӑма пуҫӗнчен, кӑкӑрӗ тӗлӗнчен, кӗлеткин ытти пайӗнчен 38 хутран кая мар ҫӗҫӗпе чикнӗ. Лешӗ ку сурансем хыҫҫӑн чӗрӗ юлайман.
Арҫынна тытса чарнӑ. Ун тӗлӗшпе пуҫиле ӗҫ пуҫарнӑ.
Пӗр хӗрарӑма Вӑрнар районӗнчи пӳртӗн пӗр пайӗ халалласа хӑварнӑ. Анчах вилнӗ хӗрарӑмӑн упӑшки ҫӗнӗ хуҫана килне кӗртесшӗн пулман.
Халалланипе лекнӗ харпӑрлӑхшӑн арҫынпа ятлаҫса тӑман — суда яра панӑ, унта ҫитсе вӑл тавӑҫ шӑрҫаланӑ. Тӳре те хӗрарӑма майлӑ пулнӑ — ҫӗнӗ харпӑрлӑхҫӑна ҫурта кӗртме йышӑну тунӑ.
Ялти ҫурта хӗрарӑм суд приставӗсемпе пырса кӗрсен арҫын текех хирӗҫ тӑман.
Ӗнер Патӑрьел ҫывӑхӗнче 25 тонна утӑ ҫунса кайнӑ.
Инкеклӗ ӗҫсен министерствин Чӑваш Енри управленийӗнче пӗлтернӗ тӑрӑх, пушарпа кӗрешекенсене инкек пирки 17 сехет те 39 минутра пӗлтернӗ. Утӑ тӗркисем хыпса илнине куракансем пулнӑ, вӗсемех ҫӑлавҫӑсене чӗнсе илнӗ.
Пушар вырӑнне пырса ҫитнӗ специалистсем 150 тӗркене ҫӑлса хӑварнӑ. Пӗтӗмпе 25 тонна утӑ ҫунса кайнӑ. Пушар сӑлтавӗ ятарласа чӗртсе янипе ҫыхӑннӑ тесе шухӑшлаҫҫӗ.
Ӗнер Шупашкарта икӗ ҫамрӑк водитель темскер пайламан — ҫул варрине тухсах чышкисене ирӗке яма тытӑннӑ. Ҫакна вӑл вырӑнтан иртсе пыракан водитель ӳкерсе илнӗ. Видеона «За рулем» порталта вырнаҫтарнӑ.
Видео ҫинче икӗ каччӑ ҫапӑҫни курӑнать. Вӗсене пӗр хӗр ҫапӑҫасран уйӑрма хӑтланать. Ку пӑтӑрмах Шупашкарти Энтузиастсен урамӗнче пулса иртнӗ.
Ҫапӑҫу мӗне пула сиксе тухни тата мӗнпе вӗҫленни паллӑ мар.
Чулхула облаҫӗнчи Семенов районне кӗрекен Аристово ялне илсе каякан ҫул ҫинче йывӑҫ кӗпер йӑтӑнса аннӑ. Кун пирки «Кстати…» телеканал пӗлтерет.
Йывӑҫ кӗпер — ытти ҫӗрпе ҫыхӑнтаракан пӗртен-пӗр ҫул. Вӑл юрӑхсӑра тухни ҫинчен ял халӑхӗ тахҫанах пӗлтернӗ пулнӑ. Икӗ ҫул каялла суд та иртнӗ, вӑл йышӑну тунӑ тӑрӑх Чулхула облаҫӗн автомобиль ҫулӗсен Тӗп управленийӗн кивви вырӑнне ҫӗнӗ кӗпер тумалла пулнӑ. Анчах самай вӑхӑт иртнӗ пулин те ял халӑхне Ухтыш урлӑ каҫса ҫӳреме ҫӗнӗ кӗпер туса паман.
Темиҫе кун каялла вара пӗренесем тиенӗ йывӑр машшин айӗнче ҫав кӗпер хуҫӑлса аннӑ. Кӗперӗн пӗренисем ҫӗрсе кайнӑ иккен. Апла-и, капла-и, ял халӑхне кӗпер питӗ кирлӗ — вӗсен газ ҫук, килӗсене вутӑ хутса ӑшӑтаҫҫӗ. Ҫитмӗл ытла киле ҫитмӗл хут ытла хутлама тивет. Чи йывӑр виҫене кӑтартакан паллӑ та кӗпер умӗнче пулман. Авариллӗ кӗпере кӑтартакан палла вара вӑрман турттаракан машшина пула кӗпер хуҫӑлсан кӑна килсе лартнӑ.
Хальлӗхе хуҫӑлнӑ пӗренесем вырӑнне ҫӗннисем хурса кӗпере сапланӑ. Ҫӗннине хӑҫан тӑвасси паллах мар. Проекчӗ кӑна хатӗр иккен, вӑл та пулин экспертиза витӗр тухайман-ха…
+14.3 °C