Шупашкарти арҫын Гарри Поттер кӗнекисене сутатпр тесе ҫынсене улталанӑ. Унӑн серепине Мускав облаҫӗнче пурӑнакан хӗрарӑм лекнӗ.
ШӖМ пӗлтернӗ тӑрӑх, ака уйӑхӗнче ҫав хӗрарӑм полицие кайса заявлени ҫырнӑ. Вӑл тӗнче тетелӗнче Гарри Поттер пирки ҫырнӑ кӗнекесене 3500 тенкӗпе сутнине курнӑ. Сутуҫӑпа ҫыхӑнса хайхискер калаҫса татӑлнӑ, укҫана лешӗ кӑтартнӑ счет ҫине куҫарнӑ. Анчах тавар ун патне ҫитмен.
Ку ӗҫе Шупашкарта пурӑнакан 22 ҫулти каччӑ тунӑ-мӗн. Вӑл ӑнлантарнӑ тӑрӑх, унӑн кӗнекесем чӑнах та пулнӑ, анчах харӑсах туянакан икӗ ҫын тупӑннӑ. Иккӗшӗнчен те укҫа илнӗ, кӗнекене вара тепӗр сутуҫа панӑ.
Каччӑ тӗлӗшпе пуҫиле ӗҫ пуҫарнӑ.
Ҫу уйӑхӗн 27-мӗшӗнче Шупашкарти Лебедев урамӗнчи 25-мӗш ҫурт ҫывӑхӗнче арҫын виллине тупнӑ. Вӑл 30 ҫулсенчи пек курӑннӑ. Кун пирки «Про Город» хаҫата халӑх корреспонденчӗ пӗлтернӗ.
Ку инкек ҫур ҫӗр иртни 10 минутра пулнӑ. Малтанлӑха пӗлтернӗ тӑрӑх, ҫамрӑк арҫын 5-мӗш хутран ӳкнӗ. Вырӑна полицейскисем, следовательсем килнӗ.
Следстви комитечӗ пӗлтернӗ тӑрӑх, халӗ ӗҫ-пуҫа уҫӑмлатаҫҫӗ.
Ҫу уйӑхӗн 26-мӗшӗнче республикӑра икӗ пушар пулнӑ, вӗсенче пӗр ҫын суранланнӑ.
Каҫхи 7 сехетре Ҫӗмӗрле хулинчи Чехов урамӗнчи ҫурт ҫунма пуҫланӑ. Пушар сарая, мунчана тӗп тунӑ, ҫурт фронтонне сиенлетнӗ. Инкекре 1971 ҫулта ҫуралнӑ арҫын аманнӑ, унӑн ӳчӗн 80 проценчӗ пиҫсе кайнӑ.
Паян ҫур ҫӗр иртсен Канашра Толстов урамӗнчи йывӑҫ ҫурт ҫуннӑ. Хальлӗхе пушар мӗнрен тухнине уҫӑмлатаҫҫӗ.
Ку таранччен республикӑра 568 пушар пулнӑ. Вӗсенче 31 ҫын вилнӗ, 41 ҫын аманнӑ. 56 ҫынна ҫӑлнӑ.
Ӗнер, ҫу уйӑхӗн 25-мӗшӗнче, 15 сехет те 50 минутра Канаш хулин хӗвелтухӑҫ пайӗнчи микрорайонти 6-мӗш ҫуртра пушар тухнӑ. Унта тӗпелти диван ҫунма тытӑннӑ.
Пушар сӳнтерме Инкеклӗ лару-тӑру министерствин ӗҫченӗсем ҫитнӗ. Пушара сӳнтернӗ. Анчах, шел те, 77 ҫулти арҫын чӗрӗ юлайман – вӑл вилнӗ. Халӗ ӗҫ-пуҫа уҫӑмлатаҫҫӗ.
Сӑмах май, ҫулталӑк пуҫланнӑранпа республикӑра 566 пушар пулнӑ, вӗсенче 31 ҫын вилнӗ, 40-ӗн аманнӑ. 56 ҫынна ҫӑлма май килнӗ.
Шупашкарта Чӑваш Ен Правительствин машини светофорӑн хӗрлӗ ҫутипе каҫса кайнине асӑрханӑ.
Республикӑн ҫул-йӗр хӑрушсӑрлӑхӗн патшалӑх инспекцийӗн инспекторӗсем cheb.ru порталта вырнаҫтарнӑ видеона тишкернӗ. Ҫавӑн хыҫҫӑн водителе административлӑ майпа явап тыттарма йышӑннӑ. Хӗрлӗ ҫутӑпа каҫса кайнӑшӑн штраф виҫи — пин тенкӗ.
Правительство машинин (унӑн номерӗ — А017АА 121) водителӗ ҫу уйӑхӗн 13-мӗшӗнче хулари Ярославль урамӗнче ҫул-йӗр правилине пӑсса Тукташ урамӗ еннелле пӑрӑннӑ. Унччен ҫав машинӑри пассажир ларкӑчӗ ҫинче республикӑн культура министрне пӗрре ҫеҫ мар асӑрханӑ-мӗн.
Шупашкарти строительство организацийӗсенчен пӗринче рабочие ӗҫ укҫине вӑхӑтра тӳлемен. Кӑлтӑка хулари Мускав районӗн прокуратури тупса палӑртнӑ.
«КАН» тулли мар яваплӑ обществӑн директорӗ рабочисенчен пӗрне 2 уйӑх ытла укҫа тӳлемен. Парӑм 23 пин тенкӗрен иртсе кайнӑ. Ҫав вӑхӑтрах строительство компанийӗн укҫа пулнӑ, анчах ӑна вӑл урӑх тӗллевпе усӑ курнӑ.
Прокуратура директор тӗлӗшпе пуҫиле ӗҫ пуҫарнӑ. Тӗрӗслев вӑхӑтӗнче предприятире ҫынсене шалу тӳлемен ытти тӗслӗхе те, тен, тупса палӑртӗҫ.
Ҫӗмӗрле районӗнчи Вырӑс Улхашӗнчи ферма ҫивиттине витнӗ тимӗре такам вӑрлама пуҫланӑ. Пурлӑх пӗчӗккӗн-пӗчӗккӗн ураланнӑ.
Ферма япӑха-юхӑна пуҫланӑ пулин те унӑн хуҫин вӑрра иртӗхтерес килмен. Пуҫтаха тупса палӑртма йӗрке хуралҫисенчен пулӑшу ыйтнӑ.
Пакунлисем вӑрра йытӑпа шыранӑ. Титан Кросс ятлӑ полици йытти кирлӗ йӗр ҫине тӳрех лекнӗ. Вӑл пытанса ларнӑ каччӑсен тӗлне ҫитсе тухнӑ.
18-19 ҫулсенчи ҫамрӑксем хӑйсен айӑпне ҫийӗнчех йышӑннӑ, анчах фермӑн хуҫи пуррине вӗсем пӗлмен те иккен.
Чӑваш Енри ача-пӑча уйлӑхӗнче ферма уҫнӑ. Выльӑх-чӗрлӗхӗнне мар-ха. Майнинг-ферма.
Саккуна пӑсса ӗҫлекен ҫав заведени Ҫӗрпӳ районӗнчи «Звездный» ача-пӑча уйлӑхӗнче тӗпленнӗ.
Вӗренӳ учрежденийӗн директорӗ тӗлӗшпе пуҫиле ӗҫ пуҫарнӑ. Майнинг-ферма энергетиксене 800 пин тенкӗ ытлалӑх тӑкак кӳнӗ.
Криповалюта хатӗрлекен оборудовани уйлӑхӑн столовӑйӗнче пӗлтӗрхи чӳк уйӑхӗнченпе кӑҫалхи ака уйӑхӗччен ӗҫленӗ.
Оборудование кам кӗртсе вырнаҫтарнине тӗпчевҫӗсем палӑртӗҫ. Директор тӗлӗшпе пуҫарнӑ пуҫиле ӗҫе малалла тӗпчеҫҫӗ.
Шупашкарта пурӑнакан вӑйпитти арҫыннӑн хваттер укҫине туллин тӳлес килмен.
Пӗчӗк тупӑшлисен ҫав тӳлевӗн пӗр пайне саккунлӑ майпа саплаштарма май пур-ха. Анчах енчӗк ҫӳхине документпа ҫирӗплетсе памалла. Коммерци организацийӗн пуҫлӑхӗнче тӑрӑшакан 37 ҫулти арҫын суя справка илнӗ. Хӑй директорта ӗҫлет те справка илме йывӑр мар. Хут чӑтать теҫҫӗ.
Пӑтӑрмах 2017 ҫулта пулнӑ. Ҫав ҫулхи ҫу уйӑхӗнчен пуҫласа юпа уйӑхӗччен ҫемье бюджетран субсиди шучӗпе 22,5 пин тенкӗ илнӗ. Сумми пысӑках та мар, анчах ята кӗме нумай кирлӗ мар. Ултав ҫиеле тухсан усламҫӑ укҫана тавӑрса панӑ, апла пулин те ӑна пуҫиле майпа явап тыттарнӑ – суд 45 пин тенкӗ штраф хурса панӑ.
Паян, ҫу уйӑхӗн 23-мӗшӗнче, 12 сехет те 50 минутра «Шупашкар – Сӑр» автоҫул ҫинче, Шупашкар районӗнчи Ишекрен 5 ҫухрӑмра, авари пулнӑ. Шел те, ҫын та вилнӗ. Машина ҫунса кайнӑ.
Малтанлӑха пӗлтернӗ тӑрӑх, «Шевроле» транспорт хирӗҫ килекен ҫул ҫине тухнӑ та «Нивӑпа» ҫапӑннӑ. «Шевроле» ҫунма пуҫланӑ, «Нива» вара кювета чӑмнӑ.
Иномаркӑри 40 ҫулти хӗрарӑм вилнӗ, 43-ри водитель аманнӑ. «Нивӑри» 61 ҫулти водитель тата 2-ри ача суранланнӑ.
-2.7 °C