Паян – Раҫҫейри пичет кунӗ. Чӑваш Ен Элтепере Олег Николаев «журналистсене, фотокорреспондентсене, верстальщиксене, редакторсемпе тӗп редакторсене – информацие хатӗрлесе сарма хутшӑнакан тата ӑна республикӑра пурӑнакансем патне ҫитерсе тӑракан мӗн пур ҫынна» Раҫҫей тата Чӑваш пичечӗн кунӗсемпе саламланӑ.
«Сирӗнтен нумайӑшӗ пӗтӗм пурнӑҫне халалланӑ пархатарлӑ ӗҫӗр чӑннипех пысӑк яваплӑ. Професси ӑсталӑхӗ, анлӑ тавра курӑм, ҫынпа хутшӑнма тата тишкерӳ тума, информацин анлӑ юхӑмӗнче чи пӗлтерӗшлине тата ҫынсене кирлине шыраса тупма пӗлни, кӑткӑс темӑсене пурте ӑнланмалла уҫса пама пултарни – ҫакӑ пурте сирӗн ӗҫӗр пире, республикӑра пурӑнакансене, питӗ кирлине кӑтартса парать. Сире пула эпир тӗнчере, ҫӗршывра тата республика пурнӑҫӗнче пулса иртекен пулӑмсене тӗрлӗ енлӗн те тӗрӗс хак пама пултаратпӑр, тӗплӗн шухӑшласа пӗтӗмлетӳсем тӑватпӑр, хамӑра пурнӑҫра кирлӗ информаципе усӑ куратпӑр», — тенӗ саламра.
«Хыпар» издательство ҫурчӗн корреспонденчӗ «Мировая модель» (чӑв. Тӗнче моделӗ) конкурса хутшӑнӗ.
Татьяна Устинова издательство ҫурчӗ ирттернӗ «Краса масс-медиа Чувашии» (чӑв. Чӑваш Ен масс-медиавӗн илемӗ) конкурсра ҫӗнтернӗ мпй пӗтӗм тӗнчери «Мировая модель» (чӑв. Тӗнче моделӗ) конкурса тӳлевсӗр хутшӑнма сертификата тивӗҫнӗ. Конкурс ҫитес ҫулхи ҫуркуне Мускавра пулӗ.
Тӗп коронӑсӑр пуҫне Татьяна «Чӑваш Енӗн коммуникаципе масс-медиавӗн илемӗ» ята ҫӗнсе илнӗ.
Раштав уйӑхӗн 18-мӗшӗнче Пӗрремӗш канал чӑваш Хӗл Мучийӗпе Юрпикине кӑтартнӑ. Вӗсене «Жить здорово» кӑларӑма йыхравланӑ.
Аса илтерер: асӑннӑ кӑларӑма Елена Малышева тухтӑр ертсе пырать. Унта сывлӑха епле упрамалли, тӗрлӗ чир-чӗртен епле сывалмалли ҫинчен каласа кӑтартаҫҫӗ.
Телекӑларӑма хутшӑннӑ Хӗл Мучипе Юрпике — Чӑваш патшалӑх ӑкадеми драма театрӗнчен. Вӗсем Ҫӗнӗ ҫула чӑвашсем мӗнле кӗтсе илни, пӗр-пӗрне мӗн сунни, уявра мӗнле апат-ҫимӗҫпе сӑйланни ҫинчен каласа кӑтартнӑ.
Шупашкарта пурӑнакан Наталья Ершова 100 пин тенкӗ выляса илнӗ. Кун пирки Телеграмри «Пуринчен малтан» каналта пӗлтернӗ.
Наталья «Что? Где? Когда?» (чӑв. Мӗн? Ӑҫта? Хӑҫан?) телекӑларӑма кӑсӑклӑ ыйту ярса панӑ. «Пӗрисем ӑна хӑйӑр ҫинче хӑвараҫҫӗ, теприсем хӗрлӗ эрех этикетки ҫинче, виҫҫӗмӗшӗсем — мӑйӑр миххи ҫинче, тӑваттӑмӗшӗсем — ваза ҫинче. Пӗрисем ӑна йӑлана кӗнӗ йӗркепе палӑртнӑ, теприсем пачах палӑртман», — ҫакӑн пек ыйту хатӗрлене студентка. Вӑййа хутшӑнакансем ун хуравне пӗлеймен.
ЧР Элтеперӗ Олег Николаев «РИА Новости» реклама агентствине интервью панӑ. Унта вӑл халӑхшӑн уҫӑ пулнине палартнӑ.
Олег Алексеевич палӑртнӑ тӑрӑх, вӑл кунсерен лавккасенче пулать, урамра ҫӳрет, ун чухне ҫынсем ун патне пырса калаҫаҫҫӗ. «Ку савӑнтарать», – тенӗ Элтепер.
Вӑл каланӑ тӑрӑх, республика ертӳҫинче ӗҫлеме пуҫланӑ чухне ун патне ыйтусемпе ытларах пынӑ. Халӗ вара – ӗҫшӗн тав тума е пӗрле сӑн ӳкерӗнме.
Пушкӑртстанра тухса тӑракан «Урал сасси» хаҫат 35 ҫул тултарнине уявланӑ.
Унта «Хыпар» издательство ҫурчӗн ӗҫченӗсем те пулнӑ.
«Мӗн тери телейлӗ кун паян! Пуринчен ытла мана юратнӑ хаҫатӑм аякра, тӗрлӗ халӑх хушшинче, ниме пӑхмасӑр паянхи кун та ҫирӗппӗн малалла утни, аталанни, республикӑри мӗн пур чӑваша пӗрлештерсе тӑни савӑнтарать, мӑнаҫлантарать!
«Урал сасси» ача чухне мана ырӑ тӗслӗх кӑтартаканӗ, ҫул уҫса параканӗ пулнӑ! Халӗ те чуна ӑшӑтса, вӑй парса тӑрать», — хӑпартланса пӗлтернӗ издательство ҫурчӗн ача-пӑча кӑларӑмӗсен редакторӗ Елена Атаманова.
Ыран, чӳк уйӑхӗн 10-мӗшӗнче, «Культура» Чӑваш Енри турист маршручӗсемпе паллаштаракан кӑларӑм эфира тухӗ.
«Неизвестные маршруты России. Чувашия. Из Чебоксар к Мокринскому мосту» кӑларӑм 11 сехет те 30 минутра пуҫланӗ.
Ун вӑхӑтӗнче пирӗн тӑрӑхри кӑсӑклӑ маршрутсемпе паллаштарӗҫ. Ҫав шутра — Кӳкеҫри «Бичурин тата хальхи самана» музейпа та.
Пушкӑртстанри чӑвашсен «Урал сасси» хаҫатне кӑларса тӑма тытӑннӑранпа кӑҫалхи юпа уйӑхӗнче 35 ҫул ҫитнӗ. Ӗнер вара «Хыпар» издательство ҫуртӗнче асӑннӑ каларӑм редакторӗ Юрий Михайлов пулнӑ.
«Пелепейри информаци центрӗн «Урал сасси» хаҫат редакторӗ Юрий Николаевич Патӑрьел тӑрӑхӗнче ҫуралса ӳснӗ пулин те, чӗререн хисеплесе ентешех тесе калас килет манӑн ӑна. Юрий Николаевич Пушкӑртстанра ытларах та пурӑнать, вӑл унта ҫамрӑклах тӗпленнӗ», — хыпарланӑ халӑх тетелӗнчи хӑйӗн страницинче Пушкӑрт ҫӗрӗ ҫинче ҫуралса ӳснӗ, «Хыпар» издательство ҫурчӗн ача-пӑча кӑларӑмӗсен редакторӗ Елена Атаманова.
«Урал сасси» хаҫат хӑйӗн сумлӑ юбюилейне «хыпарҫӑсене» йыхравлама Шупашкара килнӗ.
Шупашкар округӗн «Тӑван Ен» хаҫатне «Хыпар» Издательство ҫурчӗпе пӗрлештерӗҫ. ЧР Цифра министерстви пӗлтернӗ тӑрӑх, ку ҫулсерен 900 пин тенкӗ перекетлеме май парӗ. Ку укҫана ӗҫченсен шалӑвне ӳстерме, типографи тата коммуналлӑ тӑкаксене саплаштарма ямашкӑн палӑртнӑ.
«Тӑван Ен» пӗрлешетернӗ хыҫҫӑн та Шупашкар округӗнче тухса тӑрӗ. Сӑмах май, хальхи вӑхӑтра Красноармейски тата Сӗнтӗрвӑрри округӗсен хаҫачӗсем «Хыпар» Издательство ҫуртӗнче тухса тӑраҫҫӗ.
Ӗнер, юпа уйӑхӗн 23-мӗшӗнче, чӑваш Улӑпӗ И.Я.Яковлев ҫут тӗнчерен уйрӑлса кайнӑ кун, Шупашкарта патриархӑмӑр палӑкӗ умне чечек хунӑ.
Кун пирки Лидия Филиппова журналист халӑх тетелӗнчи хӑйӗн страницинче пӗлтернӗ.
«Ӗнер Шупашкара тепӗр чӑваш Улӑпӗ Иван Казанков килсе ҫитрӗ.
Тӗрлӗ ыйтӑва сӳтсе явнипе пӗрлех ЮТВ телеканал валли «Ҫынсем. Ҫулсем. Еткерлӗх» — «Люди. Годы. Наследие» кӑларӑм ӳкертӗмӗр, И.Я.Яковлев палӑкӗ умне пуҫ тайса чечек хутӑмӑр… Наци радиовӗнче вара хӑйнеевӗрлӗ марафон иртрӗ – 2 сехете яхӑн тӳрӗ эфирта Иван Казанков ентешӗмӗр-мухтавӑмӑр пулчӗ…», — хыпарланӑ Лидия Филиппова.
+12.3 °C