Андрей Малаховӑн телекӑларӑмне чӑваш фермерне йыхравланӑ.
Ҫӗршыври паллаӑ телеертӳҫӗ Андрей Малахов ертсе пыракан «Привет, Андрей!» кӑларӑмне ентешӗмӗре чӗннӗ. Ҫав ҫын Элӗк муниципаллӑ округӗнчи Кирилл Степанов фермер.
Шоуна «Россия 1» (чӑв. Раҫҫей 1) каналпа кӑтартаҫҫӗ.
Чӑваш каччи телешоун черетлӗ кӑларӑмӑн хӑни пулӗ. Вӑл ӳкерӗннӗ передачӑна ҫу уйӑхӗн 2-мӗшӗнче эфира кӑларӗҫ.
Ялта ӳснӗ Кирилл ачаранпах ял хуҫӑлӑхӗпе кӑсӑкланнӑ. Малтан мускус кӑвакал ӗрчетсе пӑхнӑ, кайран хуҫалӑха пысӑклатса пынӑ. Степановсен картишӗнче паян 100 ытла ӑратлӑ выльӑхпа кайӑк-кӗшӗк, ҫав шутра павлинпа страус та пур. Унсӑр пуҫне пахчаҫимӗҫ тата тӗрлӗ чечек ӳстереҫҫӗ.
«Юрлама эпӗ пӗлместӗп, анчах Андрей валли парне хатӗрлерӗм. Мӗнле парне хатӗрленине сирӗн курмаллах», — тесе ҫырнӑ Кирилл хӑйӗн блогӗнче.
«Хыпар» издательство ҫурчӗ «Чӑвашлӑх – чунра» конкурс ирттернӗ, вӑл ӗнер вӗҫленнӗ. Ӑна Чӑваш чӗлхи уйӑхлӑхӗ пынӑ май йӗркерелес тенӗ. Конкурса хутшӑнакан ӗҫсемпе издательство ҫурчӗ «Контактра» соцсетьре хӑйӗн ушкӑнӗнче йӗркеленӗ.
Онлайн сасӑлав ҫӗнтерӳҫисем:
1. Наталия Муллина (Елчӗк округӗнчи Кӗҫӗн Таяпари культура ҫурчӗн культйӗркелӳҫи).
2. Тимур Катков (Шупашкарти 65-мӗш шкул вӗренекенӗ).
Эльвира Николаева (Кӳкеҫ шкулӗн кӗҫӗн классене вӗрентекенӗ).
3. Вероника Макарова (Комсомольски округӗнчи" Радуга" 3-мӗш ача сачӗн логопед вӗрентекенӗ).
Евгения Никифорова (Шупашкарти медколледжӑн 1 курс студенчӗ).
Жюри палӑртнӑ ҫӗнтерӳҫӗсем:
1. Злата Яблокова (Шупашкарти 6-мӗш шкул вӗренекенӗ).
2. Селиме Фадеева (Сӗнтӗрвӑрри округӗнчи Хуракасси шкулӗн вӗренекенӗ)
Матвей Платонов (Шупашкарти 78-мӗш ача садне ҫӳрекен).
3. Елисей Клементьев (Красноармейски округӗнчи Упи шкулӗн вӗренекенӗ).
Алина Иванова (Йӗпреҫ округӗнчи Пучинкери «Колосок» ача сачӗн воспитателӗ).
Надежда Петухова (Елчӗк округӗн. Лаш Таяпа культура ҫурчӗн культйӗркелӳҫи).
«Хыпар» издательство ҫурчӗн дизайнерне Чӑваш Республикин Хисеп грамотипе чыслама йышӑннӑ. Тӳрех палӑртса хӑварар: унта темиҫе верстальщик ӗҫлет. Хисеп грамотине тивӗҫни — Лидия Шумова.
Эпир пӗлнӗ тӑрӑх, Лидия Николаевна ӗҫ вырӑнне ылмаштармасӑр чылай ҫул пӗр вырӑнта тимлет.
Лидия Шумовӑна пысӑк шайри грамотӑпа чысласси ҫинчен калакан Хушӑва республика Элтеперӗ Олег Николаев ака уйӑхӗн 15-мӗшӗнче алӑ пуснӑ. 45-мӗш номерлӗ хушӑва республикӑн влаҫ органӗсен официаллӑ порталӗнче вырнаҫтарнӑ. Тӗрлӗ шайри ят-сума тивӗҫнисем вӑл документра тата пур.
Сӑмах май каласан, Лидия Шумова темиҫе ҫул каялла Раҫҫей Федерацийӗн Ҫыхӑну тата массӑллӑ коммуникацисен министерствин Хисеп грамотине тивӗҫнӗ.
Ҫак эрнере Чӑваш Енри хаҫатсенчен пӗрин редакторне «Чӑваш Республикин культурӑн тава тивӗҫлӗ ӗҫченӗ» хисеплӗ ята пама йышӑннӑ. Кунта сӑмӑх Комсомольски тӑрӑхӗнчи «Каҫал ен» район хаҫачӗн тӗп редакторӗ Алевтина Ефремова пирки пырать.
Сӑмах май каласан, асӑннӑ хаҫӑтӑн пӗрремӗш номерӗ 1931-меш ҫулхи нарӑс уйӑхӗн 8-мӗшӗнче кун ҫути курнӑ. Ӑна Патӑрьелте «Паянхи сас» ятпа пичетлесе кӑларнӑ.
1932 ҫулта ҫав кӑларӑм икӗ хаҫата пайланнӑ: «Колхоз байрагы» тата «Октябрь ялавӗ». Икӗ хаҫачӗ те Патӑрьелте тухса тӑнӑ. 1939 ҫулта Комсомольски районне туса хунӑ хыҫҫӑн «Октябрь ялавӗ» хаҫат Комсомольскине куҫнӑ. Паян вӑл кӑларӑм «Каҫал ен» ятпа пичетленсе тухать, унта район пурнӑҫӗ ҫинчен каласа кӑтартаҫҫӗ.
Наци телевиденийӗн аслӑ редакторӗ Ирина Лампасова – «Пӗтӗм чӑваш диктанчӗ – 2026» акци сӑн-сӑпачӗ. Ҫакӑн пек хыпарланӑ Чӑваш Республикин Вӗренӳ институчӗн сайтӗнче.
Институтра пӗлтернӗ тӑрӑх, «йӑлана кӗнӗ тӑрӑх, кашни ҫулах чӑвашлӑха аталантаракан, тӑван халӑхӑн чӗлхипе культурине аталантарас ӗҫре ҫитӗнӳ тунӑ, ырӑ ӗҫсемпе палӑрнӑ чӑваш халӑхӗн хастар ывӑлне-хӗрне диктант сӑн-сӑпачӗ пулма» палӑртаҫҫӗ.
Кӑҫал «Пӗтӗм чӑваш диктанчӗ – 2026» акци сӑн-сӑпачӗ пулма Ирина Лампасовӑна палӑртнӑ.
Ирина Лампасова 1992 ҫулта Комсомольски районӗнчи Анат Тимӗрчкасси ялӗнче ҫуралнӑ. И.Я. Яковлев ячӗллӗ Чӑваш патшалӑх педагогика университечӗн икӗ факультетне (историпе филологи (2009–2014) тата управлени (2010–2015)) харӑсах вӗренсе пӗтернӗ. 2014 ҫултанпа Чӑваш патшалӑх наци телерадиокомпанийӗнче вӑй хурать: Чӑваш наци радиовӗн редакторӗ, унтан – музыка редакторӗ, халӗ – Наци телевиденийӗн аслӑ редакторӗ.
Чӑваш Енри педагогсем телешоуна хутшӑнма пултарӗҫ. «Раҫҫей» телеканалпа кӑтартакан «Классная тема» телешоун пиллӗкмӗш тапхӑрне хутшӑнма заявкӑсем йышӑнма пуҫланӑ.
Учительсен ҫу уйӑхӗн 31-мӗшӗччен заявка парса ӗлкӗрмелле. Ырласан вӗсем хӑйсен ӗҫне федераци телеканалӗпе кӑтартма пултарӗҫ.
Телекӑларӑма физика, хими, биологи, математика, географи, истори, вырӑс чӗлхипе литературин учителӗсем хутшӑнайӗҫ.
Заявка париччен анкета ҫырмалла, предметпа тест тӗрӗслевӗ витӗр тухмалла, видеовизитка хатӗрлемелле. Шоура ҫӗнтернӗ вӗрентекенӗн федераци каналӗпе кӑтартма каларӑмсен ярӑмӗ хатӗрлес шанчӑк пур.
Шоун тӑваттӑмӗш тапхӑрӗнче Шупашкарти Светлана Мыльникова ҫурма финала лекнӗ. Вал Арктикӑпа паллаштаракан видеоурок хатӗрленӗ.
«Хыпар» Издательство ҫуртне малашне Дмитрий Моисеев ертсе пырӗ. Кун пирки калакан хушӑва ӗнер ЧР Министрсен Кабинечӗн Председателӗ Сергей Артамонов алӑ пуснӑ, паян влаҫ органӗсен порталне вырнаҫтарнӑ.
Дмитрий Андреевичшӑн ку ҫӗнӗ ӗҫ мар. Вӑл «Хыпар» Издательство ҫуртӗнче тӗп редактор ҫумӗнче нумай ҫул тӑрӑшнӑ. Ун хыҫҫӑн Чӑваш Республикин Медиацентрне ертсе пынӑ.
Аса илтеретпӗр: унччен «Хыпар» Издательство ҫурчӗн директорӗ-тӗп редакторӗ Виктория Вышинская пулнӑ. Ӑна кӑҫал нарӑс уйӑхӗн 10-мӗшӗнче ӗҫрен кӑларнӑ.
«Хыпар» издательство ҫурчӗн ача-пӑча кӑларӑмӗсен редакцийӗ Ҫӗнӗ ҫул умӗн «Капӑр чӑрӑш» конкурс йӗркеленӗ. Ача-пӑча кӑларӑмӗсен редакторӗ Елена Атаманова «Контактра» халӑх тетелӗнчи хӑйӗн страницинче пӗлтернӗ тӑрӑх, республикӑн тӗрлӗ кӗтесӗнчен чылай вӗренекен хутшӑннӑ, ҫакӑ йӗркелӳҫӗсене питӗ савӑнтарнӑ.
«Ал ӑстисем пирӗн пӳлӗме ытарма ҫук хитре чӑрӑшсемпе тултарчӗҫ. Уйрӑмах Елчӗк, Патӑрьел, Йӗпреҫ, Комсомольски тата Шупашкар тӑрӑхӗсенчи шкул ачисем хастар пулчӗҫ», — тесе ҫырнӑ Елена Атаманова.
Ҫак кунсенче ҫӗнтерӳҫӗсене вырӑна ҫитсех чыслама тӗв тунӑ. Патӑрьелти 1-мӗш шкулти тата Елчӗк шкулӗнчи хастарсем дипломлӑ пулса тӑнӑ. Кӗҫех ытти тӑрӑха та ҫитсе килесшӗн, ҫӗнтерӳҫӗсене хавхалантарасшӑн.
Ӗнер, пуш уйӑхӗн 16-мӗшӗнче, «Поле чудес» (чӑв. Тӗлӗнтермӗш уйӗ) телекӑларӑма чӑваш хӗрарӑмӗ мӑнукӗпе хутшӑннӑ.
Аса илтерер: телекӑларӑма Пӗрремӗш каналпа эрнекунсерен кӑтартаҫҫӗ.
Алина Артемьева капитал-шоун уяв умӗнхи кӑларӑмӗн хутшӑнаканӗ пулнӑ. Вӑййа Пӗтӗм тӗнчери хӗрарӑмсен кунне халалланӑ. Пирӗн ентешӗн «ерохвостка» сӑмаха пӗлмелле пулнӑ. Раҫҫей ҫурҫӗрӗнче пурӑнакансем ытла талпӑнуллӑ хӗрарӑма ӗлӗк ҫапла каланӑ.
Алина мӑнукӗ Ева чӑвашла юрӑ юрланӑ тата сӑвӑ вуласа панӑ. Леонид Якубович ӑна пукане парнеленӗ, анчах вӑл тӳрех хӑйӗн шӑллӗсемпе йӑмӑкне аса илнӗ — вӗсем валли те парне ыйтнӑ. Ҫапла вара ӑна тата тепӗр пукане, шӑллӗсем валли те парне панӑ.
Ева чӑвашла хитре калаҫать, амӑшӗн амӑшне вӑл куками тесе чӗнет.
Чӑваш Енри кинорежиссер Юрий Спиридонов «Привет, Андрей» (16+) шоу хӑни пулнӑ. Аса илтерер: ӑна «Раҫҫей-2» телеканалпа шӑматкунсерен тата вырсарникунсерен кӑтартаҫҫӗ.
Хальхинче кӑларӑм теми — атте-анне килӗ. Юрий Спиридонов Раиса Дьякован «Отпели в деревне гармони» (чӑв. Ялта хуткупӑс янӑрама пӑрахрӗ) сӑввине вуласа панӑ тата ялти ачалӑхне, хӑйне усрава илнӗ ашшӗ-амӑшне, Прасковья кукамӑшне аса илнӗ.
Кинорежиссер хӑйӗншӗн ял ҫывӑх пулни ҫинчен асӑнса хӑварнӑ, тымара манмалла маррине, тӑван вырӑнсемпе йӑла-йӗркене упраса хӑварни пӗлтерӗшлӗ пулнине палӑртса хӑварнӑ.
Ҫакӑн пек тӗлпулусем пире тӑван килӗмӗре, ачалӑх саманчӗсене тата юратнӑ ҫыннӑмӑрсене хаклама вӗрентеҫҫӗ. Кинорежиссерӑн калаҫӑвӗ кашни кураканӑн чунне ӑшӑтма тивӗҫ, мӗншӗн тесен тӑван кӗтес кашнишӗн чи хаклӑ вырӑн шутланать. Пирӗн пултаруллӑ ентешӗмӗрпе мӑнаҫланатпӑр тата ӑна ҫӗнӗ ҫитӗнӳсем сунатпӑр.
+6.3 °C