Арҫын хӑй ӗҫленӗ предприятие ҫаратнӑ. Кун пирки ШӖМ пӗлтерет. Вӑл унтан тимӗр-тӑмӑр вӑрланӑ.
35 ҫулти арҫын чукун ҫул предприятийӗнче ӗҫленӗ. Вӑл тимӗр-тӑмӑр упранакан пӳлӗме кӗнӗ те унтан 5 тонна ытла лум вӑрланӑ. Пӗтӗмпе – 120 ытла пин тенкӗлӗх.
Арҫын ӑна хӑйӗн машини ҫине тиесе илсе тухнӑ. Анчах ҫул ҫинче ӑна полицейскисем тытса чарнӑ.
Канаш арҫынни тӗлӗшпе пуҫиле ӗҫ пуҫарнӑ. Вӑл куншӑн колоние 5 ҫул таран ларма пултарать.
Канашри нумай хваттерлӗ ҫуртра пушар тухнӑ хыҫҫӑн ытти ҫӗрти ҫуртсене те тӗрӗслӗҫ.
Асӑннӑ ҫуртра 2019 тата 2020 ҫулсенче юсав ирттернӗ, ҫивиттие те юсанӑ. Ҫав ҫивитти пӗр сехет ҫурӑра кӗлленнӗ. Виҫӗм ҫул унта инженери сечӗсене улӑштарнӑ, пӗлтӗр — ҫивиттие.
Юсав организацийӗ ҫутӑ пӑралукне епле ылмаштарнине, ҫивиттие вут-кӑвартан асӑрхамалли ӗҫе мӗнлерех пурнӑҫланине, епле материалпа усӑ курнине, технологие пӑхӑннине специалистсем ҫывӑх вӑхӑтра тӗрӗслӗҫ. Ҫак ӗҫе пурнӑҫлама республика Элтеперӗ Олег Николаев хушнӑ.
Канашри ҫав ҫурта тӗплӗн юсанӑ компани асӑннӑ хулари тата тепӗр 7 ҫуртра юсав ӗҫӗсем ирттернӗ, Тӑвайӗнче — 1 ҫуртра.
Ака уйӑхӗн 1-мӗшӗнче Канаш хулинчи Разин урамӗнчи 10-мӗш ҫуртра тухнӑ пушар ҫивиттие сиенленине Чӑваш халӑх сайчӗ пӗлтернӗччӗ. Аса илтерер: вут-ҫулӑм тӑватӑ подъездлӑ пилӗк хутлӑ ҫуртра ирхи 3 сехет те 30 минут тӗлӗнче алхасма тытӑннӑ. Килсӗр-ҫуртсӑр юлнисене вӑхӑтлӑх вырӑн тупса панӑ. Вырӑнти хыснаран ҫемьесене 10-шар пин тенкӗ уйӑрса панӑ. Халӗ вара вӗсене республика хыснинчен те пулӑшӗҫ. Ҫав тӗллевпе Чӑваш Ен резерв фондӗнчен 3 миллион тенкӗ уйӑрнӑ.
Пушар хыҫҫӑн «Таса хула» муниципалитетӑн унитарлӑ предпиятийӗ тӗлӗшпе пуҫиле ӗҫ пуҫарнӑ. Асӑннӑ организаци ӗҫченӗсем ҫурта тивӗҫлипе тытса тӑман тесе шухӑшлаҫҫӗ.
Канашра Разин урамӗнчи 10-мӗш ҫурт тӑрри ҫунни пирки пӗлтернӗччӗ. Чӑваш Ен прокурорӗ Андрей Фомин ҫулӑм мӗнрен тухма пултарни пирки каланӑ.
Тӗп верси ҫакӑн пек: ҫулӑм виҫӗмӗш подъездри тӑваттӑмӗш тата пиллӗкмӗш хутсен хушшинче оборудовани шахтинчен тухма пултарнӑ. Ахӑртнех, провайдер темӗнле оборудовани лартнӑ, унтан ҫулӑм тухнӑ. Кайран вӑл вентиляци шахтипе ҫурт тӑррине хӑпарнӑ. Ҫанталӑк ҫиллӗ пулнӑран ҫулӑм хӑвартах сарӑлнӑ.
Халӗ пушар вырӑнӗнче следстви ушкӑнӗ ӗҫлет. Паллах, урӑх версисене те пӑхса тухаҫҫӗ. Аса илтерер: ҫур ҫӗр иртни 3 сехетре ҫурт тӑрринче ҫулӑм алхаснине Росгварди ӗҫченӗсем асӑрханӑ. Пушара ирхи 5 сехет тӗлне сӳнтернӗ. Ҫынсене Канашри 3-мӗш шкула вӑхӑтлӑха вырнаҫтарнӑ.
Канашра нумай хваттерлӗ пӗр ҫурт пушара пула шар курнине эпир ӗнер пӗлтернӗччӗ. Аса илтерер: вут-ҫулӑм Разин урамӗнчи тӑватӑ подъездлӑ пилӗк хутлӑ ҫуртра ӗнер ирхи 3 сехет те 30 минут тӗлӗнче алхасма тытӑннӑ. «Хӗрлӗ автан» 900 тӑваткал метр лаптӑк ҫивиттие сиенленӗ.
«Ҫурт та хытах сиенленнӗ. Унта газ, шыв тата ҫутӑ сӳнтернӗ», — пӗлтернӗ Канаш хула администрацийӗн пуҫлӑхӗ Виталий Михайлов. Ҫынсене вырӑнти хыснаран 5-шер пин тенкӗ, анчах ҫемьесене 10 пинрен ытла мар парӗҫ.
Ҫуртра пурӑннисене вӑхӑтлӑх вырӑн тупса панӑ, хӑшӗсем аванӗсем патӗнче тӗпленнӗ.
Ҫурта юсама республика хыснин резерв фондӗнен укҫа уйӑрӗҫ.
Паян Канашри Разин урамӗнчи 10-мӗш ҫуртра тухнӑ пушар ҫивиттие сиенленӗ. Вут-ҫулӑм тӑватӑ подъездлӑ пилӗк хутлӑ ҫуртра ирхи 3 сехет те 30 минут тӗлӗнче алхасма тытӑннӑ. «Хӗрлӗ автан» 900 тӑваткал метр лаптӑка сиенленӗ. Ҫуртран 170 ҫынна эвакуациленӗ. Турра шӗкӗр, инкекре шар куракансем пулман.
Вут-ҫулӑма сӳнтерекенсем Канаш хулинчен, Тӑвай, Комсомольски тата Ҫӗрпӳ районӗсенчен тӑватӑ автоцистерна шывпа, виҫӗ автопусмапа ҫитнӗ. Ҫулӑма ирхи 5 сехетре сӳнтернӗ.
Инкек хыҫҫӑн Канаш инкеклӗ лару-тӑру тесе йышӑннӑ.
Ҫуртра пурӑннисене хулари 3-мӗш шкула вӑхӑтлӑха вырнаҫтарнӑ.
38 ҫулти арҫын килте хӑй тӗллӗн газ колонки лартнӑ. Вентиляцие вара хупланӑ. Ку чутах пысӑк инкекпе вӗҫленмен.
Пуш уйӑхӗн 28-мӗшӗнче 22 сехетре Канашра васкавлӑ медпулӑшӑва шӑнкӑрав ҫитнӗ. Фельдшерсем ҫитсе тӑнӑ, алӑка вара никам та уҫман. Вӗсем часрах полици чӗннӗ. Вырӑна Равиль Талипов тата Александр Урослов патрульнӑйсем ҫитнӗ.
Полицейскисем ҫитнӗ тӗле кил хуҫи алӑка уҫнӑ. Вӑл ҫемйи сӗремпе наркӑмӑшланма пултарни ҫинчен каланӑ. Йӗрке хуралҫисем хваттере кӗрсе чӳречесене уҫнӑ, 6-ри тата 17 ҫулти хӗрачасене, вӗсен 38-ти амӑшне васкавлӑ медпулӑшу машини патне йӑтса тухнӑ. Вӗсем тӑнсӑр пулнӑ. Кил хуҫине вара полицейскисем хӑйсен машинипе пульницӑна илсе ҫитернӗ.
Кӑҫал санавиаци вӗҫменччӗ. Паян вара республикӑра пациента пульницӑна хӑвӑрт илсе ҫитерме тивнӗ.
Канашран пациента санитари вертолечӗпе 35 минутра илсе килнӗ. Унӑн пуҫӗ суранланнӑ. Анчах япӑх ҫанталӑка пула вертолета пульница территорийӗнче мар, аэропортра антарса лартма тивнӗ. Унтан пациента васкавлӑ медпулӑшу машинипе пульницӑна илсе ҫитернӗ.
Палӑртмалла: санавиаци вертолечӗ Чӑваш Енре раштав вӗҫӗччен ӗҫлӗ. 100 ытла хутчен вӗҫеве тухма планланӑ. Пӗр сехечӗ 190 пин тенке ларӗ. Килӗшӗве 46 миллион тенкӗлӗх алӑ пуснӑ.
Канаш тӑрӑхӗнчи «Канаш» тата «Канаш Ен» хаҫатсене тӗнче тетелӗнчи халӑх ушкӑнӗсенче йышлӑ вулаҫҫӗ. «Контактра» вӗсен 7,3 пин тус, «Пӗркласрисем» ушкӑнра — 5,6 пин, «Instagram»-ра — 5,3 пин. Унсӑр пуҫне «Яндекс Дзен»-ра тата Фейсбукра каналсем уҫнӑ. «ТикТокра» та хӑйсен тусӗсене шыраҫҫӗ.
Канаш район хаҫачӗн тӗп редакторӗ Людмила Шурекова тӗнче тетелӗсӗр хальхи вӑхӑтра май ҫук тесе шухӑшлать, ҫавӑнпа мӗнпур майпа тулли усӑ курма тӑрӑшнине пӗлтерет.
«Пичет кӑларӑмӗсен, сайтӑн, халӑх ушкӑнӗсен аудиторийӗ пачах расна. Апла пулин те эпир хыпарсене кашни патне ҫитерме тӑрӑшатпӑр. Ҫавӑн валли тӗрлӗ ҫӑлкуҫпа усӑ куратпӑр», — тенӗ Людмила Шурекова «Чувашинформ.рф» сайта.
Катастрофа тата медпулӑшу медицинин пресс-служби пӗлтернӗ тӑрӑх, Чӑваш Енре темиҫе кунра 10 ҫын ҫурт тӑрринчен ӳкнӗ. Пурте вӗсем унта юр тасатма хӑпарса кайнӑ.
Пушӑн 24-мӗшӗнче Канашри 65 ҫулти арҫын пульницӑна пынӑ. Вӑл ҫурт тӑрринчен ӳкнӗ. Юрать-ха, темех пулман.
Пӗр кун маларах вара Лапсарти 54 ҫулти арҫынна пульницӑна илсе килнӗ. Вӑл шӑммисене хуҫнӑ. Хайхискер мунча тӑррине юр антарма хӑпарса кайнӑ та ӳкнӗ. Вӑл юр ҫинче ҫур сехет выртнӑ, ӑна тӑванӗсем асӑрханӑ.
Ҫӗрпӳ районӗнче вара ҫурт тӑрринчен 70 ҫулти хӗрарӑм ӳкнӗ.
-1.7 °C