Паянтан, утӑ уйӑхӗн 20-мӗшӗнчен, Шупашкартан Ҫӗнӗ Шупашкара ҫӳрекен 262-мӗш маршрут ӗҫлеме пӑрахнӑ. Кун пирки влаҫ официаллӑ майпа пӗлтермен. Тӗрӗсрех каласан, вӑл кӑҫал хупӑнасси ҫинчен унччен систернӗ-ха.
Маршрут перевозчикӗ «Хулари таксомоторлӑ парк» акционерсен хупӑ обществи пулнӑ. Свидетельствӑна вӑл шӑп та шӑп 5 ҫул каялла, 2021 ҫулхи утӑ уйӑхӗн 21-мӗшӗнче, илнӗ. Халӗ унӑн срокӗ тухнӑ, ҫапла маршрут та хупӑннӑ.
Влаҫ пӗлтернӗ тӑрӑх, «перевозчик килӗшӳ условийӗсене пӗрре мар пӑснӑ, 16 автобус вырӑнне линие 5 кӑна кӑларнӑ». Ҫакна пула 61-мӗш троллейбус янӑ-мӗн. Вӑл 262-мӗш автобусӑн маршручӗпе ҫӳрет тесен те юрать.
Сӑмах май, 2027 ҫулхи раштав уйӑхӗн 28-мӗшӗнче тепӗр маршрут ӗҫлеме пӑрахӗ. Вӑл – 331-мӗш.
Ҫӗнӗ Шупашкарта пиллӗкри ача чӳречерен персе аннӑ. Халӗ ку пӑтӑрмах тӗлӗшпе унти прокуратура тӗрӗслеме пуҫланӑ.
Ача Совет урамӗнчи нумай хваттерлӗ ҫурт чӳречинчен, 4-мӗш хутран, персе аннӑ. Инкек пирки ирхи 9 сехет тӗлӗнче васкавлӑ службӑсене пӗлтернӗ. Ачана пульницӑна ӑсатнӑ.
Малтанласа палӑртнӑ тӑрӑх, инкек вӑхӑтӗнче ачан амӑшӗ килтех пулнӑ. Чӳречене москит сеткӑпа хупланӑ, ача унта пырса сӗвеннӗ.
Раҫҫейри фигуристка Камилла Нелюбова Ҫӗнӗ Шупашкар хулине килнӗ, «Сокол» кермене ҫитсе курнӑ.
Вӑл унта ҫамрӑк спортсменсемпе тӗл пулнӑ, вӗсемпе уҫӑ тренировка ирттернӗ, спортри хӑйӗн вӑрттӑнлӑхӗсемпе пайланнӑ.
Спортсменка пӑр ҫинче виҫҫӗллӗ аксель тунӑ, ачасене пӑр тӑрӑх шуса ярӑнмалли техника пирки каласа кӑтартнӑ.
Палӑртмалла: кӑҫалхи сезонран пуҫласа Камилла Нелюбова Чӑваш Ен чысне Раҫҫейри ӑмӑртусенче хӳтӗлет. Нарӑс уйӑхӗнченпе вӑл Олимп резервӗсен 4-мӗш спорт шкулӗнче ӑсталӑхне туптать. Шкул ӑна экипировкӑпа тата костюмсемпе тивӗҫтерет. Ку уйӑхран спортсменка Чӑваш Республикин Элтеперӗн стипендине илсе тӑма тытӑннӑ.
Ҫӗнӗ Шупашкар ҫынни хваттерсӗр юлас мар тесе унти тасамарлӑхран хӑтӑлнӑ, коммуналлӑ тӑкаксемшӗн пухӑннӑ парӑма татнӑ.
Хваттер хуҫи унта социаллӑ найм мелӗпе пурӑннӑ. Унта антисанитари пулнӑран, парӑм пухӑннӑран хула администрацийӗ арҫынна хваттертен кӑларса ярасшӑн пулнӑ. Унран кӳршисем те шар курнӑ: хваттерти тасамарлӑха пула вӗсем те нушаланнӑ. Ҫынсем ҫавна май ҫӑхавсем ҫырнӑ, коммунальщиксем килсе тӗрӗслев ирттернӗ те актсем ҫырнӑ.
Хваттерте пурӑнакан ҫын суд тавӑҫне йышӑнман. Вӑл хваттертех юлас килнине пӗлтернӗ. Хӑйхискер ӑнлантарнӑ тӑрӑх, унта ашшӗ пурӑннӑ, лешӗ вара эрех ӗҫме юратнӑ. Вӑл вара ашшӗ вилсен унта пурӑнма куҫнӑ.
Суд пуличчен арҫын хваттерте тирпейленӗ, парӑмсене татнӑ. Ҫапла вӑл унтах юлнӑ.
Шупашкар хулинче ретротроллейбуспа пӗрремӗш хут экскурси ирттернӗ.
Nordtroll NTR-120MTr троллейбус пирвайхи хут 1997 ҫулхи ҫурла уйӑхӗн 26-мӗшӗнче Ҫӗнӗ Шупашкар хулинче ӗҫлеме пуҫланӑ. Кун пек экземпляр пирӗн кунччен пӗрре кӑна упранса юлнӑ. Халӗ ав вӑл Шупашкар хулинче экскурси маршручӗ ҫине тухнӑ. Троллейбус Чукун ҫул вокзалӗнчен ҫула тухса Ленин проспекчӗпе Модӑсен ҫуртне ҫитнӗ, малалла Мускав проспекчӗпе кайса «Раща» патӗнчен ҫаврӑннӑ та каялла «Мега Молл» таран ҫитнӗ. Унтан Гагарин урамне ҫаврӑнса вокзалта чарӑннӑ. Гид вырӑнӗнче Чӑваш транспорт управленийӗн кадрсен пайӗн пуҫлӑхӗ Елена Горбатина пулнӑ.
Палӑртмалла: троллейбуса ун чухне лайӑх туса кӑларнӑ, салонри ҫынсем хӗллехи шартлама сивӗсенче ан шӑнччӑр тесе вӑйлӑ кӑмакасем лартнӑ.
Тверь облаҫӗнчен питӗ хурлӑхлӑ хыпар ҫитнӗ. М-10 федераци ҫулӗ ҫинче пулнӑ аварире Чӑваш Республикинчи ҫемье вилнӗ.
Вӗсем – Ҫӗнӗ Шупашкар хулинчен. Аварире 35 ҫулти хӗрарӑм (вӑл спутник хулара дзюдо енӗпе тренерта ӗҫлет), унӑн упӑшки тата 14 ҫулти хӗрӗпе 4 ҫулти ывӑлӗ вилнӗ.
Малтанлӑха палӑртнӑ тӑрӑх, ирхи 4 сехет те 40 минутра ҫӑмӑл машина хирӗҫ ҫул ҫине тухса кайса КамАЗпа ҫапӑннӑ. Ҫакӑ паллӑ: ҫемье отпускра пулнӑ. Инкек пуличчен темиҫе сехет маларах хӗрарӑм ҫемьепе Мускавра ӳкерӗннӗ сӑнӳкерчӗке халӑх тетелӗнчи страницине кӑларса лартнӑ, Ҫемье тата юратупа шанчӑклӑх кунӗпе саламланӑ.
Лайӑх хыпар ҫитнӗ: Чӑваш Республикинчи икӗ ҫемье Пӗтӗм Раҫҫейри «Ку пирӗн ҫемьере» конкурсра ҫӗнтернӗ.
Кашни ҫемье 5 миллон тенкӗлӗх сертификата тивӗҫнӗ. Ку укҫа-тенкӗпе вӗсем пурӑнмалли условисене лайӑхлатӗҫ.
Конкурс финалӗнче Чӑваш Ен чысне пилӗк ҫемье хӳтеленӗ. Ҫӗнтерӳҫӗсен йышӗнче – Ҫӗнӗ Шупашкар хулинчи Пермяковсем тата Шупашкар хулинчи тата Красноармейски округӗнчи Федоровсен, Столяренкӑсен тата Рассказовсен пӗрлештернӗ ҫемйи. Палӑртма кӑмӑллӑ: Пермяковсем финала иккӗмӗш хут тухнӑ.
Сӑмах май, Раҫҫей шайӗнчи конкурса 85 регионти 330 команда хутшӑннӑ.
Чӑваш Енре ятарлӑ ҫар операцине хутшӑнакан салтаксене хушма хуҫалӑх тытма тата пӳрт тума ҫӗр параҫҫӗ. Анчах асӑннӑ лаптӑка ял-хуларан аякра уйӑрса панине кура ку пулӑшу хут ҫинче тӑрса юлать тесен те юрать. Ҫӗр илменнисене 250 пин тенкӗ параҫҫӗ-ха, анчах вӑл укҫа та пысӑк суммах мар.
Чӑваш Енӗн Патшалӑх Канашӗн депутачӗ Игорь Моляков асӑннӑ категорие ҫӗр ӑҫта панине уҫӑмлатас тесе ҫыру та шӑрҫаланӑ. Анчах ун патне ячӗшӗн тенӗ пек ҫырнӑ хурав килсе выртнӑ.
Ҫӗнӗ Шупашкарти Сергей Хваткин Инкеклӗ ӗҫсен министерствин тытӑмӗнче чылай ҫул ӗҫленӗ хыҫҫӑн ҫара кайнӑ. Унта вӑл миномет батарейинче пулнӑ. Ҫапӑҫусенчен пӗринче вӑл хӑрах урасӑр тӑрса юлнӑ. Тӑван тӑрӑха таврӑнсан ҫемье сусӑр ҫынна уйрӑм пӳртре пурӑнма меллӗрех тесе ҫӗр илме шухӑшланӑ. Ҫӗнӗ Шупашкарти тӳре-шара ӑна Сӗнтӗрвӑрри районӗнче ҫӗр сӗннӗ. Анчах унта шыв та, ҫутӑ та, ҫул та ҫук иккен. Каярах Ольдеево ҫывӑхӗнче сӗннӗ. Унта та услови ырах мар иккен.
Ҫӗнӗ Шупашкарта ашшӗпе ывӑлӗ шыва путса вилнӗ. Инкек ӗнер, утӑ уйӑхӗн 5-мӗшӗнче, пулса иртнӗ.
Ашшӗпе ывӑлӗ шыва кӗме юраман вырӑнта пулнӑ иккен. Вӗсем шыв патне анакан бетон сарнӑ вырӑнта пулнӑ.
Инкек вырӑнне ҫӑлавҫӑсем ҫийӗнчех пырса ҫитнӗ. Водолаз арҫын ача виллине тӳрех тупнӑ, анчах унӑн ашшӗне тӳрех тупма май килмен,кӑштахран ӑна та асӑрахнӑ. Вӗсем иккӗшӗ те ҫипуҫпа пулнӑ.
Ҫапла вара пӗр киле пӗр кунта калама ҫук икӗ пысӑк хуйхӑ пырса ҫапнӑ. Ывӑлӗпе ашшӗ ҫипуҫпа пулнине кура, тен, вӗсенчен пӗрин йӑлмака бетон ҫинче ури шуса кайман-ши, тепри ӑна ҫӑлма тӑрӑшса хӑй те шыва путман-ши тесе те шухӑшлама май пур.
Чӑваш транспорт управленийӗ историре йӗр хӑварнӑ NordTroll 120MТr троллейбуса иккӗмӗш пурнӑҫ парнеленӗ.
1091-мӗш номерлӗ ҫак экземпляр Раҫҫейре кӑна мар, тӗнчипе те упранса юлман. Вӑл – пӗртен-пӗр. Ҫак троллейбус Ҫӗнӗ Шупашкар хулин урамӗсене 1997 ҫулхи ҫурла уйӑхӗн 26-мӗшӗнче тухнӑ. Халӗ вӑл Шупашкарта – иккӗмӗш ретро-троллейбус. Пӗрремӗшӗ ЗиУ-5 троллейбус. Вӑл Ҫӗнтерӳ кунӗнче, Ҫӗнӗ ҫулта тата ытти пӗлтерӗшлӗ уявра ҫула тухать.
Чӑваш транспорт управленийӗ тата тепӗр икӗ кивӗ троллейбуса ҫӗнӗ пурнаҫ парнелесшӗн, Шупашкарта электротранспорт музейне уҫасшӑн. Черетре — ЗиУ-9 тата Беларуҫре туса кӑларнӑ АКСМ-101.
NordTroll 120MТr троллейбуса Василий Степанов тата Владислав Егоров сварщиксем, Юрий Петров, Радий Бученков, Вячеслав Иванов слесарьсем, Владимир Михайлов электрик тата масерскойсен пуҫлӑхӗ Владимир Андреев ҫӗнетнӗ.
+13.3 °C