Ҫӗнтерӳ кунӗ умӗн Ҫӗнӗ Шупашкарта ӗҫ ветеранӗ валли концерт йӗркеленӗ. Хулари стоматологи поликлиникинче ӗҫлекенсем 82 ҫулти Вера Яновӑна ҫапла майпа уявпа саламланӑ.
Вера Ивановнӑн шӑпи нушаллӑ килнӗ. Вӑл 1944 ҫулта концлагерьте ҫуралнӑ. Ача тӗлӗнмелле майпа чӗрӗ юлнӑ. Вӑл вилнӗ тесе ӑна хупахпа чӗркенӗ. Анчах пӗчӗкскер чӗрех пулнӑ.
Вӑрҫӑ хыҫҫӑн Вера Янова Орел облаҫӗнчи ача ҫуртӗнче пурӑннӑ. Кайран шӑпа ӑна Ҫӗнӗ Шупашкара илсе ҫитернӗ, вӑл ача пахчин заведующийӗнче чылай ҫул ӗҫленӗ.
«Улӑп-2026: Эпир Улӑп йӑхӗнчен!» XIV-мӗш вӑйӑ-конкурс вӗҫленнӗ. Ӑна Раҫҫейри халӑх пӗрлӗхӗн ҫулталӑкне, Чӑваш Республикин халӑхсен туслӑхӗн ҫулталӑкне, Чӑваш чӗлхи кунне тата Чӑваш халӑх поэчӗ Юрий Сементер ҫуралнӑранпа 85 ҫул тултарнине халалланӑ.
Вӑйӑ-конкурса Чӑваш наци конгресӗн Красноармейски тӑрӑхӗнчи уйрӑмӗ (ертӳҫи — Зинаида Михайлова) тата Нестер Янкас ячӗллӗ культурӑпа искусство тата литература пӗрлӗхӗ (ертӳҫи — Иван Прокопьев) йӗркеленӗ.
Конкурса пурӗ 1313 вӗрентекенпе шкул ачи хутшӑннӑ. Унта Красноармейски, Вӑрнар, Комсомольски, Канаш, Шупашкар, Тӑвай, Вӑрмар, Муркаш, Ҫӗрпӳ, Хӗрлӗ Чутай, Патӑрьел, Сӗнтӗрвӑрри, Елчӗк, Элӗк, Шӑмӑршӑ тӑрӑхӗсем тата Шупашкар, Ҫӗнӗ Шупашкар, Канаш, Ҫӗрпӳ хулисем хастар пулнӑ. Тутар Республикин Кив Саврӑш тата Альшик шкулӗсем хутшӑннӑ.
Лайӑх хыпар: кӗҫӗх Ҫӗнӗ Шупашкартан Куславкка хулине автобус ҫӳреме тытӑнӗ.
Ҫӗнӗ маршрут 515 номерпе пулӗ. Вӑл ыран, ҫу уйӑхӗн 4-мӗшӗнчен, ҫӳреме пуҫлӗ.
Маршрут ҫинче пӗтӗмпе 11 автобус пулӗ. Вӗсем кашни 60 минутран ҫӳрӗҫ. Куславккана ҫити билет хакӗ — 277 тенкӗ. Билета укҫапа та , карттӑпа та туянма май пулӗ.
Сӑмах май, Ҫӗнӗ Шупашкарпа Куславкка хушшинче – 93 ҫухрӑм.
Ака уйӑхӗн 27-мӗшӗнче Шупашкарта «Асамат вулавӑсем - 2026» мероприяти иртнӗ. Вӑл Шупашкарти 13-мӗш вӑтам шкулта пулнӑ.
Унта Ҫӗнӗ Шупашкарти 2-мӗш вӑтам шкулта вӗренекен ачасем те хутшӑннӑ. 7-мӗш класра вӗренекен Виктория Козлова тата Ольга Павлова чӑваш чӗлхипе литературин учителӗпе Людмила Кирилловӑпа хутшӑннӑ. Вӗсем чӑвашла илемлӗ тумланса кайнӑ. Чӑваш поэчӗпе тӗл пулни ачасемшӗн чӑннипех пысӑк савӑнӑҫ пулнӑ.
Светлана Васильевна ачасене хӑйӗн пултарулӑхӗ ҫинчен каласа кӑтартнӑ, ҫырас ӑсталӑхӑн вӑрттӑнлӑхне уҫса панӑ. Вӑл хӑйӗн сӑввисене илемлӗ вуланине ачасем ҫӑвара шыв сыпнӑн итлесе ларнӑ.
Светлана Асамат ачасен ыйтӑвӗсене те кӑмӑлтан хуравланӑ. Вӗсем вара тем пирки те ыйтса пӗлме ӑнтӑлнӑ.
Чӑваш Енӗн промышленность министрӗ пулса ӗҫленӗ Сергей Лекарев Ҫӗнӗ Шупашкар хула пульницинче тӗп врачӑн администраципе хуҫалӑх енӗпе ӗҫлекен ҫумӗ пулса тӑрӑшать.
Сергей Лекарев эпир маларах асӑннӑ ведомствӑра 2020 ҫулхи пуш уйӑхӗнченпе министр ҫумӗ пулса тимленӗ, унтан тепӗр уйӑхран, министр тивӗҫне пурнӑҫлама тытӑннӑ. Тепӗр пилӗк уйӑхран каллех министр ҫумӗ пулса тӑнӑ. 2024 ҫулхи ҫӗртме уйӑхӗнче ӑна министрӑн тивӗҫӗсене пурнӑҫлама шаннӑ, тепӗр икӗ уйӑхран министр тилхепине тыттарнӑ. 2025 ҫулхи авӑн уйӑхӗнче вӑл ӗҫрен кайнӑ. Ун чухнехи ҫав хушура «урӑх ӗҫе куҫнӑран» тесе палӑртнӑ.
Хальхи вӑхӑтра экс-министр Ҫӗнӗ Шупашкарти хула пульницинче тӑрӑшать. Тӗп врач пулса асӑннӑ учреждение Николай Уруков ертсе пырать.
Ҫӗнӗ Шупашкарта ҫӗр ишӗлсе пырать. Вырӑнта пурӑнакаенсем ҫав пулӑм хӑйсен ҫурчӗсем патне ҫитесрен хӑраҫҫӗ.
Ҫӗр унти Ольдеево ялӗнчи Зелинский урамӗнче ишӗлсе пырать иккен. Ҫырма хӗрринчи тӑпра ишӗлсе пырать. Ҫул леш енче вара ҫынсен уйрӑм ҫурчӗсем вырнаҫнӑ.
Ҫӗр ишӗлекен вырӑна специалистсене чӗнсе илнӗ. Вӗсем ҫутҫанталӑкӑн ҫак пулӑмне сӑнама ятарлӑ паллӑсем вырнаҫтарнӑ. Вырӑнти администрацире ҫӗр ишӗлнине хирӗҫ ятарлӑ мера йышӑнма палӑртаҫҫӗ, ун валли вӗсем план туса хатӗрлесшӗн. Ҫӗр ишӗлнине хирӗҫ туса ирттерекен ӗҫсене кансӗрлесрен ҫынсене унта машинӑсем лартма чарнӑ.
Сӑмах май каласан, кӑҫал ҫуркунне ҫынсем Ҫӗнӗ Шупашкарта ҫеҫ мар, Шупашкарта та, Шупашкар районӗнче те ҫӗр ишӗлсе пынине асӑрханӑ.
Ҫӗнӗ Шупашкарта Женя Крутова урамӗнчи 6-мӗш ҫурт стени ҫине Тӑван ҫӗршывӑн Аслӑ вӑрҫи вӑхӑтӗнчи паллӑ летчицӑн Женя Крутовӑн портретне ӳкерме пултарӗҫ.
Ҫавӑн пек пуҫарупа тухнӑ Ҫӗнӗ Шупашкарти химипе технологи техникумӗн шыравҫисем. Кӗҫех ку ыйтӑва депутатсене сӳтсе явма парӗҫ. Проекта ырласан портрета Чӑваш Республикин тава тивӗҫлӗ ӳнерҫин Александр Ильинӑн «Женя Крутова. Юлашки ҫапӑҫу умӗн» картини тӑрӑх ӳкерӗҫ.
Евгения Сергеевна Крутова 1920 ҫулта Сарӑту кӗпӗрнинчи Труёвая Маза ялӗнче ҫуралнӑ. Ашшӗ вилсен амӑшӗ 1934 ҫулта ачисемпе Шупашкара куҫса килнӗ. Женя Шупашкарти 1-мӗш шкулта 2 ҫул вӗреннӗ, аэроклубра ӑсталӑхне туптанӑ. Кайран вӑл унта инструктор пулнӑ, вӑрҫӑччен 21 курсанта вӗрентнӗ.
Фронта Женя 1942 ҫулта кайнӑ. 1943 ҫулта ҫар вӗҫевне тухсан паттӑрла вилнӗ. Вӑл 22 ҫулта пулнӑ.
Ҫӗнӗ Шупашкарта 11-мӗш класра вӗренекен хӗр ултавҫӑсене ӗненсе вӗсене 250 пин тенкӗ куҫарса панӑ.
Ун патне малтан хӑйӗнпе телефон операторӗ тесе паллаштарнӑ ҫын шӑнкӑравланӑ. Хайхискер унран паспорт даннӑйӗсене ыйтса пӗлнӗ. Кайран «Госуслуги» порталӗн ӗҫченӗсем» шӑнкӑравлама тытӑннӑ, харпӑр информацие ют ҫынсем пӗлнӗ тесе хӑратнӑ.
Хӗр палламан ҫынсем каланипе хӑйӗн ячӗпе кредит илнӗ, амӑшӗн эрешӗсене ломбарда панӑ. Пӗтӗм укҫана вӑл палламан ҫынсем каланӑ счет ҫине куҫарнӑ.
Кун хыҫҫӑн ҫав ҫынсем унран кулса ҫырма тытӑннӑ, мӗн ҫырнине йӑлтах хуратнӑ та ҫыхӑнӑва тухма пӑрахнӑ.
Ҫӗнӗ Шупашкарта пӗрлехи проезднойсем ҫаврӑнӑша кӑларнӑ. Вӑл 2500 тенкӗ тӑрать. Унпа хӑш-пӗр троллейбуспа тата автобуспа кирек мӗн чухлӗ ҫӳреме пулать.
Ҫак йышра – Ҫӗнӗ Шупашкарпа Шупашкар хушшинче ҫӳрекен троллейбуссем те. Проезднойпе 60-мӗш, 61-мӗш, 62-мӗш троллейбуссенче, 13-мӗш, 52-мӗш, 14-мӗш тата 20-мӗш «к» автобуссенче ҫӳреме май пур. Карттӑна ЕТК офисӗсенче е почтӑра сутаҫҫӗ.
Ҫӑмӑллӑхсемпе усӑ куракансем картта хакӗн 20 процентне тавӑрма пултараҫҫӗ. Вӗсен йышӗнче – ҫапӑҫу ӗҫӗсен ветеранӗсем, ятарлӑ ҫар операцине хутшӑннисем, сусӑрсем тата ӗҫ ветеранӗсем. Кун валли МФЦна е халӑха социаллӑ пулӑшу паракан центра каймалла.
Ӗнер, ака уйӑхӗн 22-мӗшӗнче, Ҫӗнӗ Шупашкарта вӗренекен 4 шкул ачине Мускаври Хӗрлӗ тӳремре пионера илнӗ.
Ҫак куна ахальтен суйламан. Ӗнер Владимир Ленин ҫуралнӑранпа 156 ҫул ҫитнӗ. Ачасем малтан Мавзолей патне чечексем хунӑ. Унтан вӗсене КПРФ лидерӗ Геннадий Зюганов тата Патшалӑх Думин депутачӗ Мария Дробот хӗрлӗ галстук ҫыхса янӑ. Кун хыҫҫӑн ачасем В.И.Ленин музейне ҫитсе курнӑ.
Сӑмах май, пӗлтӗр Ҫӗнӗ Шупашкарта 19 пионер, 11 кандидат тата 6 комсомолец шутланнӑ. Халӗ, ав, йыш татах хушӑннӑ.
+9.8 °C