Иртнӗ эрнере Чӑваш Енӗн Правительство ҫуртӗнче республика Элтеперӗ патшалӑх наградисене тивӗҫнисене чысланӑ. Ҫав йышра икӗ артист пулнӑ.
«Атӑл Опера» театрӑн балет солистне Анна Серёгинӑна «Чӑваш Республикин халӑх артисчӗ» ят панӑ.
Чӑваш патшалӑх ҫамрӑксен театрӗн артистне Владимир Свинцова «театр ӳнерӗнчи тава тивӗҫлӗ ӗҫсемшӗн тата нумай ҫул тухӑҫлӑ ӗҫленӗшӗн» «Чӑваш Республикин тава тивӗҫлӗ артисчӗ» ят пама юпа уйӑхӗн 30-мӗшӗнчи Хушӑвӗпе йышӑннине эпир унччен пӗлтернӗччӗ-ха.
«Ку саманта эпӗ тахҫанах кӗтнӗ. Ӗҫӗме пысӑка хурса хакланӑшӑн калама ҫук телейлӗ», — тенӗ Владимир Свинцов. Вӑл, сӑмах май каласан, Кӳкеҫрен.
Чӑваш Енри 6 театр ЧР Элтепер грантне тивӗҫӗҫ. Вӗсем валли пӗтӗмпе 18 миллион тенкӗ уйӑрӗҫ.
Чӑваш патшалӑх академи юрӑпа ташӑ ансамбльне «Песнь о Земле, что рождала Мужество...» театрализациленӗ концерт программине пурнӑҫлама 5 млн тенкӗ парӗҫ. Вырӑс патшалӑх драма театрӗ те «Маскарад» спектакле лартма ҫавӑн чухлех гранта тивӗҫнӗ.
Чӑваш патшалӑх пукане театрӗ «Интерактивный петрушечный театр «Легенды народов России» проекта пурнӑҫлама 3 млн тенке тивӗҫнӗ. Чӑваш патшалӑх филармонийӗ те «Звучащая древность Чувашии» концерт-спектакль лартма 3 млн тенкӗ илӗ.
Чӑваш патшалӑх сӑнав театрӗ «Что такое хорошо и что такое плохо» спектакле сцена ҫине кӑларма 1 млн тенке тивӗҫнӗ. Ҫамрӑксен театрӗ те ҫавӑн чухлех грант илӗ, унпа «Юнпа пӗвеннӗ хӗвел» спектакль лартӗҫ.
ЧР Элтеперӗ Олег Николаев Пӗтӗм Раҫҫейри «Ӗмӗтсен ёлки» акцие хутшӑннӑ. Вӑл чӑрӑш ҫинчен виҫӗ тетте илнӗ, вӗсенче – ачасен ӗмӗчӗсем.
Олег Алексеевич 13 ҫулти Федора телескоп парнелӗ, Аринӑна – балансборд. 15 ҫулти Никитӑна вара кӗтмен парнепе савӑнтарӗ.
Чӑваш Енри хӗрарӑмсен пӗрлӗхӗн председателӗ Наталья Николаева Шупашкарти 5-ри Ульянӑн, Ҫӗнӗ Шупашкарти Кирӑн тата Шупашкар округӗнчи Чӗркаш ялӗнчи Дарьйӑн ӗмӗчӗсене пурнӑҫлӗ.
Халӑх тетелӗсенче ЧР Элтеперӗпе Олег Николаевпа ҫыхӑннӑ суя видео сарӑлма тытӑннӑ. Олег Алексеевич ӑна такамсем нейросетьпе тунине, калаҫӑва чӑн мар ӑс-хакӑлпа ҫыртарнине пӗлтернӗ.
Видеора Элтепер тӳлевсене пӗчӗклетнӗ хыҫҫӑн ҫынсем ятарлӑ ҫар операцине кайманшӑн пӑшӑрханнине калать-мӗн. Олег Николаев ку хыпара ӗненмелле маррине пӗлтернӗ, официаллӑ ҫӑлкуҫсене кӑна шанмаллине каланӑ. Вӑл пӗлтернӗ тӑрӑх, ку тӗслӗх тӗлӗшпе йӗрке хуралҫисем ӗҫлеҫҫӗ — видеоролике хатӗрленӗ ҫынна тупсан явап тыттарӗҫ.
Ӗнер ЧР Элтеперӗ промышленноҫ тата энергетика министрне палӑртнӑ. Ку тивӗҫе Марат Якушева шанса панӑ.
Вӑл министр тивӗҫӗсене аванӑн 15-мӗшӗнченпе пурнӑҫласа пынӑ. Унччен вӑл, 2009 ҫултанпа, ертӳҫӗ должноҫӗсенче ӗҫленӗ, ҫав шутра Шупашкарти аш-какай комбиначӗн пуҫлӑхӗ те пулнӑ.
Палӑртмалла: ку ведомствӑна 2020 ҫулхи нарӑсра йӗркеленӗ. Хальччен министр нумай пулнӑ, нихӑшӗ те чылай тытӑнса тӑман: Игорь Воропаев (нарӑс, 2020), Александр Доманин (нарӑс-ака, 2020), Сергей Лекарев (ака-авӑн 2020), Евгений Герасимов (авӑн, 2020 – ҫурла 2021), Александр Кондратьев (юпа, 2021 – утӑ, 2023), Борис Марковцов (утӑ, 2023 – ҫу, 2024), Сергей Лекарев (ҫӗртме, 2024 – авӑн, 2025).
Паян ЧР Элтеперӗ Олег Николаев республикӑра регион шайӗнче инкеклӗ лару-тӑру режимӗ пулнине палӑртнӑ.
Вӑл каланӑ тӑрӑх, ку Шупашкарта беспилотникрен шар курнисене пулӑшма тата тӑкаксене саплаштарма пӗтӗм ресурса мобилизацилеме май парать. Хальхи вӑхӑтра тӑкаксене шутлаҫҫӗ, юсав ӗҫӗсене пуҫӑннӑ ӗнтӗ.
Правительство лару-тӑрӑва ҫирӗп сӑнаса тӑрать.
Паян ирхине пирӗн республикӑна каллех беспилотниксем тапӑннӑ. Ҫавна пула хулари пурӑнмалли ҫуртсем те сиенленнӗ. Шар курнисем те пур.
Чӑваш Ен Элтеперӗ Олег Николаев Телеграмра пӗлтернӗ тӑрӑх, васкавлӑ мӗнпур служба инкек вырӑнӗнче ӗҫлет.
Ирхине хулари тӗп урамсемпе машинӑсене ҫӳреме чарнине ҫынсем асӑрхарӗҫ пулӗ ӗнтӗ.
Хусанкай урамӗнчи 8-мӗш ҫуртри шкулта ҫынсене пулӑшмалли пункт уҫнӑ.
К.В.Иванов ячӗллӗ Чӑваш патшалӑх академи драма театрӗнче раштавӑн 5-6-мӗшӗсенче «Нарспи» спектакль премьери пулнӑ. Ҫапла «Нарспи» 36 ҫултан сцена ҫине таврӑннӑ.
Ӑна ЧР Элтеперӗн гранчӗпе лартнӑ. Режиссерӗ – Дмитрий Миронов, илемлӗх ертӳҫи – Борис Манджиев, ӳнерҫи – Валентина Федорова, кӗвви – Лолита Чекушкинӑн. Нарспипе Сетнер ролӗсене Антонина Казеева тата Евгений Урдюков вылянӑ.
Спектакле тепӗр хутчен раштавӑн 24-25-мӗшӗсенче кӑтартӗҫ. Шкул ачисемпе студентсем билетсене «Пушкин карттипе» туянма пултараҫҫӗ.
Чӑваш Енре ҫуралса ӳснӗ, тӗнчипе ятлӑ-сумлӑ тӗпчевҫӗ Никита Бичурин ҫуралнӑранпа килес ҫулхи авӑн уйӑхӗнче 250 ҫул ҫитӗ. Ҫавна пирӗн республикӑра сумлӑн уявлама палӑртаҫҫӗ.
Чӑваш Енре тӗрлӗ мероприяти ирттернӗ, ун валли ӗҫлӗ ушкӑн туса хурӗҫ. Кун пек йышӑнӑва Чӑваш Ен Элтеперӗ Олег Николаев раштав уйӑхӗн 6-мӗшӗнче алӑ пуснӑ.
Никита Яковлевич, — монголовед, синолог, прозаик, очеркист, сӑвӑҫ. 1777 ҫулхи авӑн уйӑхӗн 9-мӗшӗнче Ҫӗрпӳ уесӗнчи (халӗ Чӑваш Енӗн Шупашкар районӗ) Типнер ялӗнче ҫуралнӑ. 1853 ҫулхи ҫу уйӑхӗн 23-мӗшӗнче Санкт-Петербург хулинче вилнӗ.
Бичурин ӗҫӗсене Раҫҫейре кӑна мар, Европӑра та хакланӑ. 1828 ҫулта ӑна Раҫҫей ӑслӑлӑхсен академийӗн член-корреспондентне суйласа илнӗ. 1831 ҫулта Парижри Ази обществин шутне кӗртнӗ. 1834, 1839, 1843, 1849 ҫулсенче вӑл Раҫҫейӗн ӑслӑлӑх шайӗнчи чи пысӑк паллине, Демидов премине, тивӗҫнӗ.
Чӑваш Ен Элтеперӗ Олег Николаев ҫитес ҫула республикӑра мӗне халалланине палӑртнӑ, хушӑва алӑ пуснӑ.
Ҫитес ҫул Чӑваш Енре Халӑхсен туслӑхӗн ҫулӗ пулӗ. Олег Алексеевич палӑртнӑ тӑрӑх, шӑпах уншӑн ҫынсем нумай сасӑланӑ.
Аса илтерер: пӗлтӗр республикӑра Ҫӗнтерӳ тата патриотизм ҫулталӑкӗ пулнӑ, 2024 ҫулта вара – Экологи культурипе ҫутҫанталӑкпа перекетлӗ усӑ курмалли ҫулталӑк.
+3.3 °C