minkult.khabkrai.ru сӑнӳкерчӗкӗ

Ҫӗнӗ Шупашкар арҫынни Мускаври театрсенчен пӗрне кайса спектакль курма билет туянас тенӗ. Анчах вӑл суя сайт ҫине лекнӗ. Ултавҫӑсем унӑн 9 пин тенкине вӑрланӑ.

39 ҫулти арҫын сайтра спектакль кунне тата вӑхӑтне, ҫаван пекех хӑйне килӗшекен вырӑнсене суйланӑ. Банк картти ҫинчен укҫа тӳленӗ чухне телефон ҫине килнӗ кода кӑтартнӑ хыҫҫӑн сайт ӗҫлеми пулса кайнӑ. Арҫын укҫа тӳлеме тата тепӗр икӗ хутчен те хӑтланса пӑхнӑ, анчах май килмен.

Техника пулӑшӑвӗ паракан тытӑма ҫырса янӑ хыҫҫӑн ӑна икӗ билет вырӑнне 6 билетшӑн укҫа илнӗ тесе ӑнлантарса панӑ. Карттӑн реквизитне каласан укҫана тавӑрса пама шантарнӑ. Арҫын укҫа ҫук карттӑн реквизичӗсене пӗлтернӗ, ун патне такам укҫа илме хӑтланни ҫинчен смс-хыпар ҫитнӗ. Вара арҫын ултавҫӑсен капкӑнне ҫакланнине ӑнланса илнӗ те йӗрке хуралҫисенчен пулӑшу ыйтнӑ.

#спектакльсем, #театрсем, #ултавҫӑсем, #пӑтӑрмахсем, #Мускав, #укҫа-тенкӗ, #ШӖМ