Чӗмпӗр чӑвашӗсем пӗлтереҫҫӗ:

Область филармонийӗнче юрӑҫӑсен “Чӑваш шӑпчӑкӗ” фестивалӗ иртрӗ. Унта районсенче ҫӗнтернӗ 18 ҫын хутшӑнчӗ.

Наци культурисен центрӗпе чӑваш культура пайӗ “Чӑваш шӑпчӑкӗ” фестивале саккӑрмӗш хут ирттерчӗҫ. Кӑҫалхи уява И.Я.Яковлев ҫуралнӑ куна халалланӑ. Ытти ҫулсенчи фестивальсемпе танлаштарсан саккӑрмӗшӗ ҫамрӑкланнипе уйрӑлса тӑрать. Ҫамрӑк ӑру чӑваш кӗвви-cӗмми патне туртӑнни чӑваш этеплӗхӗ малашне те аталаннине ҫирӗплетет.

Юрӑҫсене саламласа, ырӑ сунса наци культурисен центрӗн директорӗ С.А.Орлова сӑмах каларӗ, УОЧНКА ячӗпе – В.И.Сваев.

А.Н.Чурбанов (жюри председателӗ), УОЧНКА председателӗ В.И.Сваев, О.Н.Мустаев тележурналист, Раҫҫейри Писательсен тата Журналистсен пӗрлӗхӗн членӗ, “Канаш” хаҫатӑн ҫырусен пайӗн пуҫлӑхӗ А.Г.Дмитриев, пӗрремӗш “Чӑваш шӑпчӑкӗн” лауреачӗ, “Эревет” ушкӑн юрӑҫи В.П.Сорокин, УОЧНКА ӗҫтӑвкомӗн культура енӗпе ӗҫлекенӗ Г.М.Никитина тyрӗсене, паллах, чи пултаруллӑ юрӑҫӑсене тупса палӑртма йывӑр пулчӗ. Ҫапах та вӗсем хaйсен тивӗҫне лайӑх пурнӑҫларӗҫ.

Чӑваш халӑх культурине аталантарассишӗн ырми-канми тӑрӑшнӑшӑн, “Чӑваш шӑпчӑкӗ” фестивале хутшӑннӑшӑн ятарлӑ дипломсене Николай Убамзаров (Ульяновск районӗ, Унтaр), Марина Петрова (Чaнлӑ районӗ, Аслӑ Нагаткин), Марина Карамзина (Ульяновск хули, Засвияжски районӗ), Варвара Ерофеева (Вешкайма районӗ, Каркиел), Екатерина Угасина (Кивӗ Майна районӗ, Дмитриево-Помряскино), Раиса Никонорова (Ульяновск районӗ, Шумовка), Дмитрий Ахмеров (Чaнлӑ районӗ, Пухтел), Лена Стефейкинӑпа Надя Воробьева (Ульяновск районӗ, Унтaр), Александр Варзаровпа Кристина Хубахова (Ульяновск районӗ, Аслӑ Ключище), Надежда Спиридонова, Елена Демидова, Надежда Ильмукова (Чартаклӑ районӗ, Уcaркка), Ирина Пузырникова (Cинкeл районӗ, Уличе) тивӗҫрӗҫ.

Ҫӗнтерӳҫӗсене номинацисемпе уйӑрчӗҫ. Мария Селиванова – эстрада юррисене чи лайӑх юрлакан, Настя Шумилова – куракансемшeн чи лайӑх юрaca, Катя Шепелева — халӑх юррисене чи лайaх юрлакан номинацисенче ҫӗнтерчӗҫ.

Юлашкинчен фестивале хутшӑнакансене те, ҫӗнтерӳҫӗсене те хаклӑ парнесем парса чысларӗҫ.

“Тӗрлӗ мероприятисем ирттерет чӑваш культура центрӗ. Кӑҫал уйрӑмах йышлӑ фестивальсемпе конкурссем пулчӗҫ. Чӑваш этеплӗхне манман, чӑвашлӑх аталанӑвӗшӗн тӑрaшакансем пире яланах пулaшаҫҫӗ. Паянхи уява ирттерме, юрӑҫӑсене апат ҫитерме тата хаклӑ парнесем илме “Еткер” фонд президенчӗ О.Н.Мустаев, Хула Думин председателӗн ҫумӗ П.К.Столяров, Кӗрешӳ федерацин президенчӗ В.В. Софронов, “Ульяновскцентргазстрой” тӗп директорӗн ҫумӗ Ю.В.Федоров, “Ульяновскцентргазстрой” коммерци директорӗ А.В.Федоров пулӑшрӗҫ. Вӗсене ҫӗре ҫити таймапуҫ.

— Ҫаплах Ҫамрӑксен канашӗн хастарӗсене палӑртса хӑварас килет. Фестивале ертсе пыракансене — Марина Карамзинӑпа Марина Головинӑна, хамӑр центрта вӑй хуракансене, жюри членӗсене, хӑнасемпе артистсене, юрӑҫӑсене хатӗрлекенсене пысaк тав”, — терң чӑваш культура пайӗн пуҫлӑхӗ И.В. Гаврилова.

Жюри председателӗ А.Н. Чурбанов фестиваль пирки шухӑшне пӗлтерчӗ: ”Эстрада вӑйлӑ аталанса пырать. Анчах та ҫакӑн пек фестивальсенче ытларах халӑх юррисем янӑрамалла. Авалхи юрӑсене пирӗн ҫитес ӑрусем валли сыхласа хӑвармалла. Тепӗр фестивале кашни хaй тӑрӑхӗнчи хӑлaх юррипе конкурса килессе шанатӑп”.

#Чӗмпӗр облаҫӗ, #фестивальсем