Н.Еграшкина сӑнӗ

Ульяновск хулин «Губернаторский» Культура керменӗнче облаҫри чӑваш юрӑҫисен XI «Чӑваш шӑпчӑкӗ» фестиваль-конкурсӗ иртрӗ. Юрӑҫсен ӑмӑртӑвне ертсе пыма Шупашкартан ятарласа «Асамат» ушкӑн ертӳҫи Леонид Антонов килнӗ. Валентина Тарават, Светлана Печникова пек искусство ӗҫченӗсем хутшӑнни мероприяти шайне ҫӗклерӗ.

Конкурса хутшӑнакан яшсемпе хӗрсен пултарулӑхне хак паракан сумлӑ жюри хушшинче Тутарстанра ҫуралса ӳснӗ ҫынсем те пур. Ку, паллах, хальхи вӑхӑтра Чӗмпӗр тӑрӑхӗнче пурӑнакан тутарстансене хумхантарать те, хавхалантарать те. Пӗр сӑмахпа каласан мӑнаҫлӑх ҫуратать! Жюри председателӗн тивӗҫне пурнӑҫлама «Хусан чӑвашӗсем» ушкӑнӑн ертӳҫине Алексей Наумов композитора шанса панӑ. Куракансем хушшинче тӑхӑрьялсем нумай пулни сисӗнет.

Тутарстансем йышпа кӑна мар, талантпа та ирттереҫҫӗ. Конкурсантсен хушшинче Нурлат районӗнчен тухнӑ хӳхӗм юрӑҫ Катя Артемьева пултарулӑхӗпе палӑрчӗ. Чи савӑнмалли вара жюри пӗтӗмлетӗвӗнче пулчӗ. Гран-прине ҫӗнсе илекенӗ Пӑва районне кӗрекен Шемек ялӗнче ҫуралнӑ чиперкке Екатерина Карамзина пулчӗ. Вӑл Шемек тата Пӳркел ялӗсен шкулӗсенче вӗреннӗ, халӗ Ульяновскра авиаци институтӗнче пӗлӳ илет. Катя илемлӗ те ҫепӗҫ сассипе жюрие кӑна мар, пур куракана та тыткӑнларӗ пуль, ҫавӑн пекех тӑхӑрьялсен илӗртӳллӗ ташшипе палӑрчӗ. Куракансем: «Катя, маттур!» – тесе кӑшкӑрса нумайччен алӑ ҫупрӗҫ. Ҫӗнтерӳҫӗсене дипломсем, чечексем, хаклӑ парнесем парса чысларӗҫ.

Катя юрласа ҫӗнтернӗ «Юрату кӑварӗ» юррӑн авторӗ те Пӑва районӗнчи Шемек ялӗнче ҫуралса ӳснӗ, халӗ Саратов облаҫӗнчи Балаково хулинче пурӑнакан Егор Кузьмин. Хальччен никам илтмен ҫӗнӗ юрӑпа ҫӗнтерчӗ Катя Карамзина, ку тата пахарах.

Ҫитӗнӳсем хавхалантараҫҫӗ, ырӑ шухӑшсем ҫуратаҫҫӗ! Е.Кузьмин авторпа Е.Карамзина юрӑҫ концертсем лартса тӑван тӑрӑхӗнчи чӑвашсене савӑнтарасшӑн, хӑйсен пултарулӑхӗпе паллаштарасшӑн. Ку кӑмӑллӑ пуҫарӑва, паллах, пулӑшакансем тупӑнмасан, ӗҫе кӗртме йывӑр. Администраци ӗҫченӗсем тата спонсорсем пулӑшма тупӑнасса шанатпӑр. Артистсем паянах хатӗр!

Жюри председателӗ А.И.Наумов:

– Чӑнах та, Тутарстанра ҫуралнисем нумайӑн хутшӑнчӗҫ конкурса. Вӗсен хушшинче манӑн вокал енӗпе уйрӑмах Кивӗ Ҫӗпрелӗнче ҫитӗннӗ Марина Васильевӑна палӑртас килет. Ҫапах ман шутпа пуринчен лайӑхрах юрлаканни – Чӗмпӗрте ҫуралса ӳснӗ Оксана Захарова пулчӗ. Шел, хула хӗрӗ чӑвашла калаҫма пӗлменнипе-и, ытти жюри членӗсем уншӑн сасӑламарӗҫ. Оксана питӗ пултаруллӑ хӗр, вӑл «Азамат» пултарулӑх студийӗн тӳлевсӗр юрӑ ҫыртарма тата видеоклип ӳкерме ирӗк паракан сертификатне тивӗҫрӗ. Ҫавӑнпа вӑл чӑваш эстрадинче тата палӑрӗ-ха тесе шутлас килет.

#Пӑва районӗ, #Нурлат районӗ, #Асамат, #Шупашкар, #Тутарстан, #фестивальсем, #Чӗмпӗр облаҫӗ, #Чӗмпӗр, #Тутарстан, #Шемек, #Пӳркел, #Кивӗ Ҫӗпрел