Чӑваш литературин электронлӑ вулавӑшӗнче паянтан 5 пин ытла хайлав вырнаҫнӑ! Малтанхи ҫитӗнӳ, 4 пинпе танлашни, 7 уйӑх каялла, пӗлтӗрхи чӳк уйӑхӗн пуҫламӑшӗнче пулса иртнӗччӗ. Ҫӗнӗрен кӗртнӗ кӗнекесен илес пулсан ҫаксене асӑнса хӑвармалла: Альбина Мышкинӑн «Атте пилӗ», Виталий Енӗшӗн «Чи пӗчӗк патшалӑхӗ», Денис Гордеевӑн «Хӗрес хывнӑ хӗвелӗ», Ҫемен Элкерӗн «Хӗн-хур айӗнче» сӑвӑлласа ҫырнӑ повеҫӗ, Тихӑн Петӗрккин «Ҫил-тӑвӑлӗпе» «Кушкӑ ачийӗ», Александр Алкан «Хӗҫпе ҫурли», Влас Иванов-Пайменӗн «Кӗперӗ», Георгий Красновӑн «Хӗрлӗ тюльпанӗ», Трубина Мархвин «Хӗллехи каҫсенче» калавсемпе повеҫсен пуххийӗ, Иван Салампекӗн «Пирвайхи юратӑвӗ», Александр Талвирӑн «Пӑва ҫулӗ ҫинче» повеҫӗ тата ыттисем. Хӑвӑрах куратӑр ӗнтӗ — самай пуянланнӑ. Сӑлтавӗ те пур — укҫалла сканерлама пуҫланӑран (50 пин ытла тӑкакланӑ) текстсем кӗртес ӗҫ самай хӑвӑртланчӗ.

Хайлавсен ытларах пайӗ, пӗлетӗр ӗнтӗ — сӑвӑсем. Вӗсен шучӗ 3 пин ҫурӑ ытла. Ытти тӗслӗ хайлавсем: калав (529 ытла, малтанхипе танлаштарсан 100 ытла хушӑннӑ), юрӑ (120 ытла, 40 хушӑннӑ), юмах (187, 17 хушӑннӑ), шӳтлӗ сӑвӑ (87, +20), кулӑшла калав (94, +24), поэма (27), халап (27), новелла (24), юптару (52, +15), сӑвӑллӑ юмах (8). Пысӑк калӑпӑшлисене илес пулсан, халӗ 42 повесть (икӗ хут ӳснӗ — малтан 21 кӑначчӗ), 12 роман (вӗсен шутӗнче 2 историллӗ роман, 1 роман-халап тата 1 сӑвӑллӑ роман).

Пирӗн порталти электронлӑ вулавӑша 2008 ҫулхи ҫурла уйӑхӗнче уҫса. Кашни ҫур ҫул хушшинче вӑл вӑтамран пӗр пин хайлавпа пуянланса пырать.

Вулавӑш пуянлансах пынӑран вулакансем те йышланаҫҫӗ — кунсерен унта 50 ҫынран кая мар кӗрсе тухать.

#сайтсем, #чӑваш чӗлхи, #литература