Романтикăллă тĕлĕрӳ

Андрей Петтоки | Поэма | 1933 | 8 146


Вăрçа! Вăрçа!

Çĕклен, ĕçлĕ çар!

..............................

...Сыв-и, Уралов кăмантир?!

Астăватăн пуль, кĕрхи кунсем...

Хупăрласа килетчĕ каç

Кĕрхи салхуллă хĕвеле.

Тăраттăмăр салхун эпир,

Чĕре йĕрет, шĕвеç куçсем,

— Ик çул хушши кунсем юлаç,

Каятпăр

Аккă килелле...

 

Астăваттăр пуль, юлташ Уралов,

Саламласа уйрăлайнă чух

Шăпăртатса куççуль юхтартăр?

Тен, çав чухне эсир астăвайрăр

Хĕрӳллĕ вутлă çулсенче

Тăшмансемпе мĕн пур ур-алăн

Шăлпа çыртсах кĕрешнине?

Астăваттăр пуль, юлташ Уралов,

Мĕнле, хăш чух чĕтрен çур саслăн

Юмах яратăрччĕ каçшерĕн,

Шур Атăл тăрăххăн, Уралăн,

Çĕпĕр çĕрсемĕн, эрнешерĕн

Шур кашкăр хыççăн шăла çыртса

Вилĕм-чирпе тек ăмăртса

Çӳренине?

 

Мĕнле хаваслăн

Тăван çĕр чăмăрĕ çинчен

Тăшман пĕр сыпăмне ватсан,

Шур калтаран, шур ирсĕртен

Хăш-пĕр яла хăть тасатсан,

Хĕпĕртесе куççуль тăксаттăр?..

Е хăш-хăш каç, тем инçĕртрен

Хăш-пĕр юлташăр çухалсан

Çынна курмийĕн макăрсаттăр?..

 

Ват кăмантир!

Сирĕн çул-йĕр —

Манми çапăçусен çул-йĕрĕ!

Атăл айлĕш, таçти Çурçĕр,

Лăпкă Донçи, Кубань, Кавказ.

Чул çĕр Карелипе Кронштадт...

Кăкăру çинче — çул-йĕр çăлтăрĕ —

Халь те ак хĕмĕн çутатать —

Хĕрлĕ орден умна лăпкать.

 

Астăваттăр пуль эсир çав чух

Каларăр, «Юлташсем, шанатăп —

Паян уйрăлсассăн та кайран

Хăш-пĕр хĕрӳллĕ кунсенче,

Хăш-пĕр çĕртен тухсан сас-чу»,

Тар ĕнĕкки сарăлсан тĕнчен,

Пур юлашки чĕр юн-вăйран

Каллех сирпе пулма шанатăп!»

 

...Ак халь ĕнте тăван ретре

Каллех эп хатĕррĕн тăратăп.

Таçтан, таçтан та — инçетрен,

Хура мĕлкен ларан ялтан,

Янравлă саслă хуларан,

Уй-хирсенчен, çӳл тусенчен

Полкшерен пухăннă, бригадăн

Тăратпăр — вăрçă умĕнче.

 

«Юлташ Уралов! Ак каллех

Çĕн çуратан çĕр ачисем —

Эпир ак пухăннă пĕрле!

Юлташ Уралов!..» Шухăшсем

Таçта пăтранчăкăн саланчĕç.

Кĕскен команда панă май

Мала, мала йăлт хăлаçланчĕç,

Васкавлăн сарчĕç утăма...

 

Ак эпĕ... Пурĕ те утатпăр...

Утатпăр... Утатпăр...

Хамăр хыçа

Юлаç кунсем.

Юлаççĕ ешĕл калчасем,

Юлаççĕ ватă аннесем,

Юлаç хĕвел питлĕ ачасем...

 

Утатпăр,

— Хăрушăлăх кӳрен

Тăшман çулне пӳлме.

Утатпăр,

— Телее сӳрен

Тăшман çулне пӳлме.

Утатпăр,

— Вилĕмлĕн çӳрен

Тăшман çулне пӳлме.

Утатпăр,

— Мĕн пур пӳр-сӳре

Çĕр çийĕн сарласран пӳлме.

 

Куççуль ан тăкчăрччĕç

Ват аннесем...

Хуйха ан курччăрччĕç

Çамрăк чунсем...

Пуçа ан усчăрччĕç

Яш-кĕрĕмсем...

Вăрттăн ан йĕрччĕрччĕç

Сар хĕрĕсем...

 

Эпир утатпăр —

Сыхлама

Ялти кăвак çӳçлĕ аннесен

Çĕршер-каçшер лăп ыйхине.

Лап улăх çийĕн ĕнесем

Пăрушсене

Сĕмкен

Тек лăпкăн-лăпкăн çуласа

Çӳрессине.

 

Эпир утатпăр —

Сыхлама

Хĕвел çуттин сарлан хирти

Таптанăвсăр ыраш калчи

Ем-ешĕллĕн ӳсессине...

Сар хурт вĕллин мĕн пур çĕрте

Сĕрлен пур хапрăк-савăтсен

Кашни иршер,

Кашни каçшер

Ĕçе чĕнен труба сасси

Мухтавлăн, юрă пек çĕр çийĕн

Сарăлассине.

 

Эпир утатпăр —

Сыхлама

Пуласлăх, çутă ĕмĕтсем,

Пиншер çул кĕтнĕ çут кунсем,

Мĕн пур этемлĕхшĕн çĕр çийĕн

Пĕр ним чăрмавсăр, кăлтăксемсĕр

Килессине.

Эпир

Каятпăр вăрăçа —

Татах, каллех, урăх çĕн вăрăç

Çĕре вут-хĕмĕн çавăрса

Этемлĕхе пĕтереслĕхрен

Чаруллă аллăн

Сыхлама.

Вăрçă чунне —

Мул тĕнчине

Тĕпрен

Хĕрхенĕвсĕр

Ватма.

Вĕçсĕр-хĕррисĕр

Тухрĕ çĕршывăм;

Тăчĕç полкшерĕн

Арă-ывăлсем.

Вĕçрĕ чарусăр

Утлă çар шавĕ,

Шурĕç ретшерĕн

Танкомобильсем.

 

Тупăсем ухрĕç

Пуçĕсене çӳллĕ,

Тытăнчĕç хăрушшăн

Вилĕмĕн сурма.

Пульвăрансем тăкрĕç

Чĕрĕ юна кӳллĕн,

Пĕтес пек ăрушăн

Хатĕр пурĕ урма...

 

Ялăн-ялăн тухрĕç,

Савăтăн, хуланăн.

Яш-кĕрĕм, ваттийĕ,

Арăмĕ, ачи...

Вăй-халăма пухрĕç

Чăмăртаннă аллăн,

— Çăлăнтăр çĕр çийĕ,

■ Страницăсем: 1 2 3

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: