«Кĕтсе ил…»

Мальвина Петрова | Сăвă | 1 022


Кĕтсе ил.

 

Кăшăлне пуçĕнчен халиччен ӳкермен

Сар Хĕвел патшалла утăмлатчĕ куллен

Паян çеç иртеймерĕ — çитмерĕ термен1 —

Тăруках, çăкăнтах чĕркуçленчĕ хуллен...

 

Хăмăшпа хăрпăкланнă2 Пĕве куçĕнче -

Сар Хĕвел темĕскер шыраса тупас пек -

Сив Хĕлле тĕртнине — йăлхаха3 — çиппинччен

Йĕпсипе4 çаклатса васкасах сĕвĕмлет...

 

Мĕн тупасшăн унта? — тĕлĕнет çут тĕнче -

Ыттине тирĕнтернĕ пулсассăн тиркев

Шур илмен вăхăтра кăн-кăвак куçĕнче

Асăрханă пулас темĕскер сар пике...

 

Хупласан чал куçна5 вĕçтерсе шур кĕпсе6

Сив Хĕлле тĕртнĕ чух ман ятпа шур пĕçмех7,

Тыт асра — пĕрлешместĕп унпа. Ил кĕтсе

Çуркунне, çакăнтах — тĕл пулатпăр каллех.

 

Кăн-кăвак куçлăскер, чуп туса хăварам:

Çураçса хунине çирĕплеттĕр пичет.

Сив Хĕлле евчисем хăвалаççĕ хыçран,

Таврăнсан — санпалах эп тăратăп венчет.

 

Кĕтсе ил.

 
1 термен — вăй
2 хăрпăк — куç тĕкĕ
3 йăлхах — хупă, витенкĕç
4 йĕпсе — çыхмалли варăм йĕп
5 чал куç — витĕр куç
6 кĕпсе — пушинки при тканье, тĕртнĕ чух тухакан юлашкисем
7 пĕçмех — хĕр перенчĕкĕ

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ:

Шухăшсем