Пушкăртстан

Алексей Воробьев | Сăвă | 1959 | 1 486


Çил-пăравус, саламласа пĕр кăшкăрт,

Сывла кас-кас вĕри пăспа туллин.

Ак Туймаза.

Умра — хĕвеллĕ Пушкăрт.

Хам ĕмĕте куçпа эп куртăм тин.

 

Ивановпа кăштах паллашнă хыççăн,

Силпи çинчен хыпар илтсен малтан,

Кунта килме шутлаттăм; ывçăн-ывçăн

Валак шывне ĕçес килетчĕ ман.

 

Килес килет. Нарспи аппан хĕн-хурлă

Шăпи текех хăртаймĕ никама.

Туссем патне яратăп хир-сăрт урлă

Тĕп чăвашран çитернĕ салама.

 

...Çула чĕнсе каларĕ Пушкăрт çилĕ;

— Васка хире; çӳл ту çине хăпар;

Çурхи вăрман чăпар куккук сассиллĕ,

Кашни çăлкуç пĕлтерĕ çĕн хыпар.

 

Чăнах иккен. Тухатăн хирсене,

Юпа утать-и Куйбышев енчен —

Ыраш çине, сап-сарă вир çине

Пралук мĕлки ретпе ӳкет çӳлтен.

 

Çăлкуçĕсем... куратăн ху сăнна.

Ĕçетĕн те, чĕрӳ каллех маттур.

Шăнкăр саспа хыпарлĕ шыв сана:

Çĕр айĕнче мĕн чухлĕ пурлăх пур!

 

Сăртра — шур пĕлĕт евĕр сурăхсем.

Хысакĕнче — кунçул сунса пире —

Чултан майланă пысăк сăмахсем

Чĕнеççĕ катаран: «Сыхлар Мире!»

 

Çăкалăха ирпе кĕрсе курман-и?

Янрать унта пĕр харăс пин кĕсле.

Уя тухан — çĕн вышкăсен вăрманĕ.

Анать тымарĕ нехтă тинĕсне.

 

Çул тăршшипех шăв-шав та юрă-сасă,

Хĕрсех ĕçлет ыр кăмăллă телей.

Хунав ярать тырпуллă Аургазă,

Завод лартать вĕçрен-вĕç Белебей.

 

Яла кĕрен. Унти мĕнпур чăвашшăн

Уяв çитнех, — тăванĕ килчĕ мар-и.

Чăваш çеç мар, сана хăна тăвасшăн

Чун-кăмăл уçнă вырăс, пушкăрт, мари.

 

Кунта туссем тупнишĕн çĕнĕрен,

Вĕсем яланлăх çывăх пулнăран,

Эп тав туса калатăп чĕререн.

— Рехмет сана, хĕвеллĕ Пушкăртстан.

Çавăн пекех пăхăр

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: