Салтак сăмахĕ1

Салтак сăмахĕ

Эп пĕчĕк çын, янравсăр ятăм.

Эп хапсăнмастăп нумая.

Çапах пĕлетĕп — мĕн вăл атом,

Чухлатăп атомри вăя.

Ман пĕлмелле те: Сталинградăн

Пуласлăхне хăтарнă кун

Хул ӳкрĕ хуçăлнă туратăн,

Хама шăварчĕ хамăн юн.

Ман пĕлмелле! Алхасрĕ çиçĕм,

Çунса кĕлленнĕ çут тĕнче.

Виç вăрçăра пулса аттеçĕм

Пуç хучĕ Витебск патĕнче.

Пĕлетĕп эп — ман савнă ывăл

Çуралнă çĕн хĕвел çутма.

Ăна ан хуçтăр вутлă тăвăл,

Вăл ан ылхантăр атома.

Эп пĕчĕк çын, кĕрлемĕ ятăм.

Мана мул-пурлăх кирлĕ мар.

Çапах калатăп:

— Мирлĕ атом,

Эс халăха пуянлăх пар!