Сăнӳкерчĕк

Асăнмалăх, тусăм, парнелерĕн

Сăнӳкерчĕк иртнĕ çул мана.

Килĕп, терĕн, мĕншĕн-тĕр килмерĕн.

Ăçта эсĕ? Мĕн пулчĕ сана?

Сăнӳкерчĕк,

Хĕрри пĕркеленчĕк,

Сархайма та тытăннă кăштах.

Сăнӳкерчĕк —

Туйăмри тĕпренчĕк,

Вырăну сан ĕмĕр çавăнтах.

Сăнӳкерчĕк —

Пурнăçри тĕрленчĕк,

Ас илме хистет иртнĕ куна.

Сăн ӳкерчĕк,

Пысăках мар, пĕчек,

Çав-çавах сиплет чирлĕ чуна.

Юратап тесе те тупа турăн,

Пĕрлешме сăмах парса тату.

Тем те пулĕ, тем те курса тăрăн, —

Хыпар ту, савниçĕм, хыпар ту.

Юратмастăп? Çук, чуна суятăп,

Каллех хатĕр туйăма чĕртме.

Мĕн пулсан та килессе туятăп,

Юрату хистет мана кĕтме.

Çĕнĕ комментари хуш