Малтисене çитес тесе васкатăп...
Ăш хыпнă çулçӳревçĕ эп. Васкатăп.
Ку тарана çитсе утман çула
Ыттисенчен кая юлса тухатăп,
Халь тин шыратăп хам утмаçула.
Пĕлмен çĕрте çул юпписем нумай та,
Кăтартмăн-ши, ыр çыннăм, çул-йĕре?
Тен, эсĕ утакан çулпах эп кайăп,
Тен, иксĕмĕр утас çулсем пĕрре?
Шӳт ячĕшĕн тесе тавра уттармăн —
Тӳрĕ çула та çитес çук вăй-хал.
Çĕр чăмăрĕ çавра та вăл, мăнтарăн,
Çавра-тавра утмашкăн кун сахал.
Ахаль те ытахаллĕн иртрĕ вăхăт,
Вăр-варрăн тухаймарăм тапранса.
Малтисене çитесчĕ манăн, тăхăм,
Малтисемпех пырасчĕ талпăнса!
Вулавçăсен шухăшĕ
Çĕнĕ комментари хуш
Зоя (2012-08-13 18:00:41):
"Ахаль те ытахаллĕн иртрĕ вăхăт"... Ан пăшăрханăр Виталий Петрович!Эсир пурнăçланă ĕçсем ахаль иртмен. Чăвашсем Сире чун-чĕререн хисеплеççĕ,Эсир малтисенчен пĕри капла та. Малашне те "Малтисемпех пырасчĕ талпăнса!" тĕллевпе пурăнни вара пире савăнтарать
Галина Зотова (2016-09-14 19:30:39):
Зоя шухăшĕсемпе килĕшетĕп.Сирĕн сăвăсемпе тĕлĕнсе паллашрăм!
Ярмат (2016-09-14 21:31:12):
Станьял сăввинче малĕмĕтлĕх, пурнас кунăн çутти палăрать!
В.Станьял (2016-09-15 11:29:51):
"Тĕнче тетелне" кутăн-пуçăн çавăракан мăнук çак кĕтесе уçса кĕртрĕ те савăнма хушрĕ. Савăнмасăр!
Тăван сăмахлăха сăнаса тăнăшăн - палласа илеймен Зояна, Ярмата, чутайсем Галина Зотована тав тăватăп:ĕçĕрсем ăнса пыччăр, çыраткăрсем выляса тăччăр. Татах тĕл пулăпăр-ха!
Ярмат (2016-09-15 13:50:00):
Тавах сире чĕререн тухакан ыр сăмахсемшĕн. Малашне те çаплах тăван сăмахлăха сăнаса тăрасчĕ. Ярмат тени: «Яльчикский район Малая Таяба».
Галина Зотова (2016-09-15 20:02:12):
Сире валли парне хатĕрлесе хурса-ха. Аттен алçырăвĕсем тăрăх кĕнеке пичетлесе кăларма пултартăмах! "Кукшумский колос" ятлă, ытларах пайĕ вырăсла, чăвашла статьясем те пур."Интереслĕ кĕнеке" - терĕç,Эсир темле хак паратăр ĕнтĕ?