Тăван çĕршыв
Çĕршывăмăр сарлака та аслă, теççĕ.
Вĕç-хĕрсĕр сĕм вăрмансемпе хирсем.
Пĕчĕкренех ăша илсе ӳсеççĕ
Çапла вĕрентнине ачамăрсем.
Чăнах, Çĕршывăм аслă — килĕшетĕп.
Çитекенни çук анлăш-урлăшпе.
Аш кăнтăра, сив çурçĕре çитетĕп —
Çакна туятăп эп чун-чĕремпе.
Ăçтан сăмахĕ тухнă? Халь пĕлеймĕн:
Çуралнă енпелен тăван кĕтес
Этемшĕн «пĕчĕккĕ çĕршыв» кăна-мĕн.
Апла вăл Çĕршывран мĕскер кĕтес?!
Тăван Çĕршыв пĕрре кăна. Ан манăр!
Çук пысăкки, çук пĕчĕкки унта.
Эппин ялан хисеплĕ, çумлă пултăр
Çуралнă, ӳснĕ ен пурнăçунта.
Вулавçăсен шухăшĕ
Çĕнĕ комментари хуш
Влад Маскай (2019-07-16 00:37:16):
Микул Ишимбай -тухăçлă ĕçлекен поэт-çыравçă. Ун пек çыракана "тӳрлетме"-хăйма йывăр, анчах та "сиксе" юлнă саспаллине е ытлашширех "пăнчине" курни пысăк çылăхах мар пуль тенипе"Тăван çĕршыв" ятлă сăввинчи йăнăшĕ çине тинкерме сĕнетĕп
"Эппин ялан хисеплĕ, сумлă пултăр", тесе вулмалла("çумлă" мар...)