«Ытарайми чăвашлăх...»
Ытарайми чăвашлăх
Çеçен хирте çӳрет.
Пĕр тулхăрать йăвашшăн,
Пĕр вирхĕнсе иртет.
Ытарайми чăвашлăх
Сĕм вăрманта сĕрлет:
Хунавлăн йыш хушасшăн
Хĕлле те ешерет.
Ытарайми чăвашлăх
Шыв айĕнче шĕвет:
Малашлăхне тупасшăн,
Аваллăхне тĕпчет.
Ытарайми чăвашлăх
Çĕр тĕпĕнче кĕрлет:
Хăватлă вăй пухасшăн
Тăпăртатса илет.
Ытарайми чăвашлăх
Çӳл тӳперен чĕнет:
Тăван та тус пуласшăн
Ыр пиллĕхне сĕнет.
Вулавçăсен шухăшĕ
Çĕнĕ комментари хуш
Сăвар (2011-09-20 00:01:00):
Афалек, санăн çак сăвву ыттисем пекех вуласа ытармалла та тăранмалла марскер. Чăвашлăхпа çыхăннă сăвăсен ăмăртăвне ирттермелле мар-ши? Кайран уйрăм кĕнеке çапса кăларасчĕ, чăвашлăха халалласа1