Хальхи çĕнĕ пурнăçра...


Хальхи çĕнĕ пурнăçра

Ĕçлекенĕн, хресченĕн,

Ĕçне мала ямашкăн

Журнал-хаçат, кĕнеке

Пуринĕн те илмелле.

Саманара мĕн пулни,

Çутçанталăк хыпарĕ,

Пĕтĕм тĕнче пурнăçĕ —

Ӳкет пурте хут çине.

Çĕр ĕçлесси-тăвасси,

Пахча-çимĕç тăвасси —

Кĕнеке çинче пурте пур.

Ху сывлăхна сыхлама,

Выльăх-чĕрлĕх усрама

Кнекепеле вĕрентеç.

Юрлă юхнă пурнăçа

Мĕнле майпа юсама

Кĕнекерех ăс тупан.

Çичĕ шитлĕ çĕр çинче,

Чуллă тарăн çырмара,

Хăйăр-тăмлă тăпрара

Чăваш халăх малалла

Кĕнекесĕр-вренӳсĕр

Транах апат çиес çук,

Хăй кăна мар, выльăх те

Тут хырăмлă пулас çук.

Виçĕ хăлаç анара

Пурăнăçа юсама

Кнеке-хаçат тăн парать.

Самогонка таврашне

Ĕçме пурте пăрахса,

Кнеке, хаçат-журналсем

Пурте пуçлар илмешкĕн.

Ним пĕлмесĕр тĕттĕмре

Хупăрланса пурăнма

Çĕнĕ пурнăç хĕвелĕ

Сирĕн çине пăхаймĕ.

Ăслăлăхăн чăнлăхне,

Вĕренĕвĕн мухтавне

Сăра курки вĕрентмест —

Кнеке-хаçат вĕрентет.

Хальхи пурнăç хăватне

Чĕлĕм тĕтĕм кăтартмасть,

Çĕпре курки палăртмасть —

Хаçат-журнал пĕлтерет.

Хăмăш-хăях хушшинче

Шăнкăлтатса юхакан

Шыв сассине итлеме

Кнеке тытса вулăн эс.

Шурăмпуçĕ килнĕ чух

Шĕкĕлтетсе юрлакан

Кайăксенĕн юррине

Итлес килет пулсассăн,

Кнеке илсе вуласам.

Çутçанталăк хастарлăх,

Пĕтĕм этем ăслăлăх —

Пурте çавă кнекере.

Поэт-çыруç таврашĕ,

Кнеке ĕçне тăвакан,

Ăнланмалла кĕнеке

Çапса парăр халăха!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... »
Хаклав:
Шухăшĕ:
Чĕлхе илемлĕхĕ:
Содержанийĕ: