Инçетре çуралнă ялăм...1

Инçетре çуралнă ялăм...

Инçетре çуралнă ялăм,

Аттепе анне инçе.

Эл — салтак паян.

Вăй-халăм

Туртăнать çар ретĕнче,

Ир тăма та, каç выртма та.

Эп вĕрентĕм çакăнта.

Вичкĕн çил те, шартлама та

Сахал мар-çке çĕр хута

Тĕрĕслерĕç. Марш тăварĕн

Тутине пĕлен аван,

Хурçă тусăм — танк — сăнарĕ

Юлĕ асăмра ялан.

Юлташсен кулли,

Сасси те

Тухас çук чун-чĕререн.

Вăхăт кайĕ, вăхăт иртĕ,

Таврăнăп çар ретĕнчен.

Хальлĕхе çарта тăратăп,

Аслă Гейне çĕрĕнче,

Чун-чĕре çавах,

Туятăп,

Чăваш Ен ытамĕнче.